I DISI CHE TIRA ARIA DE GUERA: No xe de farsela in braghe, l'UE la ga preparà un kit de sopravvivenza con dentro una britola de un paese neutrale

Insoma, i dixi che in Europa tira aria de guera. Anche el grande storico e comunicator Alessandro Barbero, in un video che el ga fato in ocasion dela manifestazion a Roma dei pacifisti contro el riarmo, el ga dito che l'aria che tira ogi “assomiglia paurosamente” a quela che circolava ala vigilia dela Prima guerra mondial. Proprio come desso, tuti parlava de guera, esisteva anche una “letteratura dell’invasione” (ogi esisti un giornalismo, un opinionismo e una narazion de l’invasion che la dovessi rivar ogi o domani) e tuti i stati che podeva pemeterselo i ga comincià armarse più che i podeva.

La stessa roba la capita proprio in sti giorni. Con el progeto ReArm Europe, el Consiglio europeo el ga aprovà un piano de 800 miliardi per la “comune difesa Europea” e per tanti stati sta roba vol dir indebitarse per ben, con quela che una “comune difesa” europea la xe sai dificile de imagiar, tanto che ogni stato europeo fin desso el ga fato quel che voleva, cussì che no esisti un comun caramato europeo, un comun ‘roplan de guera europeo, una comun tecnologia militare europea, né tanto meno comuni spie (ok, "intelligence") europee.

Fin desso, ala gran parte dei paesi europei, ghe andava ben la Nato, ma dopo che Trump ga deciso de no darghe più armi a l’Ucraina, l’Europa la se ga messo in serca de un suo sistema de difesa autonomo, no più ligà con l’America, per dimostar che in geopolitica l'EU la dovessi contar qualcossa.  L’idea no xe gnache sai mal perché senza un esercito no esisti gnanche un stato, e l’Union Europea la volessi esser un stato. Ma de “stato” la ga sai poca roba: no l’esercito, no la politica estera, no la politica sociale, no la politica energetica, ma solo l’union de dogane, sistemi che ghe va sai ben ala finanza e poco ben ala sanità o a l'imigrazion, norme che regola quanto grandi che ga de esser i pomodori (e che i vieta de andar in bosco a ingrumar sparisi liberamente) e l’ino de Bethoveen.

L’idea, disevo, no la gavessi de dispiaser, ma el grileto che ga messo in moto sto mecanismo el me par sai discutibile. Quasi tuti i stati de l’Unione europea i disi che bisogna difenderse da quel che i ciama espasionismo russo perché i disi Putin el volessi rinovar l’impero. Anche se Mosca gaveva le sue ragioni, l’invasion de l’Ucraina xe sta un ato criminal, perche ai giorni nostri no se dovessi moverghe guera a un stato sovran, copiando el cativo esempio che ga da l’America e la Gran Bretagna invadendo l’Afghanistan nel 2001 e de novo sti due stati più l’Australia e la Polonia movendoghe guera a l’Iraq nel 2003. Ma farsela in braghe e dir che la Russia la gavessi altri apetiti verso ovest e che per questo dovessimo riarmarse per poderse difender, xe una teoria esagerada. E la xa esagerada co se pensa che in tela storia xe stadi  semprei stati europei a invader la Russia e, ai giorni nostri, xe stada la NATO a slagarse verso la Russia, no el contrario.

Ancora do parole per dir quanta confusion e che fobie strambe che in sto momento ga in testa l’Union Europea. Pochi giorni fa l'Alta Comissaria UE per la gestion dele crisi, la Belga Hadja Labib, in un video che pareva “oggi le comiche” la ga presentà un kit de sopravvivenza per resister ale prime 72 ore de guera. Dentro xe medicine, acqua, soldi in contante, forminanti, una machineta (accendino), una lampadina da scarsela, una radio portatile (de quel che ghe se slunga l'antena) e una power bank che saria una bateria più grossa per carigar i telefonini e i tablet. E poi xe un cortelin svizzero. Sai bel, i ne insempia che vegneremo atacadi da un paese che ga la bomba atomica, ma no xe de gaver paura, basta ricordarse de gaver in man una britola prodota da una paese neutrale. E poi la vitoria xe asicurada, sta britola la se ciama ...Victorinox