UN STRAMBO BESTIARIO ISTRIAN: La capra la risorgi, la sardela la va a fondo

Xe notissie de un per de giorni fa. In Istria sta capitando una roba curiosa: el numero de capre, che le iera su l’orlo de l’estinsion, el cressi, quel dei pessi, che el mare el ghe ne iera pien, el cala. E no xe una batuda, anche se par una de quele storie che se contava una volta in ostaria.

La capra istriana, che qualche ano fa la rischiava de sparir, la sta tornando a farse veder. De una quarantina de capi se xe rivai a circa 350 animai riprodutori. I numeri i xe stai presentai a Sanvincenti, nel castel Morosini Grimani, in una riunione dedicata al “passato, presente e futuro” dela capra istriana, organizà a l’interno del 14° Festival del formaio, de la 26ª edission del concorso che premia la capra più bela e de la 8ª mostra de le pigore.

Xe una bela nova, ma prima de cantar vitoria bisogna scoltar anche quel che ga dito el professor Ante Ivanković de la Facoltà de Agronomia de Zagabria, coordinador nazional per le risorse genetiche animali. Secondo lui, 350 cavre riprodutrici xe ancora poche: la razza la xe appena sul punto de vegnir fora dala categoria de quele in pericolo critico de estinsion. Per dir “meno mal” ghe voleria rivar a circa 2.000 bestie, ma per poder dir che la capra istriana no la xe più in pericolo ghe ne voleria più de 7.000.

Insoma, anche con le robe le va mal, la capra, da vera istriana, la tien duro. No per niente xe un dei simboli storici de l'Istria, tanto che la figura anche sul nostro stemma. La xe una bestia testarda, resistente, abituada a viver con poco e a rampigarse anche dove par impossibile.

La musica la cambia in tel mar indò che cala el numero de sardele. In Adriatico ghe ne xe sempre meno e bisognava far qualcossa per proteggerlo. Eco perché la Direzion de la Pesca del Ministero de l'Agricoltura de Zagabria ga deciso, con una misura urgente, de limitar a soli cinque giorni al mese la pesca de le sardele con le rede a circuission lungo la costa occidental de l'Istria. Un colpo duro per i pescadori, e no xe escluso che in Adriatico no rivi anche altre restrissioni.

Adesso i pescadori i ga cinque giorni per pescar e vinticinque per contar a casa quanto pesse che no i ga ciapà. El problema xe capir come salvar el pesse senza mandar a remengo quei che de pesse i vivi. Perché se no se pesca più, forsi qualche sardela la se salva, ma i pescadori rischia de finir lori in via de estinsion. E per lori, fin desso, no se ga ancora organizado nessun festival come per le capre. E dir che una volta l’Istria la iera criga de “fabriche” de sardele…