CO L’IDROVOLANTE GA TIRÀ XO SANT’EUFEMIA DAL CAMPANIL DE ROVIGNO: Nel 1936 un roplan xe andà a sbater sula statua dela santa che la xe stada rimesa a posto anche da un Rovignese che el xe saltà xo dal ponte de Brooklyn a New York

Co gnanche un mese fa go scrito de l’idroscalo de Pola, bombardado e distruto nela seconda guera mondial, gavevo trovà un dato storico che non conosevo per niente: in un forum triestin de amanti de l’aviasion gavevo leto che nel 1936 un picio aparchio el iera andà a sbater contro la statua de S. Eufemia a Rovigno per poi cascar in mar, provocando due morti.

Sicome no gavevo trovado altre conferme, sta nova la me gaveva insospetì, specialmente perché in sto forum scriveva anche che una dele due persone morte iera el cavalier Pietro Bonetti, presentado come “fondatore e proprietario della Pasta Zara”.

Mi me riʃulta, invese, che el fondator dela pasta Zara saria Emanuele Bragagnolo che nel 1898 el gaveva verto un picio laboratorio che nel 1918  el diventa Pastificio Elettrico Bragagnolo con sede a Castelfranco Veneto. Vero xe anche che nel 1932, Umberto Bragagnolo, fio de Emanuele, el ga verto a Zara una filiale con el nome de Pastificio Adriatico e che nel 1965, proprio per ricordar l’esperiensa in Dalmazia, el pastificio Bragagnolo, spostado nel fratempo a Riese Pio X (sempre in Veneto)  el cambia nome  in Pasta Zara.

foto: www.fondazionevincenzoagnesi.it

Pietro Bonetti, che purtropo el ga perso la vita a Rovigno, no 'l iera proprietario ma uno dei dirigenti (forsi anche azionista) del Pastificio adriatico.

Ma tornemo al roplan.

Per fortuna, o almeno per fortuna de quei che ghe piaʃi la storia de l’Istria, gavemo el Centro de Ricerche storiche de Rovigno. El bravo bibliotecario Nicolò Sponza me ga segnalà che nel numero 80 de la “Ricerca” (una delle edisioni del CRS) xe sta publicà l’articolo de Diego Han “S. A. Ala Littoria – la sciagura aerea di Rovigno del 1936”. E la conferma xe rivada.

foto: La ricrca, CRS

Per via dela nebia, l’idrovolante Cant 22 I-ALFA "San Sergio", in volo da Trieste a Zara, verso le 9 de matina el xe andà a sbater con l’ala sinistra sula statua de S. Eufemia che la stava (e deso la sta de novo) sul campanil del Duomo de Rovigno, in cima al “monto”.

Per el pilota iera sai poco cosa far: l’idrovolante el iera diventà ingovernabile, cusì el xe cascà in mar. I Rovignesi, specie i pescadori,  i palombari e i lavoradori del porto i xe corsi subito in aiuto e i ga rivà salvar el secondo pilota Carlo Pentasulla, el radiotelegrafista Francesco Pedrini, el “picio” de bordo che de cognome el faseva Vesnaver.

Per el pilota Francesco De Piero e l’industrial Pietro Bonetti de Zara no iera più niente de far, i iera morti sul colpo. La posta e altre mercerie che se trovava a bordo le xe stade invesse recuperade.

L’idrovolante Cant 22 I-ALFA "San Sergio" come quel che 'l x andà a sbater sula statua de S. Eufemia - foto. Facebook Idrovolantiitalia Idroscaliitalia

Dario Han, che el ga controlà i giornai de l’epoca, el riporta che i Rovignesi i xe resta sai scosi da sto triste fato e due giorni dopo in tantisimi i ghe ga fato onor ai morti parecipando al funeral. Poi la salma del pilota la xe stada trasportada a Pordenone, la che el iera nato, quela de Bonetti, con la nave “Morosini” la xe stada portada invese nela sua Zara.

Dopo l’urto con l’ala de l’idrovolante la statua de Santa Eufemia la xe cascada xo e con el suo peso la ga anche sfondà el teto della ceʃa. Dopo eser stada restaurada dala dita Daciano Colbacchini de Padova, la xe stada rimesa al suo posto nel luglio del 1938: tra i artigiani che i gaveva preparado la piataforma per tirarla su iera anche Giovanni Sponza che sete ani prima el iera saltà dai sesanta metri de altesa del ponte de Brooklyn a New York, sensa farse mal.

La statua in bronzo de Sant’Eufemia, fata a Maniago in Friuli dai fradei Vincenzo e Giovanbattista Vallani,  la sta in cima al campanil dal 1758: prima al suo posto stava una statua de legno foderada in rame, fulminada nel 1756 da una saeta. La statua la xe poʃada su un perno che la fa girar e in questo modo la indica anche la diresion de do’ che sufia el vento.

foto: PIxabay

Ogi par strano leger che Trieste e Zara le gaveva un colegamento aereo con l’idrovolante. Epur, nei ani Venti e Trenta de l’altro secolo, l’idrovolante el vegniva sai usado. Xa nel 1921 la famiglia triestina Cosulich, originaria de Lusin, la gaveva verto a Portorose la dita S.I.S.A (Società italiana Servizi Aerei), nel 1923 i Fincantieri de Monfalcon i comincia produr i roplani per l’acqua e nel 1926 avien el primo volo comercial de un idrovolante sula rota Trieste Torino.

El 28 otobre del 1934, inglobando varie dite private tra le quali quela dei Cosulich, vien fondada l’azienda statale Ala Littoria che oltre a colegar l’Italia anche con l’Africa, la meti in moto anche tre colegamenti adriatici: due volte la setimana iera operativa la linea Trieste- Pola-Lussinpiccolo-Zara-Lagosta-Durazzo-Brindisi e, ogni giorno esclusa la domenica, la linea Trieste – Pola- Lussinpiccolo- Zara – Ancona e la linea Fiume-Pola-Venezia.

L'idroscalo de Pola, distruto dale bombe el 9 genaio 1944 - foto: tibor-pula.bloger.hr

In dicembre l’autorità portuale de Pola la ghe ga da ale Marine ACI una concesion de 10 ani proprio per far ripartir da Pola i roplani idrovolanti. Speremo che l’idea la vada in porto, no solo per colegar meo la costa ma anche perche veder l’Adriatico da l’alto, che con tute le isole croate e la forma a stival de l’Italia, xe proprio un gran spetacolo.