(VIDEO) Che l'italian el daghi fastidio anche a Dignan, questa proprio no iera de spetarsela

No xe un segreto che ai ‘taliani de l’Istria l’ino uficial dela Region Istriana, “Krasna zemljo”, no ‘l ghe sona proprio sai ben in tela recia. El fato xe che in tel verso “dome roda hrvatskog” se nomina solo i croati. Xe vero che in sto verso no vien esclusi tuti quei altri che l’Istria ghe xe anche “dom”, come che xe vero anche che in tel ino i 'taliani no i vien nominai in nissuno logo.

Xe un smaco, ma i motivi storici per digerirlo, a veder ben, li trovemo. Se tegnimo conto che dal Cinquencento al 1945 metà dela popolazion de l’Istria la iera croata - quasi tuti in tel’interno - e metà italiana - quasi tuti sula costa (la gavemo fata semplice, in Istria xe vissui sempre anche altri popoli) alora podemo guardar i ‘taliani e i croati come do fradei, Toni e Tone, che i ga eredità la stessa casa, che sarìa l’Istria.

Co in un primo momento la casa la iera stada uficialmente notada a nome de Toni, sto nane el ga fato de tuto per smacar Tone fora de casa. Co’ poi Toni el ga dovu’ molar la proprietà, la casa la xe passada a nome de Tone. A diferensa de co el paron iera Toni, Tone ghe ga lassà al fradel una camereta, ma sula tabela dela porta de casa e sul citofono scrivi solo el nome de Tone. Eco, l’ino istrian xe la tabela sula porta de casa, e fin che Tone el ghe fa a Toni el favor de poder sta in quela casa, ma savendo ben chi che comanda, xe inutile lamenatarse per l’ino istrian.

Le robe le sta in modo diferente a Dignan indo’ che per secoli el 99% dei abitanti i iera ‘taliani (neolatini, romani, istroveneti, protoitaliani definili come che ve par meo),  anche se subito dpo la fiera del bestiame, a nord del paese, comincia la Roveria e la no stava praticamente gnanche un ‘talian. Ma a dauntaun Dignan Toni ga lassà un segno sai più fondo dei Tone, e xe per questo una notissia del qualche giorno fa che la riguarda la scola de Dignan la ga de l’incredibile.

Se a livel de tuta l’Istria se pol anche acetar de lassar la lingua italiana in panchina, a Dignan la ga de esser sempre in campo. Dal primo munito. E invesse xe capità che l’italian el dà fastidio anche a Dignan! No a Zabroni (Čabrunići) o San Piero in Selve (Sveti Petar u Šumi), ma a Dignan! Robe de no creder.

Eco i fati: poco fa xe sta presentando l'ino dela Scuola elementare de Dignan, che la xe una scuola mista croata e italiana con aministrassion e diression unica. I fioi de tute le due sezioni e la maestra Serena Bonassin, con el sostegno de l'Unione Italiana, i ga musicà e  scrito l'ino in tele lingue italian e croato e in tei dialeti locali ciacavo e istroveneto. La prima strofa la xe in in italian, la seconda in croato, el ritornelo el xe anche in due lingue e poi xe parti in ciacavo e istroveneto. A cantar xe sia i fioi dela sezion italiana, sia quei de quela croata.

Insoma, xe un ino che 'l rispeta l'identità e ‘l plurilinguismo del logo, ma no el ghe xe andà ben a certi genitori che ghe ga da fastidio l’italian. E l fato che ogi i ‘taliani i sia in minoranza anche a Dignan no pol esser una scusa. A livel istrian, magarsi si, ma a Dignan proprio no. Chi che la pensa diversamente vol dir che de Dignan no i sa gnente e che de Dignan no i  ga capi’ gnente e che, anche se ogi i sta a Dignan, no i la rispeta per gnente.

No voio comentar altro, digo solo che la vicesindaca dei Dignan Manuela Geissa la ga fato sai ben a incavolarse, e anche per de bon.