"Volevo dimostrar che anche soli se pol far robe bone e giuste". El Sissanse Aleksandar Perc el vol che finalmente se voti per el Consiglio del Comitato local de Sissan

 A SISSAN SE DOMANDA LE ELESSION DEL CONSEIO DEL COMITATO LOCAL

El Comitato local de Sissan–Šišan formalmente el esisti, ma, secondo quel che disi Perc, xe za diversi ani che no'l ga un conseio eletto e ativo. Perc, che xe vegnù a star a Sissan sie ani fa, el ritien che sta situassion rendi più dificile la comunicassion tra la gente del paese e el Comun de Lisignan.

Aleksandar Perc, che ‘l sta a Sissan, el ga fatoo l’ l'inissiativa de domandar che vegni fate le elezion per el consiglio del Comitato local de Sissan–Šišan. Secondo lu, xe ora che che sta in  paese, e secondo l'ultimo censimento xe 1.007 persone, el gabi de novo i sui rapresentanti  per  poder parlar con lori diretamente dei problemi o per far proposte.

El Comitato local de Sissan–Šišan formalmente el esisti, ma, secondo quel che disi Perc, xe za diversi ani che no'l ga un Consiglio eletto e ativo. Perc, che xe vegnù a star a Sissan sie ani fa, el pensa che sta situassion la fa più dificile la comunicassion tra i abitanti e el Comun.

– Mi credo che le ultime elessioni le sia stade ancora nel 2015, ma no posso dir de sicuro per quanto tempo dopo el Consiglio el gabi continuà a lavorar. In ogni caso, el ne spiega, xe passà bastansa tempo.

Dai problemi comunali a l'inissiativa dei cittadini

L'idea no xe nata de un giorno a l'altro. Perc el ne conta che, dopo esser vegnù a star a Sissan, el se ga trovà davanti a diversi problemi de ogni giorno, da la mancansa de cestini per le scovasse e de iluminassion publica, fin ai busi per le strade e a le machine che cori massa forte.

– Co sie ani fa se gavemo fato la casa e semo vegnudi a star qua, no se spetavimo che tuto fussi sistemà a la perfession. Ma gavemo visto subito certe robe le saria stade de meter a posto. Per esempio, i sostegni per i cestini de le scovasse i iera là, ma mancava cestini! Ghe gavemo scrito al Comun e a la fine i cestini i xe stai messi, ma solo dopo circa do ani. No li gavemo domandadi per noi, ma per tuto el paese – el se ricorda.

Ste esperiense, el disi, le ghe ga fato pensar a quanto più semplice che saria la comunicassion tra la gente e el Comun se esistesi un Consiglio del Comitato local, ma un Consiglio ativo.

– Me xe ciaro che, elegendo un Consiglio, no se risolverà automaticamente tuti i problemi. Ma xe importante gaver persone per poder parlar con lore per presentar le nostre proposte e dodandar tuto quel che ne servi, e che le ne rapresenti in Comun. A mandar solo e-mail e scriverse messagi, se combina poco o niente – el ne disi.

El ga preparà i manifesti e i volantini e poi el xe andà de casa in casa

Co ‘l ga deciso de meter in pie l'inissiativa, el se ga domandà come far per meter insieme la gente e organisar l'assion. Invesse de perder tempo in longhe discussioni, el ga deciso de far quasi tuto solo.

– Al principio pensavo chi poder contatar, chi ciamar per farme dar una man, ma dopo, con l'esperiensa che go, go dito tra mi e mi: stavolta fasso tuto mi. Se speto de metersi tuti d'acordo, passa tropo tempo – el ne conta.

La do che ‘l lavora, el paron el ghe ga lassà stampar una ventina de manifesti in croato e altretanti in italian, e dopo anche qualche sentinaio de volantini bilingui.

– I volantini i xe restadi a casa mia per un giorno o do. Dopo me son dito: cossa li tegno qua a far? Li go messi in borsa e son partì. In tre giorni go girà quasi tuto Sissan. Go sercà de passar per più strade possibili e rivar a più case che podevo. Penso de gaver fato in tuto una ventina de chilometri a pie – el calcola.

Per preparar e sistemar el material de promossion el se ga fato dar una man anche da l'inteligensa artifissial, che, come che ‘l spiega, la ghe ga fato risparmiar tempo nel disegnar i volantini.

Aleksandar e sua figlia Zara mentre distribuiscono volantini

Le firme se ingrumerà sabato e domenica

Perc el invita la gente de Sissan a vegnir sabato e domenica, da le 8 a mesogiorno.  a firmar la petission per domandarhe al Comun de cominciar con la procedura per convocar le elessioni del Consiglio del Comitato local de Sissan–Šišan.

– Questo xe solo el primo passo. Volemo farghe capir ciaro al Comun che domandemo le elessioni per el Consiglio del Comitato local. La gente xe bastansa interessada, in tanti i me ga contatà e i me ga dito che i vegnirà a firmar. Qualchedun ga xa scominsià a contarme i sui problemi, ma mi ghe spiego che queste no xe ancora campagna eletoral. Adesso volemo mostrar che ghe xe interesse tra la gente del paese – el ghe tien a dirne.

I fogli per ingrumar le firme i xe sti preparai in croato e in italian, visto che a Sissan ghe xe una numerosa comunità italiana.

Da quel che go podù saver fin adesso, per sta inissiativa no xe previsto un numero minimo de firme, ma el suo obietivo xe quel de ingrumar el sostegno de più compaesani possibile.

«No bisogna spetar che qualchedun altro fazi qualcossa»

Anche se se trata de una inissiativa che riguarda el funzionamento de l'autogoverno local, Perc el el ne disi neto e s’cieto che uno dei sui motivi principali iera quel de mostrar che anche una persona sola, se la se movi, la pol meter in moto dei cambiamenti, sensa grandi soldi e sensa una organisassion drio le spale.

– Volevo mostrar cossa che se pol far anche co le robe se la fa soli. No te servi nissun, basta un poco de voia e de costansa. Mi go organisà tuto questo praticamente sensa spender gnente, con un poco de tempo libero, ma caminando bastansa. Anche se qualchedun dovessi pagar per stampar el material, con trenta o sinquanta euro se pol far tante robe – el disi Perc.

El ameti che al principio no'l gaveva gnanca intension de domandar el sostegno dei media, perché el voleva veder quanto che ‘l podeva rivar a far solo col proprio impegno.

– I volantini li go consegnai in giro, i fogli per le firme i xe pronti e adesso ghe toca a la gente del paese decider se la vol sostegner sta inissiativa – concludi Aleksandar Perc.

Per el momento la sua inissiativa la riguarda Sissan, ma el ne segnala che durante i preparativi el ga savù che anche in altri paesi del Comun de Lisignan se parla del funzionamento dei Consigli dei comitati locali. El spera che el suo esempio el possi sburtar anche altri abitanti a interessarse a le possibilità de partecipar a le decisioni su le questioni importanti per le proprie comunità locali.