I Gioghi olimpici invernali i se farà anche in Istria! E noi savemo xa chi che vinserà le medaie de oro

Son sicuro che tanti de voi iera sera gavarà guardado la belissima cerimonia de inaugurazion dei Gioghi olimpici invernali de Milano-Cortina. In quele per de ore xe vegnù a gala tuto el stile, l'eleganza, la creatività (anche co xe de parlar con le mani, o con la novità dei due braceri per el fogo olimpico), el talento per el bel canto, una storia e una cultura sai riche, tuto robe tipiche tipiche dela miglior Italia. Organizando i Gioghi tra Milano, Cortina e altri loghi in tele Alpi, se ga celebrado l'armonia tra cità e paese e per estension tra tute le genti del mondo. Se volemo proprio criticar qualcossa, disemo che non se capissi come mai la Russia e la Bielorussia non i le ga lassade partecipar, co invesse xe presenti Israele e anche l'America che dopo i fati de Gaza e del Venezuela i se gavessi pur meritado qualche bachetada per i diti.

Me xe cascada in tel ocio anche un'altra roba. E digo subito che no xe un sbaglio de l'organizator che no ga fato altro che rispetar quel che disi le regole olimpiche: le lingue uficiali xe el Francese, l'Inglese e quela del paese ospitante, in questo caso l'Italian. A mi, personalmente, me gavessi piasso sentir parlar anche el Tedesco (no perché me piasi sta lingua, ma per prncipio) e no solo perchè i paesi germanofoni (Germania, Austria, Svizzera), con la Norvegia, l'America, el Canada e la Russia xe quei che vinto più medaie olimpiche ai Gioghi invernali, ma specialmente perchè in Italia, paese ospitante, vivi una grossa minoranza tirolese de lingua tedesca, che la xe de casa proprio in tei loghi alpini indò che se pratica le discipline invernali. E, ancor de più, un grande numero de medaie italiane ai Gioghi invernali ghe le ga vinte proprio i Tirolesi d'Italia che i parla tedesco. Mah, cussì la xe.

Insoma, dela bela cerimonia de inaugurazion dei ieri sera ormai savè tuto. Ma de sicuro non savè che fra uno o do anni le Olimpiadi invernali le se svolgerà in Istria. E la roba incredibile xe che noi savevo xa chi che vinserà le medaie de oro.

Comincemo con le tre discipline del sci alpino: discesa, slalom gigante e slolm speciale. L'oro in discesa lo vinserà tuti quei sindaci che, savendo che quatro anni de mandato i passa presto, i filerà svelti fin al traguardo (el mantegnimento dele promesse eletorali), driti, sensa svoltar a destra o sinistra perdendo tempo in mile compromessi.

El slalom gigante lo vinserà tutti quei che in Istria i sarà in grado de passar elegantemente e svelti tra le bariere linguistiche e i sarà boni de parlar, o se no altro de capir, sia el croato, sia l'italian. Sul gradin più alto del podio del slalom speciale finirà quei che, oltre a cavarsela in tel gigante, i xe boni de parlar anche in ciacavo, istroveneto e istrioto.

La combinata tra discesa e slalom la vinserà de sicuro un imigrato: quel che saverà distrigarsela in modo bon, bel e svelto tra el mantegnir le proprie tradissioni, la propria identità e l'adeguarse al logo indò ch 'l xe vegnù. Sensa che ghe sia ostacoli imposizioni né da parte del stesso imigrao, né da parte della gente del logo in cui el xe imigrà, ma in tel rispeto sia de l'imigrato, sia del logo indò che 'l xe vegnù a viver.

La medaia de oro per la gara de bob la ghe andarà ai quei ispetori che come ruli compressori i farà de tuto per gaverla vinta contro l'edilizia abusiva che la deturpa la nostra bela Istria. E che i se fa la crose davanti ale trope case col teto drito. L'oro per la corsa dele slite lo vinserà invesse quei altri ispetori che i riverà fermar tuti quei disgrassiai che i lassa muci de scovasse nei nostri boschi, sui nostri prati, lungo le nostre bele spiage, farendo anche l'ecocidio.

L'oro per el sci de fondo se lo meterà in torno al colo i volontari, sia quei quei che i se ciol a cuor i destini disgrassiai dei sensateto, dei veci, dei maladi, dei orfani, ma anche quei che i va ingrumar scovasse in natura per mantegnir neto l'ambiente. I sa che la strada che i ga de far la sai lunga, xe de gaver resistenza psichica e fisica, mai i sa anche che chi che la dura la vince.

La medaia de oro per i salti dal trampolin la ghe andarà a quei aministratori che i sarà boni del scavalcare tuti i problemi logistici e finanziari per risanar el centro de smaltimento de scovasse de Castion in modo che no l'inquini più l'ambiente e che no 'l mandi una spussa insoportabile in tuta l'Istria del sud.

El curling xe quel sport che 'l ghe somilia ale boce, solo che invese dele bale de fero xe piati grandi de granito che par astronavi. Chi che gioga el devi far slitar ben ste piastre sul iasso, e 'lora ti li vedi con una specie de scova in man che la servi per netar el iasso davanti alla „bocia“. Ale Olimpiade invernali in Istria la gara de curling vinserà quei che – lustra lustra, scava scava -  i riverà trovar novi fonti de acqua che in Istria la comincia mancar.

A vinser in tela disciplina del sci acrobatico sarà quei politici e aministratori che i sarà boni de risolver i problemi dela carenza de personal medico, sociale e turistico in in Istria: la sarà dura, sarà de far salti de simia. Nel patinagio de velocità vinserà quel in grado de convincer el governo che saria ora de rimondernar la ferovia istriana perché in tuto el mondo fora che in Istria con el treno se riva più svelti e sicuri che per strada. L'oro in tel patinagio artistico el ghe andarà a quei legislatori e aministratori che si saverà scriver regole in modo che ghe sia una bela armonia tra el gaver tanti turisti che i ne porta i schei ma al podendo contar al contempo anche sule infrastruture adate: acqua, luce, sistema de smaltimento dele scovasse, strade, ferovie, parchegi...

Finimo con un sport de squadra: nissun vinserà la medaia de oro in tel hockey su iasso: infati, tute due le semifinali le finirà in parità e no se riverà trovar i due finalisti. In tela prima semifinale, dopo gaver sbarufà e gaverse onto per tuta la partita, la squadra dela Region istriana e quela de Governo de Zagabria le deciderà de passar al fair play cussì che la finirà in un paregio. In tel'altra seminfinale, la squadra dei esuli la gaverà de vedersela con la squadra dei taliani restadi in Istria: dopo gaverse sbarufà e gaverse onto per tuta la partita, i deciderù de passar al fair play cussì anche in sto caso la xe finirà in un paregio. Insoma, quatro squadre che non se ritroverà solo con el bicer meso svodo, ma anche con el bicer meso pien. Che tante volte el val oro.