LA MALEDISSION DE LA "DESTINACIJA": Eco perchè i paesi de l'Istria no i ga più abitanti, ma stakeholders

Ogi xe el primo giorno d’estate e alora scrivemo un testo d’ocasion. E sicome in Istria se vivi specie de turismo estivo, provemo a veder come che nel giro del pochi anni el pescador col tempo el xe diventà un afitacamere. Ridendo e schersando, gavewmo scrito anche qualche roba seria, ma ricordemose che la verità la sta sempre a metà strada e misura xe la parola magica. L’articolo che ste per leger el xe una critica al turismo da destinacija, ma xe vero anche che sensa el turismo tanto gente in Istria la gavessi più scarsele che soldi per impinirle.

Una volta, in tei depliant de promozion turistica de l’Istria, ogni logo sul mar el iera presentà come un (ex) paese de pescadori, opur come un “carateristico borgo marinario mediterraneo”. Fasana? Paese de pescadori. Rovigno? Carateristico borgo marinardo mediteraneo! Medolin? Un ex paese de pescadori. A sentir certe presentazioni, pareva che in Istria no gavessimo mai fato altro che pescar sardoni e cusir le rede.

Dopo, però, xe rivada la parola magica: destinazion. O, come che i disi quei dele “turističke zajednice“, la famoosa destinacija. E da quel momento xe cambià tuto.

El paese no ‘l xe più un posto indò che vivi gente vera, el xe diventà un asset per “pernottamenti e guadagni indotti”. El porto no xe più un porto, ma una "waterfront". La piassa no xe più una piassa, ma una" event location". La festa del santo patrono oggi la vien descrita come un "evento identitario". E ‘l tramonto, che per secoli bastava guardarlo, el xe diventà un “content” da fotografar e postar su instangram prima che el sol el se distudi.

El pescador, sia ciaro, no’l xe sparido. Saria pecà. El xe restà vivo, ma in forma decorativa. Un poco in tele brochure, un fià sui manifesti, un ninin nei discorsi dei sindaci. Se la ghe xe andada proprio mal che toca anche remar e portar i turisti a spasso in batana.

La “destinacija” la ga fato scatar el cambio de tante alte parole. No se parla più de strade e gite ma de percorsi esperienziali. No se organizza più una festa ma un format. No se sistema un giardin ma se valoriza una risorsa territorial. Non se conta più la storia dei personagi storici ma, li femo ‘diritura risorger con la “living history”.  E i abitanti? No i xe più citadini, i xe stakeholders.

La destinacija la ga la una forza incredibile. La riva trasformar tuto. Una spiagia la diventa un prodotto turistico, un bosco diventa un asset naturalistico. E i problemi? Anche quei i cambia nome. El trafico no xe più un problema  ma “una criticità, una sfida della mobilità”. Anche i afiti e i prezzi dele case che i va su come i missili no i xe un problema: i xe l’effetto del successo della destinacija.

E cussì, pian pianin, gavemo comincià a parlar come se i paesi no fossi più paesi, ma aziende. Solo che un paese xe una roba viva. Xe la baba che la va al mercato, xe i muli che i gioga in piaza, xe quel che se lamenta del comun ogni matina al bar. Una destinacija, invesse, la ga de esser sempre bela, neta, vendibile, competitiva, performante. e instagramabile. Sempre pronta per qualchedun che vien da fora. La devi produr numeri, presenze, pernotamenti, “engagement”. Un paese, invesse, el pol permetterse de essere anche noioso, imperfeto, anche una fià disordinà. E, roba ogi scandalalosa, el pol esser prima dei suoi abitanti piutosto che i de turisti che i lo visita.

Forsi xe proprioa qua che ‘l sta el punto. No in tel fato che i tempi cambia, perché i tempi i xe sempre cambiadi. Ma in tel fatto che ogni tanto se se dimentica che prima de esser una destinazion, un paese o una cità, anche se turistici, i xe la casa de qualcun. Forsi el vero lusso, ogi, non xe quel de diventar una destinacija de sucesso. Xe rivar a restare un logo autentico fin che tuti i altri i fa de tuto per trasformarte in un brand. Per questo non xe sai dificile pronosticar che presto legeremo anche questo messagio publicitario rivolto ai turisti: "Vegnì a visitar una destinacija che da poco la xe tornada a esser un paese”.  Quela sarà la promozion più moderna de tute.