Alora, ogi invesse de scriver mi, ve farò leger quel che ga scrito i fioi premiadi al Festival de l'Istrovento. Eh si, perché sto Festival, che conossè specialmente per via del Festival dela canson in dialeto „Dimela cantando che se svolgi al suo interno“ el ga anche el merito de gaver messo in pìe concorsi video e leterari fati in dialeto. In sto lavor, i ga coinvolto i fioi delle scole, ben savendo che el dialeto el se pol conservar e tramandar solo se el ghe vien isegnado ai fioi e ala mualaria.
Al concorso leterario xe rivadi più de 100 lavori e in ogni cartegoria ghe ne xe stai premiadi tre. Le categorie iera quele dei Pici (dai 6 ai 10 anni), dei Medi (dai 11 ai 14 anni) e dei Grandi (dai 15 ai 18).
Forsi podessi dir che in qualche lavor se trova qualche doppia de troppo, che invesse de „bambola“ se podeva scriver „pupa“, ma sarìa un'inutile andar in serca del pel in tel ovo. Preferisso invesse dirve che sti fioi i se merita tuti i nostri elogi e tuto el nostro rispeto, i xe bravi de esporimersi e de scriver, e sarà grassie a lori se sto nostro dialeto no 'l morirà.
E desso, sensa altri preamboli, ve „taco“ i tre testi che i ga vinto el primo premio.
CATEGORIA GRANDI
La poesia “Scuro” la ga scrita Martin Codiglia Vidach del ginasio “Antonio Sema” de Piran
Ecco la motivassion dela giuria: “Una poesia che mostra una piena maturità poetica e stilistica nell’uso sapiente dell’anafora e della ripetision xe scuro. La xe cusì incisiva, che strenzio in panza. L’atmosfera creada no consola ma la oprimi.”
Scuro
No xe la mia luna a guidarme,
la me ga lasà solo.
Xe scuro,
xe nero.
No xe el rumor del vento a tegnirme compagnia,
el me ga lasà solo.
Xe scuro,
xe zito.
No xe una stella a mostrarme la strada,
le me ga lasà solo.
Xe scuro,
son perso.
No xe la piova a tocarme la pelle,
la me ga lasà solo.
Xe scuro,
son inerte.
Xe solo el fredo a ponzerme,
lui no me ga lasà.
Xe scuro,
son morto.
CATEGORIA MEDI
El raconto “Veronika OK” lo ga scrito Ana Sophie Šljkukić dela scuola elementare Giuseppina Martinuzzi de Pola
Ecco la motivassion dela giuria: “Veronika OK xe una storia de emancipasion e forsa de una dona con la D maiuscola, dove traspari el grande rispeto per una vita come la sua, fata de dificoltà ma anche de riscato. Un raconto cusì ben costruì che te tien ligà fina la fine e nol te lasa indiferente.“
Veronika “OK"
Mia mama gaveva l’età che go mi adesso quando in paese xe rivada la notizia che Veronica OK xe morta. La se ricorda ancora de quando ela e nona xe andade a porgerghe l’ ultimo saludo. I la gaveva imbalsamada, ma la roba più strana, disi mama, xe che i la gaveva trucada, incipriada, i ghe ga messo el rossetto sui labbri e dipinto le onge de rosa. Insomma, la pareva una de quele bamboline col viso deceramica, esile e delicata. In America se usa cussiì, i gaveva dito. Mama disi pero che la vita no ga mai cocolado sta dona, no ghe xe mai sta permesso de esser né esile, né delicata.
La iera nata in paese, e all’epoca andar a scuola iera un lusso che tante famiglie no se
podeva permetter, tra tante bocche de sfamar e i mestieri che non se spareciava soli.
Veronica la sognava, come tante, un matrimonio, i fioi e una casa tutta sua.
I tempi i iera quel che i iera, tanta miseria tra le due guere.
La sua casa iera la ultima che dal paese portava verso el mar. Una cameretta xo e una al
pian de sora, il bagno in casa non lo gaveva nissun, se andava in un sgabuzzin fatto verso
l’orto, e davanti la casa iera il pozzo per I'acqua, la sterna. I omini del paese iera quasi
tutti marinai o pescadori, perché la tera non iera sai coltivabile. Cussì, anche el mulo de
Veronica xe andà navigar.
