DUE POLESANI PROFESSORI A L'UNIVERSITÀ DE PADOVA: Egidio Ivetic e Mauro Sambi docenti là che ga insegnà Galileo e Copernico

In tel Palazzo Bo, sede de l’Università de Padova, tra la metà del Cinquencento e quasi la fine del Seicento, nele logie, nella corte antica e in varie sale xe sta colocai i stemi dei rettori, consiglieri, profesori e studenti de quela università.

Ben, tra oltre tremila stemi (nel 1688 el governo de Venezia el ga vietà sta pratica perché ghe ne iera tropi) xe anche quel de l’Istria. Infati, Padova xe stada per secoli l’Università de riferimento per i Istriani e i Dalmati che i podeva permeterse de andar studiar. L’elenco de questi “scholares” el saria lungo, tanto che xe sta anche publicado un libro intitolado “Studenti istriani e fiumani all’Università di Padova dal 1601 al 1974”.

Se limitimemo, alora, ai profesori. Xe noto che ‘l Capodistrian Santorio Santorio (1561-1636), el dotor che ‘l ga inventà el termometro e altri strumenti per la medicina (per un certo periodo l’ospedal de Pola el ga portà e suo nome), el xe sta profesor a Padova a partir dal 1611. A l’Università de Padova xe sta profesor anche el grande iluminista Gian Rinaldo Carli  (1720- 1795.), anche lui nato a Capodistria. El insegnava nautica e astronomia.

Questa tradision de profesori istriani a Padova nel XXI secolo la xe stada ingrumada da due Polesani: Egidio Ivetic (1965), che insegna Storia dell’Europa orientale dal 1999, Storia moderna dal 2014 e Storia del Mediterraneo dal 2018 e Mauro Sambi (1968) che a Padova el insegna Chimica Generale e Inorganica.

Tuti e due i ga mostrà el suo valor xa durante e ala fine dei studi: Mauro con la sua tesi de laurea nel 1993 el ga vinto el premio Tesi Enichem (e nel 1997 el vinzerà el Premio per la miglior tesi di dottorato dela Divisione di Chimica Inorganica della Società Chimica Italiana), Egidio, invesse, nel scriver la tesi, el ga scoperto el raporto Discorso su Pola scrito nel 1625 da un certo Pietro Matteacci, esperto de robe de guera, che xe sta la base per costruir el forte venezian sul castel de Pola nel 1631.

L’elenco dei premi che i ga vinto tuti due el xe lungo: per Ivetic segnalemo el Premio Roberto Cessi dela Deputazione di Storia Patria per le Venezie (Cessi iera uno dei massimi studiosi de la storia de Venezia), per Sambi el Young Scientist Award al Winter Workshop on Photoelectron Diffraction,  vinto a in America, a Scottsdale in Arizona.

Per no dir dele funzioni. Mauro Sambi, tra l’altro, el xe Coordinator Scientifico della Biblioteca di Chimica "Cesare Pecile" e membro del Comitato Editoriale de l’editor Padova University Press, Egidio Ivetic xe diretor de l'Istituto per la Storia della Società e dello Stato Veneziano dela presigiosa fondassion Giorgio Cini a Venezia,  dove che ‘l dirigi la collana  “Studi Veneziani”. Poi el xe membro de varie academie: Accademia Galileiana di Scienze, Lettere ed Arti a Padova,  Accademia dei Concordi a Rovigo, socio efettivo de l'Istituto Veneto di Scienze, Lettere ed Arti, Venezia.

Mauro Sambi el scrivi le sue ricerche in inglese, Egidio Ivetic in italian, tanto che el colabora anche con el Centro de Ricerche storiche de Rovigno. Tra i tanti bei libri che ‘l ga scrito, per noi sai interessanti, segnalemo “L'Istria moderna (1500-1797). Una regione confine”, “Storia dell'Adriatico. Un mare e la sua civiltà”, “I Balcani. Civiltà confini, popoli (1453-1912)”, “Il grande racconto del Mediterraneo” e, sto ano”, “Studiare la storia del Mediterraneo”. Sti ultimi ghe li ga publicai “Il Mulino”, una dele più prestigiose case editrici italiane.

Bisogna anche dir che sai volte i lo ciama in television, a la Rai o altre TV nazionali taliane, co ghe servi qualche d’un che ghe parli de l’Adriatico o che ghe spieghi el gropo dei Balcani.

De Mauro Sambi bisogna dir anche che el xe un omo de tanti talenti e passioni. Anche se de mestier el xe praticamente un scienziato, da sempre el xe no solo amante, ma anche grande conossidor de la poesia, tanto che, per dileto, el traduci in italian le poesie de Shakespeare. E no le xe scrite in tel inglese de ogi, ma in una lingua de quasi 500 ani fa che la gaveva regole tute sue.

Xa nel 1998, con la racolta de poesie “Di molte quinte vuote” el ga vinto el Premio Città di San Vito al Tagliamento, nel 2009 l’Edit de Fiume ghe ga dà ale stampe el libro “L’alloro di Pound” (Poesie 1994-2009). Poi el ga publicà poesie in Italia: nel 2015 “Diario d’inverno”, nel 2018 “Una scoperta del pensiero e altre fedeltà”, nel 2020 “Quel tanto nella voce. Poesie 1994-2020”. E poi el ghe tien sai ala leteratura prodota in italian in Istria che el presenta nel blog leterario Cartesensibili. El fa anche parte del comitato de redazion dela rivista “In aspre rime” de l’editor Campanotto, el colabora con la rivista leteraria Filigrane.

Tuti due, Ivetic con la storia e Sambi con la leteratura, i promuovi el dialogo tra le due sponde de l'Adriatico.

Se pensemo che a l’Università de Padova ga insegnà anche Galileo e Copernico, dovessimo esser sai orgogliosi de gaver ogi, drio quele catedre, due bravi Polesani, ex aluni dela "Giuseppina Martinuzzi".