ADIO A LINDA MILANI: La maestra de cori dei fioi la gaveva una marcia in più, la xe stada una dele autetiche bele storie de Pola

Questo nostro portal giornalistico (ma anche i altri istriani) ieri, giustamente, ghe ga dedicado un in memoriam a la brava maestra de coro, la Polesana Linda Milani che la ne ga lassà l’altro ieri a l’età de 72 anni. Ma, gavendola conossuda, semo sicuri che a la Linda, nata Bonassin ghe gavessi piasso se ghe dedichemo un pensier anche in tela sua madrelingua, el dialeto polesan.

Basta leger i vari comenti e le condoglianze scriti dai letori per capir che la Linda la iera una persona speciale. “Xa de picia la gaveva una marcia in più”, ga scrito una letrice, “la sua xe stada una dele poche storie veramente positive de Pola”, ga comentado un altro; “grazie per gaver impinì de gioia la mia infanzia”, ga scrito una signora che evidentemente de picia la ga fato parte de uno dei cori direti da Linda Milani.

Per tanti de noi, che per anni gavemo guardà el festiaval de canzoni per fioi “Lo Zevchino d’oro” (quel del Mago Zurlì), Linda Milani la iera una specie de Mariele Ventre polesana, la maestra del coro de l’Antoniano de Bologna che gavemo visto cussì tante volte in television. Tute due piene de energia, instancabili, carighe de amor per i fioi, convinte che la musica, l’arte e la creatività li gavessi iutai a cresser meo.

Nata a Pola, dove che in in italian la ga finì el ramo musicale de l’ex Academia de pedagogia, Linda Milani la gaveva comincià lavorar in tela scola de musica de Parenzo, per poi torar a Pola dove che la lavorava prima in tela scuola de balo per fioi e poi in tel coro “Bambi” in tel ex Pionirski dom.

El punto de svolta xe capità in tel 1991 co’, con Slavica Šenk che la se gaveva ciolto la parte del balo, la Linda Milani se ga messo in gropa la parte musical del novo Studio Zaro. Da quel momento in poi no ghe xe stade che sodisfazioni e successi. Centinaia dei fioi in stel Studio Zaro -  indò che se cantava, se andavai ai spetacoli e se iera contenti -  i ga trovà una specie de seconda casa. L'interesse de fioi e genitori xe sta cusì grande che xe nata tuta una serie de cori, dipentemente de l'età dei pici: Mići Zaro, Zaro, Zaro XL i Zaro senior e, tuti insieme (esclusi i più pici) el GrandZaro.

Che el Studio Zaro el sia sta da subito percepido come qualcossa de speciale lo dimostra le colaborazioni con tanti mucisti famosi (almeno in Istria) che i ga volù lavorar con i cori dei pici direti da Linda Milani. I primi xe stai el cantautor Franci Blašković e sua moglie Arinka Segando Balšković, ma poi tanti altri come el cantante Tony Cetinski, el musicologo Dario Marušić, el violinista Sandro Peročević, ma anche gente de pena come Daniel Načinović, Mario Benčić e Rita Scotti Jurić, o designer e ilustratori come Predrag Spasojević e Nadan Rojnić.

Ma no basta. El studio Zaro el ga colaborà anche con i grandi nomi dela musica legera croata come Oliver Dragojević, Gibonni, Severina, Danijela Martinović dei Magazin, Petar Grašo. Ma el massimo xe capità il tel 2003 co i fioi del coro Zaro in arena i ga cantà l’ino istrian „Krasna zemljo“ insieme col famosissimo tenor Placido Domingo e la soprano Elisabeta Matos.

Brava, empatica, entusiasta, piena de voia de far, Linda Milani la ga lavorà coi fioi per 48 anni, regalandoghe a tuti lori be e cari ricordi.

Fia de Uccio Bonassin, che el cantava in tel coro dei omini dela Lino Mariani, la Linda Milani la ga direto el coro dei omini, sia el coro misto dela SAC indò che de mula la sonava anche ela. In questa foto dela mandolinistica se la vedi a destra che la sona la pianola, de drio del maestro Vittorio Jes.

Ieri xe sta un giorno triste per la musica. A tarda de sera de sto venerdì co' semo vegnui a saver dela scomparsa de Linda Milani, xe rivada anche la bruta nova dela morte de Ornella Vanoni. La gaveva 91 anni. Anche se la ga avudo una cariera lunghissima (se la vedeva fin a poco tempo fa in television, co la ne ga dmostrà che oltre a esser una brava cantante la iera anche simpatica, inteligente e sgaia), el grande succeso la lo gaveva avudo in tei anni Sessanta e Settanta, al fianco dele altre cantati italiane  famose a l'epoca come Mina, Patty Pravo, Milva, un fià doo Mia Martini e, su altre note, Marcella Bella, Gigliola Cinquetti, Orietta Berti...

Colaborando con grandi muscisti e grupi, in quei anni là la ga inciso canzoni che le ga fato la storia dela musica leggera italiana: „Che cosa c'è“ e „Senza fine“ composte da Gino Paoli, “Domani è un altro giorno” con testo de Mogol, „Eternità“ con i Camaleonti, „Io ti darò di più“, „Una ragione di più“, „ La musica è finita“, “Ma mì (La porta de San Vittore”. Ma forsi xe ancora più famose le canzoni rielaborade da originali brasiliane:  tra le tante xe le famosissime de Roberto e Erasmo Carlos „L'appuntamento“ con testo italian de Bruno Lauzi e „La voglia, la pazzia, l'incoscenza, l'allegria“, ma anche „Tristezza“ de Haroldo Lobo e la meravigliosa „Dettagli“ de Toquinho.

Gran bruto giorno ieri, semo restai sensa due grandi signore dela musica.