Alla fine della guera, come spesso xe successo anche in altre parti, certe famiglie ga
preferi spostarse in città, certi ga dovù emigrar all' estero, certi xe andadi perfin dall' altra
parte del mondo. Tra una navigazion e un’altra Veronica se ga sposado col suo mulo.
Anche el marì della Veronica ga sbarcà in America e ghe ga scritto a casa che a New
York xe più opportunità, e che pena che el se sistema, el ghe farà le carte, a ela e ai fioi,
per vegnir nella tera promessa.
No la ga perso coragio gnanche co ga passado mesi e poi anni, e le carte no rivava e no
la ga perso coragio gnanche la notte co certi paesani, infastididi che il marì ga scelto de
no tornar, ghe xe piombadi in casa e ghe ga rasado i cavei a zero davanti ai fioi impauridi.
No, no la ga perso il coragio. Ma la ga ciapà paura, e tanta.
La se ga impachettà coi fioi, e la xe scampada nei campi profughi in Italia. Mama non sa
per quanto tempo la xe stada là, ma i fioi iera ormai ragassi, grandi, e le carte ancora no
rivava.
No la ga perso coragio, e la ga fato sola richiesta de migrazion per I'America, visto che dal
marì no rivava niente, gnanche pit notizie.
No la ga perso coragio gnanche co la Andrea Doria ga comincià a afondar vicina New
York. Per fortuna ela e i sui fioi iera gente de mar, e non solo che i xe sopravissudi, ma
una volta rivadi sulla tera ferma i ga anche ciapà la medaglia d' onor per gaver salvado
gente dal naufragio.
No la se ga scoragiado gnanche co la ga savù che il marì ormai gaveva un’altra famiglia.
La se ga rimbocà le manighe, e no la se ga perso de animo. La ga fato studiar i fioi, e
cussì, quasi analfabeta, la xe sopravissuda alle magagne della vita.
Mama la ga conossuda co Veronica OK la gaveva xa una certa età, e ormai pensionata,
la tornava ogni estate in paese. Nella casa vicin al mar.
Dopo tutta una vita passada in America, co la tornava in paese la mescolava italian,
ciacavo e inglese. E alla fine de ogni frase la petava un “OK."
Co mama me parla de Veronica, la me disi sempre che co ela e nona le andava a trovarla,
nona ghe diseva:" Contime te prego, ancora una volta, de quela volta che dopo tanti tanti
anni, ti ga rivisto tuo marì”.
New York xe una metropoli, piena de gente de tutte le parti del mondo, un incontro de
culture, ma anche grande abbastanza da non far incontrar chi non ti vol veder. Sta de fatto
che Veronica in quella città no la ga mai visto el traditor. Pero un’estate, quandoi cavei
ormai se gaveva tinto de grigio, la ga savudo che anche el marì iera tornado a Pola, a far
visita alla sorela. E Veronica non ga resistido. D'accordo con la cognada, la se ga
presentado in casa sua e insieme le ga spetado che el rientri dal giro in mercato. Co el xe
rivà, tutto pimpante se ga avicinà a Veronica, e fassendoghe il basaman, ghe ga
chiesto:" e chi xe sta bella signora?" E ela ghe ga risposto semplicemente: “Mi son quella
che te ga partorì tre fioi, OK?"
Quante Veroniche combati ogni giorno, e no le pol permetterse el lusso de perder el
coraggio? Quante le combatti per non affondar? Per non perderse? Per non arrenderse?
PICI
CATEGORIA PICI
El racontin “Le luganighe de...FAREMO! lo ga scrito Simone Vežnaver dela Comunità degli Italiani de Buie
Ecco la motivassion dela giuria: “Tema con una dose non indiferente de morbin, s'ceto e inciso, che coglie in pien u difeto del papà, ma sensa volerghene“
Le luganighe de...FAREMO!
Mio papa’ me dizi che doman faremo le luganighe. Ogi el va cior i budei e doman sarà tuto pronto per far le luganighe. Ma mi me preocupo quando el me ciolarà la bici. Lui el dizi sempre FAREMO DOMANI, FAREMO DOMANI.
Riva el giorno dopo e papà me conferma che si che ogi faremo le bone luganighe. Ma tre ore dopo el me dizi SCUSA MA DESO VIEN BRUS TACAR LA LUCE IN TAVERNA, ME PAR CHE LE LUGANIGHE FAREMO DOMAN.
Eco cusì finisi sempre el suo FAREMO DOMAN, ne luganighe ne bici.
Meno mal che riva mio cugin, vado giogarme con lui.
