Xe passai 800 anni dala morte de San Francesco: anche in Istria el "poverello d'Assisi" e Patrono d'Italia el iera sai venerà

Sto anno se celebra i 800 anni dela morte de San Francesco, uno dei santi più venerai dai cristiani. In tuta l’Italia, a partir dal 10 genaio, xe in programa una longa serie de manifestazioni religiose, ma anche artistiche e culturali, per ricordar la vita e amplificar el messagio etico (che saria umiltà e povertà) del Santo de Assisi. Come che xe normal, proprio in sta citadina de l’Umbria la festa la sarà più sentida e la durerà tuto l’anno.

San Francesco el iera nato in tel 1182 in una famiglia rica, fio de un mercante de stofe. Francesco el gavessi volù diventar cavalier, ma dopo una malatia el ga avù una crisi spritual che la ghe ga fato cambiat vita. El ga rinuncià a tuti i beni e a tute le richeze, el ga comincià a viver povero, a caminar discalzo o co un per de sandali de pele, come che predica Cristo in tel Vangelo.

Per predicar, in tel 1209 el ga fondà l’Ordine dei Frati Minori (che saria i francescani), ispirando anche la fondazion de l’Ordine de Santa Chiara, quel dele “clarisse”. Papa Innocenzo III el ga aprovà el novo Ordine, ma solo a vose, xa subito in tel 1209, per iscrito lo farà papa Onorio III in tel 1223. Francesco xe morto el 3 ottobre del 1226, el xe sta fato Santo da papa Gregorio IV in tel 1228. Solo quasi 800 anni dopo, l’Argentin Jorge Bergoglio, che el voleva una cesa umile e no spendaciona, xe sta el primo a sceglier Francesco per nome de papa.

La tomba  Francesco la se trova a Assisi, in tela Basilica de San Francesco, fata subito dopo la morte del Santo (1226) e consacrada nel 1253. Xe una cesa sai bela, ma in realtà saria due cese una sora l’altra (Basilica Inferiore e Basilica Superiore) che, oltre a esser in una posizion meravigliosa, la ga tante opere d’arte, tanto da esser patrimonio de l’UNESCO. Basti pensar al ciclo de 28 afreschi dela vita del Santo fati dala man de Giotto,ma anche a quei de Cimabue col el Cristo in crose, al ciclo dela Passion de Cristo de Pietro Lorenzetti e ai quadri gotici de Simone Martini.

Ma no solo la cesa, tuta Assisi la xe sai bela: anche a vederla da lontan, la xe un spetacolo. Se no ierivo mai, dovessivo regalarve una gita in Umbria. Sto anno xe anche l’ocasion bona.

Per el setimo centenario dela morte de San Francesco, nel 1926, el papa Pio XI lo ga proclamà ufficialmente Patrono d’Italia. Ma el Santo de Assisi el xe sai venerà anche in Istria: complessi de cesa e convento de San Francesco ghe ne xe a Capodistria, Pola, Rovigno, Piran e Pisin, tra el 1496  e ‘l 1795 un covento francescan iera anche in Albona. In quel che una volta iera la cesa e ‘l convento francescan de Parenzo, ogi xe la famosa sala dela ex Dieta provincial dita “Istarska sabornica”.

Anche se San Francesco no ’l xe mai vegnudo in Istria, el bel xe che i frati francescani i xe presenti in Istria de subito dopo dela fondazion del l’Ordine in tel 1209. Grazie ai contati con Venezia e Padova, Pola, Parenzo, Capodistria, Rovigno e Piran i diventa presto centri francescani; i sarà importanti no solo per la prevedibile funzion religiosa e per la predicazioin, ma anche perché i se darà de fa per istruir la gente, anche cominciando a parlar in tela lingua del popolo invesse che in latin. Più tardi i francescani i riva anche a Pisin.

Xa poco dopo dela metà del XIII secolo, tra el 1265/68 i Capodistriani i sarà i primi a dedicarghe una cesa a San Francesco (e in cità, xa in tel 1229, iera passà anche San Antonio de Padova), poi sarà la volta dei Piranesi che i farà la cesa e  ‘l convento tra el 1301 e ‘l 1318. Al principio del XIV secolo conventi con cese francescani se costruissi anche a Parenzo e Pola, dove che i lavori i comincia in tel 1314. Tra el 1463. e ‘l 1477 un complesso de cesa e convento francescani el vien fato anche a Pisin.

L’architeto dela cesa de San Francesco a Pola xe quel Jacopo da Pola che tra el 1291 e ‘l 1310 el gaveva lavorado a Padova, anche come capocantier per la celebre Basilica de Sant’Antonio, per esser po abate dela cesa de Santa Giustina in Prato della Valle. Dentro, in tela cesa de San Francesco de Pola, spica per bellezza un polittico (una specie de scultura fata da panei, ma se la guarda solo de davanti) de legno dorado fato verso el 1450 dala scuola veneziana del famoso Vivarini. La scena principale xe un altorilievo dela Madona che la tien in brasso el picio Gesù, de fianco e xe le figure de 12 santi e giusto sora la Madona xe un Cristo de grande. In alto el polittico el ga quele punte che le se ciama guglie, come el duomo de Milano. Insoma, parlemo de una dele opere darte più importanti del periodo gotico in Istria.

El polittico de legno dorado in tela cesa de San Francesco a Pola

Oltre a esser Patrono d’Italia, San Francesco xe anche simbolo del rispeto per la natura e Patrono dei ecologisti. Tuto el rispeto per “el creato”, che saria el nostro mondo, lo ga dimostrado in tel suo famoso “Cantico delle creature”, quel per le bestie, invesse, in tele sue storie del lupo e dei usei. Iera una volta un lupo che ghe dava de bazilar, fassendoghe paura, ai abitanti de Gubbio. Francesco lo ga ciamà “frate lupo” (che sarìa fradel lupo) cussì che la bestia la ga fato pase con i paesani. Un’altra volta Francesco ga pensà che anche le bestie le iera degne de scoltar la parola de Dio, cussì el ghe ga predicà a un stormo dei usei, invitandoli a lodar Dio, e lori i xe stai fermi a scoltarlo.

Una variante de questa storia la iera xe stada riproposta anche a Pola, dove che se contava che un frate francescan el andava a predicarghe ai usei fora dei muri dela cità. A Pisin se contava invesse che iera stada trovada una nova sorgente de acqua, a beneficio dela gente, dele bestie e dei campi, grassie a una preghiera de un frate francescan. A Rovigno ghe se riconosseva a San Francesco e ai francescani el merito del fato che la cità la vegniva sempre risparmiada dale epidemie proprio perché prima i frati francescani i gaveva assistido sensa paura anche i maladi contagiai de malaria e peste. In tuta l’Istria se invocava San Francesco contro le malattie delle bestie e ogni 4 otobre in onor de San Francesco se impizava una candela per favorir la protezion dele bestie domestiche.

Conossudo come el “poverello di Assisi”, in realtà, anche contro la sua volontà, ala fine el ga fondado un movimento (quel dei frati minori che “nudi i voleva seguir el Cristo nudo”) che col tempo el xe diventado una multinazionale, un vero brend.