PENSIERI E PAROLE No savaria dir se ogi la gente xe più sola de ieri, come ti rivi a misurar la solitudine?

Qualche giorno fa go guardà un film con Carlo Verdone. Quel dove che l’interpreta tre personagi diferenti che xe in viagio de nose con le mogli: un personagio xe timido e un pò inbranado, l’altro xe un rompiscatole e el terso xe quel ganzo (diria i giovani el frajer). No so se ve ricordè de che film che se trata. Bon, xe una scena nel film dove che al terso personagio, el frajer apunto, ghe riva una telefonada dei amici. Lui, in perfeto romanesco el rispondi a la telefonada: “‘Ndo state? Che fate? ‘Nd’annate?” (Dove sè? Cosa fasè? Dove andè?).

E ben, niente, vardando sta scena me go meso a pensar. Speso me basta un gnente, un odor, un suono, un’imagine per meterme a rifleter. Me xe vignù in mente come che una volta, e parlo de quaranta ani fa, esisteva le grandi compagnie de amici. Quele che se riuniva insieme a le famiglie. Quele che per ogni roba, anche quela più picia, se riuniva per far festa. Ti conpravi el auto novo – festa. Ti ciapavi la paga – festa. Ti fasevi un toco de muro in casa – festa. Per no parlar de le ocasioni più grandi, come l’ano novo, i compleani, le cresime, i batesimi, le comunioni... E i primi magi.

A quei sì che iera primi magi... Ti cominciavi la matina bonora e ti finivi fin che no calava el scuro. Tuta una campagna iera tua. I fioi che se giogava a balon, i grandi che prontava de magnar. E magna, e bevi, e gioga. E cusì per tuto el giorno.

Deso no ti ne vedi più de ste robe. Intendo le grandi compagnie de amici che se riunisi con le proprie famiglie e fà festa per ogni monada. Deso a malapena ti vadi a magnar una piza con qualchedun. No esisti più quela union, quela fratelansa e anche quela voia de star in compagnia. Tuti serai in te le proprie case. Tuti a pensar a la propria vita, ai problemi, a sburtar vanti.

No savaria dir cosa che ghe xe capità al genere umano. Perchè semo diventadi cusì. E ancora peso, rivaremo a tornar a quela voia de viver, de star insieme o no xe più speransa?

Cedo la parola a Velan...

Xe sicuro che la solitudine xe una bruta bestia anche se conoso gente che i sa star soli, i ga come un talento inato. No ghe servi e i no cerca compania. Mi li invidio. No savaria dir se ogi la gente xe più sola de ieri, come ti rivi a misurar la solitudine? Xe cambiadi i modi de divertirse, de sodisfar i desideri, penso.

Co rivava film importanti a Rovigno ti stavi in fila anche per due ore per rivar a comprar el bilieto. El cine el iera sempre carigo: due proiezioni, ale sei e ale oto. Go pensà tante volte e go concluso che se, quando che gavevo 16 ani, gavesi avudo internet no me saria movù de casa.

Co iero picio i Rovignesi le domeniche de estate i le pasava sui scoi: tuti in compagnia, se faseva fogo, se rostiva, se magnava e beveva. Iera barche armisade dapertuto: a Figarola, Sturago, scoio dei Sameri, San Giovani...Tuti se ricorda de ste robe con nostalgia e i concludi che ogi se xe più soli. Mi credo che no xe cambià el caratere, la voia, credo che semplicemente ogi ste robe no ti pol farle più, le xe proibide. Fogo sui scoi no ti pol impisar, xe proibido, i te fica una multa e i te meti in galera o in manicomio. Go qualche ano, ma no son proprio vecio e vedo tanti amici che i no vedi l'ora de trovarse e de magnar e bever qualcosa insieme. Mi spero che anche i giovani i ga sti stimoli, no poso dir, giovane no son. