Čentrini i lancuni

Piše Fedora Kraljić

Čera san upalila televižjon. Jušto na sjednicu Sabora. Flenković je ništo spominja INU i MOL, a kako san ja više za DUR i veselo, zajno san stisla volume i smanjila do kraja da ga ne slušan.

Još san niko vrime gledala u televižjon i san ošervala da je čentrin nikako na krivo. Zračunala san opseg i površinu čentrina, zbrojila z dijagonalon televižjona, multiplikala z dva, zračunala kvadrat zgor hipotenuze i namistila ga jušto u sredinu. Na Saboru su se svadili, vidila san njin po faci. Nisan palila volume da mi srića ne shlapi. Bila san kuntenta perke san danaska već načinila više nego oni. Šilencija je popunila kamaru...

Uni hip je u hižu uletija Bepo. Vrajža ura, je reka Bepo. Ča je bilo, san rekla ja. Počeja je "Dojdi u grad", je reka Bepo. Vrajža ura, san rekla ja. Finalmente su turišti pasali, sad će nan ovi tote šušurati i rompati. Šilencija se pobrala iz kamare, iz grada, iz života. Bepo i ja smo se zapensali...

Ma, danaska mi je hodila matematika i san zbrojila dva i dva, san znala ča rabi činiti. Zami Jupol, pinel i jedan lancun, san rekla Bepu. Ja ću donesti dvi štipalice i ćemo napisati i na balkon zavisiti "Hoj iz grada".