Šahovski komentar

Piše Fedora Kraljić

Čera san upalila televižjon. Jušto na reklame. Vajk kad su reklame Bepo se gre razkrečiti, ma čera je napeja uši; su reklamirali akcije u butigama.

Vajk kad su akcije u butigama Bepo zame lapiš i zapiše di ćemo si ča priškrbiti z našin mižerijama od penzije. Čera ni puno zapisa. Kad su finile reklame je počela moja najdraža emisija - Šahovski komentar.

Na početku emisije ja zamislin da san jena figura, perženpijo kraljica. Okolo mene su zrmani, šantule i susedi (oni pravi). S druge bande su zrmani, šantule i susedi (oni poredni). 

Nike pute su tamo i guverner banke, turišti, inflacija, šjora Nevija, Flenković i prešidente. Tako je bilo i čera perke su me razjadili. Samo se svade i niš ne delaju. Partida je bila dobra - pravi zrmani su jili poredne, šantula je skakala na sve bande, E7, G6, H4, a ja san šla zgorun zdolun i poklopala san Neviju i ča je ustalo. Pokle partide vajk mi bude tako lipo, mi bude kako nika katarza...

Pokle šaha smo obrnuli na Dnevnik. Flenković i prešidente su se svadili ki je više ruski čovik. Bepo je opet napeja uši, a ja san znala da je štešo. Jenega i drugega će na G7 u šes poteza poisti moja šantula. Srića u nesrići njin je da to ni moja šantula z Putini, perke je ona na onoj bandi di su poredni.