EL MAR XE LA SUA TERA: Simone Mocenni Beck e 'l suo libro blues "La ballata di Assante"

Simone Mocenni Beck, nato e vissù per sai tempo a Milano ma ogi residente a Pola (e a Pola, da quando che ‘l iera picio, con el papà Walter, la mama Aliza e i fradei Riccardo e Alessandro, el ga passà ogni estate a Stoia) el ga scrito un novo romanzo. El se intitola “La ballata di Assante”.

Ma, più che al suo libro “Ginestre sulla costa: trilogia di Pola” del 2006, indò che Pola xe protagonista (come in tel libro de suo fradel Alessandro “Il giro di Stoia”del 2024), ‘sto novo testo de Simone, scrito ai tempi del Covid, el ghe somiglia de più al suo romanzo “L’ultimo giorno del passato” (2011). Questo perché, anche se tante robe anche stavolta le capita a Pola e Stoia, (el personagio principal Assante da quando che el iera picio el iera restà afascinà dal relito dela nave Santiago afondada in tel porto de Pola), stavolta se torna andar in giro per mar a tute le latitudini e longitudini.

Ma no xe un semplice libro de aventure, xe un libro carigo de paesagi (de mar e tere, del sol e de nebie), de profumi (rosmarin, salvia) e de rumori (le cicale, le onde che le sbati sule grote e sui fianchi dele navi) e che ‘l parla de emozioni, de sensazioni, de tormenti e de speranze, de “omini segnai dala vita che i se ga anche dimenticà che un tempo i ieria stai contenti”. Xe un libro in cui el mar xe sia sfondo, sia protagonista. Anche perché, come che ga dito Simone, “il mare è la mia terra”.

Non ve farà la cronaca dela presentazion de libro, che la xe stada fata venerdì sera ala Biblioteca civica de Pola, dove che a parlar, in modo interessante, de Simone e del suo libro xe stai Liana Fortunato Diković e Vito Paoletić, con Simone a verser le danze sonando el pianforte. Ve parlerò invesse del titolo del libro.

Xe de saver che la balata, con la canzon, el soneto e ‘l madrigal, xe una dele quatro forme metriche clasiche dela poesia italiana. Per certi versi, la sarìa una canzon fata per el balo, pe le danze. Dopo un ritornelo che ‘l vien subito a verserla, la balata la ga la strofa (dita “stanza”) e un’altra parte che la xe ciamada “ripresa” che la vien ripetuda, posibilmente da un coro, dopo ogni strofa. Per quel che riguarda el contenuto, la sera (chiudi) el cerchio, come una specie de dichiarazion o sentenza.

Da questo punto de vista, ala balada ghe somiglia el testo, ma anche la strutura musical, dela musica blues. Per quel che riguarda el testo, se parla de storie in cui xe sempre presente el dolor, che no’l vien sconto, ma el vien cantà o contà. El schema metrico dela balada el ricorda sai de vicin el schema armonico dela musica blues. In tel blues, dentro a dodici batute xe diverse struture (AAB, ABC, AABA), ma per farla semplice vedemo qualche esempio, cioghendo in considerazion quela più semplice, la AAB. La prima A xe quel che se disi, la seconda A la raforza quel che se disi, la B xe la risposta, la soluzion.

Eco come che fa Robert Williams in tela famosissima canzon “Sweet home Chicago”.

A         Oh, baby, don't you want to go?
A         Oh, baby, don't you want to go?
B         Back to the land of California, to my sweet home Chicago

opur i Doors, co in “Rodhouse blues”Jim Morrison canta

A         Well, I woke up this mornin' and I got myself a beer

B         Well, I woke up this mornin' and I got myself a beer

B         The future's uncertain and the end is always near

e finimo con una in italian, inventada de sana pianta

A         Son solo in meso al mar, son cascà xo dela nave

A         Son solo in meso al mar, son cascà xo dela nave

B         Tera fate veder, se no stavolta la xe grave

Tuto sto divertimento per dirve cossa? Che el novo libro de Simone Mocenni Beck – che non per niente el xe anche musicista -  el xe scrito proprio cussì, come un blues: de A ghe ne trovarè un milion, con Assante che in giro per el mondo, su tuti i mari del mondo, ghe capiterà de tuto, guere, naufragi, amori, tempeste. A legger el libro, che el ga un ritmo incalzante, con parole che se ripeti aposta per raforzar l’esperienza con pleonasmi (“camminava camminando”, “navigava navigando”) e ripetizioni ridondandi (che le crea anche assonanze) che, come in tel blues, le amplifica le emozioni, par de star su un’onda che la diventa sempre più granda (AA) e che co la se spaca la se risolvi a volte (che saria el “B) in recupero de energie, altre volte in tela rassegnazion, fin al momento in cui “Assante accettò gli abracci dell’oceano, chiuse gli occhi per assaporare le ultime gocce di acqua dolce, prima di bere il mare, prima di lasciarsi affogare”.

L’editor de sto bel libro xe le Edizioni Cardano de Pavia. E xe de dir che ala presentazion el libro no iera vendita, se lo becava gratis, con dentro anche una grafica original de Simone. Quei che ga volù dar un obolo i ga fato un gesto umanitario in favor de l’asociazion benefica de Pola “Naš san njihov osmijeh“.