EL STIVAL EL XE ANDÀ REMENGO Ma che Italia xe sensa fa Fiat e l'Alitalia?

El bravo giornalista italian Andrea Purgatori, purtropo morto l'anno scorso, in una ocasion el gaveva dito più o meno cussì: “una volta in tel parlamento italian, co’ scoltavo parlar anche quei politici che i ga gaveva un modo de pensar diferente dal mio e che ideologicamente no i me piaseva, gavevo lo stesso cossa imparar, pareva de esser a una lezion univesitaria. De questi de oggi, svodi  e superficiali, invesse, me vergogno”.

E come no darghe ragion? La politica italiana, ma anche quela europea, ormai xe tanti anni che la xe sensa leader veri e altri politici boni de pensar con la propria testa, e non con quela dele banche e dele finanziarie e sensa i “consigli” che riva da Washington. E xe proprio a a causa de questi politici che ogi gavemo de far con un’Italia che, se paragonada con quela che fino ai anni 80 la stava tra le cinque (al massimo sete) potenze economiche mondiali pur conservando anche politiche sociali de tuto rispeto, la ga fato mile passi indrio. E poi, come se fa imaginar un’Italia sensa la Fiat e sensa l’Alitalia.

Se per la compagnia de aviazion de bandiera, morta nel 2021, se pol almeno dir che al suo posto ‘desso xe la ITA Airways, controlada dal Governo italian ma per el 41% in man ai Tedeschi dela Lufthansa, per la Fiat ormai xe… “adio Mare”.

La fabrica de auti de Torino, che nel tempo la gaveva inglobado anche marche storiche come l’Alfa, la Lancia, l’Autobianchi, la Innocenti e adiritura la Ferrari e Maserati, ma anche Abarth e Chrysler, dal 2021 la fa parte del grupo Stellantis, insieme ai marchi del grupo Peugeot (robe de no creder), con sede a Amsterdam. Solo per el 14,3% de azioni ( 23% de diritto dei voti), la xe controlada fala finanziaria Exor dela famiglia Angnelli, che i ga fato andar la produzion de auti via de l’Italia co’ no iera più i contributi del stato che per anni el gaveva dado un man, specialmente co iera stada la crisi del petrolio nel 1973.

E se la FIAT, che con l’ENI (Ente Nazionale Idrocarburi) la gaveva modernizzà l’Italia, no la xe più in man italiana e no la ghe dà più lavor ai operai italiani, una fià xe colpa anche de Sergio Marchionne, che el iera de origine istriane, ma sai poco sensibile ai problemi dei lavoradori e ala identità nazionale del marchio.

Morta l’Alitalia, persa la Fiat e i orologi de lusso Bulgari e Panerai, l’Italia la perdi colpi anche in altri setori in cui la iera tra i più bravi al mondo: le marche Benetton, Stefanel, Sisley, Lotto, Carrera, Diadora la xe tutte finide in secondo pian. E ‘l Veneto, indo’ che le lavorava, el ga pagà el conto.

Xe tuto colpa dela delocalizzaion dei Anni Novanta. Per via de sbassar i prezzi calando i costi de produzion, i ga serà le fabriche in tel Veneto e i ga comincià a produr in Romania, in Tailandia, in Bangladesh.

El prezzo de quele rifle che magari le costava 50 mila lire el xe calado a 25 mila, ma a che costo? Cioghemo, per esempio, un abitante de Montebelluna indò che iera concentrai sti forti marchi italiani. Da una parte le braghe el le paga de meno, ma da quel’altra le fabriche italiane xe quasi tute serade e xe sai meno ocasion de trovar lavora a casa propria, con le fabriche serade el Comun beca meno tasse e gavendo meno tasse el dà meno servizi (asili, sanità, scuole…). Anche i bar che stava vicin le fabriche ghe ga tocà serar. Insoma, savendo che per pagar le braghe un fià de meno el contracolpo saria stà cussì grave, credo che quel abitante de Montebelluna el ghe gavessi dito de no ala delocalizzazion dela produzion.

Magari qualchedun poderia osservar che ghe tocà andar produr fora per alinearse con la concorenza, ma sta roba, secondo mi xe solo una scusa. La roba del valor la ghe sempre mategnù i sui prezzi e la ga sempre avù clienti.

Forsi saria ora che no solo i Taliani, ma anche i altri politici dei paesi europei, i torni pensar con el proprio cervel. Xe sai triste renderse conto che l’ultimo politico de una certa statura che ga avudo l’Europa xe stada Angela Merkel, una nata in tela DDR, la Germania orientale ex comunista. Ma ‘desso xe sabato sera, femo come el Candido de Voltaire e femo finta che tuto va ben, nel meo dei modi possibili.