UNA DELE DONE PIÙ IN GAMBA MAI NATE IN ISTRIA: Giuseppina Martinuzzi, bon compleano!

In tel 1978, la scuola elementare italiana de Pola, dala scola giala, indò che desso xe el ginasio croato (una volta là iera anche el ginasio e l’asilo italiani) la se ga trasferido in tela nova sede de via Sissan, fata nova, come che se diseva a l’epoca, “con l’autocontributo di tutti i cittadini”, el famoso “samodoprinos”. Quella che fin a quel momento la se ciamava “IV scuola elementare” de Pola la cambiava nome in “Giuseppina Martinuzzi”.

De quel periodo me ricordo un per de robe: la prima xe che, sicome stavo lò dela vecia fabrica lucheti, vicin del campo e della vecia scola, ghe iutavo al maestro Mario Lonzar a portar in tela scola novo rodoli de carte geografiche, bestie imbalsamade, bale de calcio e de palacanestro.

La seconda xe che la scola la xe stada inaugurada el 4 marzo (compleano de Lucio Dalla) e quela xe stada la prima volta che gavevo visto Mario Stepčić, el novo diretor subentrado a Massimiliano Volghieri, noto anche come „paperino“.

La terza roba che me ricordo xe i muli de Galesan (me per ancora de veder Sergio Delmoro) che i iera sai bravi a impiantar i pini davanti a l'ala sud, quella che dava su l'osteria che nel fratempo le xe diventada botega del pan. Quei pini i xe ancora là, bei, grandi e grossi.

La quarta e ultima roba che me ricordo sai ben, xe che no gavevo idea de chi che iera sta Giuseppina Martinuzzi e devo ameter che sto nome no’l me piaseva sai.

Poi se cressi e se inomincia a imparar le robe e adesso so de sicuro che la Giuseppina Martiniuzzi la iera una dele done istriane più in gamba mai nate. Maestra de scola, pedagoga, peoetessa, ma anche attivista politica de idee socialiste, la xe stada tra le prime a lotar per scolarizzar anche i poveri e per i diriti dei operai e dele done.

Nata in Albona el 14 febbraio 1844, morta sempre in Albona el 25 novembre del 1925, la ga scrito sagi, articoli, testi pedagogici, ma anche de pensiero politico e sociale Tra queste xe de ricordar “Pagine istriane” (1898), che xe una raccolta de scriti dedicai ala società e ala cultura de l’Istria, poi che xe vari “sritti pedagogici” indò che la spiega le sue idee su l’educassion popolare e sul ruolo civile dela scola e infine xe i “Ricordi e pensieri”, un’opera memorialistica pubblicada postuma.

“L’istruzione è il primo pane dell’anima; senza di essa non vi è libertà possibile“, la ga scrito parafrasando Mazzini. A sta conclusion la xe rivada dopo gaver insegnà a Albona, Galesan, Mugia e Trieste, dove che la xe andada in pension. Prima però, con altri autori, nel 1886 la gaveva scrito un “Manuale mnemonico“, con tabele per render più semplice quel che i fioi de scola i doveva memorizzar. La ga anche fondado due riviste leterarie: Pro Patria e dopo che questa la iera stada vietada, Pro Patria Nostra.

Tra le sue racolte de poesie, la più famose xe Ingiustizia del 1907.

Politicamente, dopo esser stada de sentimenti italiani, la se ga convertido al socialismo internazionalista, sburtando la convivenza tra Italiani e Slavi de l'Istria. In tel 1921 la se ga anche iscrito al PCI, el Partito comunista italiano apena fondado. El suo pensier el iera questo: „La patria vera è là dove l’uomo è libero e rispettato nel suo lavoro.“

Oltre che la scola de Pola, a Giuseppina Martinuzzi ghe xe dedicade strade in Albona e a Umago, Citanova, Rovigno e anche a Roma.

Se gavarè acorto che ogi xe el compleanno de Giuseppina Martinuzzi, la xe nata el 14 febraio de 178 anni fa. Per l'ocasion, ieri una delegazion del Municipio e del Circolo de Allbona i ghe ga meso una corona sula sua tomba in tel cimitero de Albona. Bravi.