AVANTI POPOLO Che bel boicotagio! Giorgio Gaber cantava "libertà non è star sopra un albero, libertà è partecipazione"

Dopo anni e anni de anestesia coletiva de l’impegno sociale, procurada da un indormio fato dai lustrini del consumismo scoperto dopo cinquanta anni de boteghe svode socialiste, el popolo el se ga finalmente sveià.

Ieri xe sta el giorno del boicotagio dei supermercati e dele boteghe del magnar, e xe stada una protesta contro i prezi alti andada in porto anche meo del previsto. Stando ai dati che circola, ieri le boteghe le ga incassado tra el 46 e ‘l 53% dei soldi che geralmente spendemo de venerdì per la magnatica. E xe de dir subito che no ghe xe stada nissuna forma de compensazion, perché el giorno prima gavemo speso solo el 6% in più de giovedì 16 genaio e  i dati de stamatina no i mostra un assalto ale boteghe per recuperar quel che la gente no ga comprado ieri, ma adiritura un 15% in meno de spesa rispeto a sabato 18 genaio.

Le zone in cui la gente ga boicotado del più xe stade quele della Slavonia (50-55%), in genere le più povere. Una media soto quela nazionale (del 46 %) la xe stada registrada in tei loghi in cui la gente sta un fià meo tipo in Istria (46%), nella Contea litoraneo-montana e a Zagabria (43%). Xe numeri importanti, tanto che anche la più grande agenzia giornalistica italiana, l’ANSA, la ga scrito del nostro boicotoagio.

In Croazia, dopo che xe rivà de l’Euro, i prezi de trope robe i ze schizadi in alto. Sarà anche vero che in totale, in base ai dati uficiali, l’inflazion xe stada del 10% nel 2022, de l’8% nel 2023 e del 3% nel 2024, ma xe ancora più vero che gavemo davanti ai oci prezi che i se rampiga sai più in alto de quel che dixi la statistica.  In altre parole, in base ai numeri uficiai, quel che nel 2021 gavessimo pagado 10 euro oggi mediamente lo paghemo 12,23 euro, ma la vita de ogni giorno ne dixi ben altro. In tel rion de Pola indò che stago mi, prima de l’euro un krafen (lo stesso val per una biga de pan francese) lo pagavo 4 kune, ogi el costa 1 euro (7,5 kune), u caffè macchiato 6 kune, ogi 1,9 euro (14,25 kune), 1 chilo de risi 11 kune, desso 3 euro (22,5 kune). Sta roba vol dir che per certi articoli, anche de largo consumo, con l’euro i prezi i xe andai su del 50, 60 e anche del 100%. Altroché inflazion al 3%! Prima con 100 kune in scarsela ti te sentivi sicuro, ogi con 15 euro te vien de pianser.

Legevo in giro in tei vari comenti su Feisubuc che el boicotagio no'l gavessi senso perché el saria infantile, che i prezi no se li pol calar perché sora ghe sta l'IVA (PDV) che la ghe va al stato, e al stato ghe ocori sai IVA perché ghe servi um sucio de schei per mantegnir tuto el suo aparato burocratico de funzionari, dipendenti publici e auti blu. Qua però bisogna dir che el boicotagio, partido dal grupo Feisbuc "Halo, inspektore" del Centro europeo per l'eccellenza dei consumatori / Europski centar izvrsnosti potrošača (ECIP), apogiado anche dale associazioni dei consumatori, dai sindacati e dai partitidi, el xe sta visto ben anche dal ministro de l'economia, quasi a romper quel „asse del male“ fato generalmente da governo-banche-aziende grande.

Go leto anche che le boteghe le lavora con margini de guadagno del 3 o 4% e che no le gavessi più come e da dove calar. Però bisogna dir che el margine comerciale (la diferenza tra quanto che i paga e a quanto che i vendi un prodoto) el va tra el 25 e ‘l 50% e xe da veder quanto che i meti de costi fissi e variabili (paghe, trasporti, corente eletrica, afiti, amortamenti, reclam, riserva) per rivar a calarse fin al margine de guadagno che saria el margine comerciale diminuido dei tuti i costi fissi e variabili della kalkulacija, che saria el calcolo che se servi per formar i prezi de vendita al detaglio.

Certi ga scrito che se dovessi boicotar sempre e andar a far la spesa a Trieste. Bon, mi Trieste me piasi, ma la question xe un'altra: per mi una dele robe tristi per un stato xe co la sua gente la devi andar in un altro stato per pagar de meno generi de prima necessità, e xe ancora peso co i citadini de quel stato i ga no solo prezi più bassi, ma anche paghe e pensioni più alte.

Ma, a parte i calcoli, quel che me par importante xe el fato che el popolo el se ga sveià e reso conto che no semo suditi ma citadini con dirito de parola, de protesta e de partecipazion a tuto quel che xe vita publica. Giorgio Gaber cantava che “la libertà non è star sopra un albero, non è neanche avere un'opinione, la libertà non è uno spazio libero, libertà è partecipazione".

Soto el comunismo se gavemo dimenticà coss'che xe la protesta civile: i sindacati i iera saporiferi perché protestar contro un sistema (el socialismo autogestito) che el se autodefiniva perfeto saria sta una sapada sui pìe, una specie de “contradictio in adjecto”. Poi, al principio dei anni Novanta, el popolo el xe andà in piazza solo per proteste nazionali e nazionalistiche, ma anche in Ocidente i sindacati, dopo le grande lote e vitorie tra i anni Cinquanta e i anni Setanta, i xe stai anestetizai prima da l’edonismo reaganiano, poi dala suoerficialità del postmodernismo relativista.

A Pola, una primo ritorno del popolo xe stado quel del otobre del 2022, co 11.065 persone (el 22,71% dei Polesani) i ga risposto al referendum contro l’albergo al Lungomare. Ieri el boicotagio xe sta grande, tanto che i parchegi dei centri comerciali i iera quasi svodi,  con le boteghere che le diseva de no gaver mai visto una roba simile e i scafai pieni de roba no venduda.

Se porterà a casa qualche risultato?  Brayden King della Kellogg school of management el ga studiado i casi de 133 boicottaggi fati tra el 1990 e 'l 2005 fininido per scoprir che che un quarto delle aziende boicotade poi le ga cambado el proprio comportamento.

Resta el fato che el boicotago xe una forma de protesta de forte peso popolare. Basti pensar al caso capitado coi neri a Montgomery (Alabama) in America nel 1955: dopo che Rosa Parks la iera stada arestada per no gaver volù lasarghe a un bianco el suo posto in coriera, tuti i neri i ga boicotà i trasporti publici per ben 381 giorni (con dani gravi per le imprese trasporti), fin che no xe stada abolida le lege sula segregazion tra le rasse.

Ogi se registra casi de boicotagi “etici” contro le aziende che no le produci rispetando i limiti imposti dale regole ecologiche, ma anche boicotaggi de destra, come quel contro la Bud Light, la più famosa bira americana, perché el marchio el colaborava con un influencer transgender. Afari sui, noi dovemo pensar al nostro boicotagio e dir de novo “avanti popolo”!