El primo de genaio go ciamà l'amico a Trieste per farghe i auguri. Ghe go dito: "Giani, dame una man, qua xe uficialmente tuti contenti e mi me par de eser el più mona e anche el più sfigà. Consolime almeno ti: de quando che gavè abandonà la lira se sta mejo o peso?"
L'amico me ga rasicurà. El me ga ricordà che el giorno dopo, in Italia, televisioni, radio e giornai no faseva altro che divulgar entusiasmo. Iera in voga una machineta che la canbiava con un clic el valor de la lira in euro. I più furbi, e i iera in tanti, un mese dopo i gaveva senplificà el mecanismo. Costava diecimila lire? Ben, deso costa dieci euro, che problemi xe? Gavè capì? Devo spiegar mejo? Ancora ogi la machineta no sgara: un euro val 1936,27 lire. Me dispiasi per la lira, me dispiasi per el talero sloven e adeso me dispiasi per la kuna.
L'amico triestin el ga la mia età, el xe nato con el confin e col confin el morirà. Ancora ogi a Trieste se disi: vado in Jugo a far benzina. Co xe cascà el confin italo-sloven iera tuti che se basava e abraciava, uficialmente. A la fine, tuto xe restà come prima, ognidun a casa sua, el sloven in Slovenia e el talian in Italia. No se ga spostà una virgola. I disi che no sarà code ai confini? E come risolveremo le code al Lisert e a l'entrata in Ipsilon? Con i turisti ti fa solo che soldi, cultura poca e movimento de spirito quasi a zero.
El turismo no unisi, el turismo dividi, sarà senpre i più richi che farà el bagno in pisina e i più poveri che no gavarà gnanche la spiagia publica per tociar el cul.
Cedo la parola a Donatella...
Caro el mio Velan, ghe devo dir che senpre iera e senpre sarà cusì. I richi sarà senpre più richi, e i poveri sarà senpre più poveri. Xe un pò come dir: "El xe nato disgrasià e disgrasià el morirà".
Me ricordo benisimo co in Italia xe rivà l'euro. Quel che el giorno prima ti pagavi diecimila lire, el giorno dopo xe diventà dieci euro. Senplice. No ocoreva portarse drio la calcolatrice, sconbater con calcoli e inpinirse la testa de numeri.
Inprovisamente tuto iera diventà più caro. Per un periodo, perfin, no andavo più a far la spesa a Trieste. Squasi me pareva che la stesa roba qua de noi la costava de meno. Andavo giusto per el gusto de andar, per mantignir le vecie abitudini, bever un cafè, conprar due monade e via.
Me ricordo che in Italia per un bel pò de tenpo noi rivava a bituarse al euro. In television vardavo i gioghi a premi con Paolo Bonolis e per mesi el diseva el inporto de la vincita prima in euro e poi el diseva quel che sto inporto valeva in lire (per dir el vero el ciamava la lira "vecchio conio").
E ben, uguale sarà anche qua de noi, ansi, sa ga comincià. Me par che xe tuto rincarà e che la borsa de la spesa xe ancora più picia de quel che la iera prima. Che no parlemo poi de la confusion kune-euri. Par a momenti che no ti capisi più niente.
A ma, vedaremo, ma non me la vedo bona.
