ADIO A GIGI RIVA: Un giogador e un galantuomo de altri tempi, el ga fato el nido in tel' anima dela gente

Tuti xe destinai a morir. Anche i personagi publici e famosi. Gavemo xa fato el calo. Epur, tra questi personagi xe certi che co i parti per sempre se sentimo come se i ne gavesi portado via una parte de noi, quela parte del nostra vita pasada che, insucherandola come che capita sempre con la nostalgia, la ne par più bela, pura, inocente, come un momento dela nostra esistensa co davanti de noi, come che diria el cantautor Francesco Guccini, “è tutto ancora intero”.

El giocador de bala Gigi  Riva, morto ieri  a 79 ani, iera uno de questi personagi, un de quei che i gaveva fato el nido dentro de noi. Anche de noi, istriani che semo cresudi guardando la televison taliana. Con Corrado, Raffaella Carrà, Alberto Sordi, Vittorio Gassman, Ugo Tognazzi, Paolo Villaggio, Anna Magnani, Fabrizio De'Andre, Lucio Dalla, i giornalisti Maurizio Costanzo, Sandro Ciotti e Piero Angela, tanto per far pochi dei tanti nomi che i ga modelà el nostro imaginario, Gigi Riva iera uno dei quei che i valeva anche oltre del mestier che i faseva: i iera i simboli positivi de un'epoca, modei da imitar, l'ispirazion per refarse, anche noi, in meo.

Nei ani Sesanta, Setanta e in tei primi ani Otanta ierimo tuti più ingenui, magari creduloni, meno scetici, ma pieni de voia de entusiasmarse. In un’Italia che nel 1968 la comincia a far i conti con le proteste e le lote studentesche, sindacali, comuniste e neofasciste in strada, la vitoria al Campionato europeo de calcio in finale contro la Jugoslavia, con el primo dei due gol segnà da Riva, la iera come una spunta de vitamine.

foto: Facebook Sardegna Punto Radio

Dopo che nel 1969, con la strage de Piazza Fontana, in Italia comincia la triste stagion del terorismo e de la “strategia della tensione”, la vitoria in semifinale con la Germania per 4-3 ai Mondiali del Messico del 1970 la xe stada visuda come una grande festa nazionale. Anche in quela partida, considerada una dele più bele de tuti i tempi (nel 1990 el regista Andrea Barzini ga fato un film intitolado proprio “Italia- Germania 4-3”), Gigi Riva el ga segnà un gol, quel del 3-2 per l'Italia. In quei ani la sequenza de nomi dei giogadori Riva-Rivera-Mazzola la iera come un verso de una preghiera laica, uguagliada solo da quela che xe vegnuda poco più tardi “Zoff-Gentile-Cabrini…” .

Ma esisteva un'altra sequenza de nomi ancora più „miracolosa“, la „Domenghini-Nenè-Riva” de quel Cagliari che nel 1970 el ga vinto el campionato italian de calcio. Se no volemo considerar Bologna e Firenze come cità de provincia (el Bologna ga vinto el scudeto nel 1964, la Fiorentina nel 1956 e 1969) el Caglliari xe stada la prima squadra provinciale, autsaider asoluto, a vinser el campionato dopo la fine della seconda guera mondiale.

In Italia, con squadre come la Juve, el Milan, l’Inter, la Roma, el Torino, el Napoli e la Lazio, tute de grandi cità, rivar primi xe un impresa miracolosa. Oltre al Cagliari ghe la ga fata solo el Verona nel 1985 e la Sampdoria (con quel che Genova xe una cità grande) nel 1991.

foto: Facebook Sardegna Punto Radio

Luigi Gigi Riva, che el famoso giornalista Gianni Brera ga ribatezà „Rombo di Tuono“ perchè el iera svelto come una saeta e col ghe dava una piada al balon lo faseva svolar a cento a l'ora, el iera nato a Leggiuno, in provincia de Varese, el 7 novembre del 1944. Dopo gaver lavorà per poco tempo in una fabrica de saliscendi, el ga comincià giogar la bala in Lombardia e là el gavessi volù tornar quanto prima dopo che a 19 ani i lo gaveva mandà a Cagliari dò che 'l xe 'ndà controvoia. Quela volta la Sardegna no iera, come che la xe adeso, una meta turistica d'elite, ma un logo dove che se mandava i militari per castigo, un'isola de pastori considerada aretrada e de starghe ala larga.

Xa el primo ano, in Serie B, Gigi Riva el ga segnà 26 gol diventando determinante per la promozion in Serie A.  Invesse de tornar in Lombardia, Riva el se ga inamorà dela Sardegna, de Cagliari e del Cagliari, cusì el xe restà per altri 13 ani (12 in serie A, l'ultimo in Serie B) segnando 170 gol in 338 partide. Zero tatuagi su brassi, el xe sta tre volte capocanonier dela serie A e tre volte dela Copa Italia.

foto: Facebook Sardegna Punto Radio

Ma oltre a eser l'eroe del Cagliari, Riva xe sta anche l'idolo della nazionale italiana. Ancora oggi el xe el giogador che ga segnà più gol con la maia „azzurra“: ben 35 gol in sole 42 partite, meo dei mitici Meazza (33) e Piola (30), ma anche de Baggio e Del Piero fermi a 27. Co se guarda questi dati bisogna tener conto del fato che ai tempi de Riva la nazionale giogava sai meno partite e, inoltre, lui ga subì due gravisimi infortuni (roti i osi e sbregai i legamenti dele gambe) contro el Portogallo nel 1967 e contro l'Austria nel 1970 che i lo ga fermà per lungo tempo. Lo steso, basta guardar la media dei gol a partida: Riva 0,83, Baggio 0,48  Del Piero 0,3. In quanto a media, meo de Riva ga fato solo Silvio Piola, 30 gol in 34 partide per una media de 0,88 gol a partida. Impresionante, Cristiano Ronaldo xe fermo a 0,60, Messi a 0,77.

Ma xe un'altro fato che rendi Gigi Riva un omo e un galantuomo de altri tempi. Anche se la Juventus ghe ofriva miliardi, lui ga volù restar a Cagliari, fedel ai Sardi che el ga comincià a ciamar „la mia gente“. Ghe piaseva andar pescar con el popolo semplice del posto, ghe piaseva pasegiar normalmene per el centro de Cagliari, cità indò che el ga anche cresù i sui fioi e dò che el xe restà viver fin la fine. Eco coss' che 'l ga dito dei Sardi: "La Sardegna mi ha dato affetto e continua a darmene. La gente mi è vicino come se ancora andassi in campo a fare gol. E questa per me è una cosa che non ha prezzo". Insoma, la „piccola vedetta lombarda“ la xe diventada „el tamburino sardo“. Piero Marras ghe ga dedicà la canson "Quando Gigi Riva tornerà" e fra poco anche el stadio del Cagliari porterà el suo nome.

In Italia Germania 4-3 per i Tedeschi giogava anche Franz Beckenbauer, morto el 7 genaio, due setimane prima de Riva. Deso, in ciel, i gaverà de cosa parlar, da amici.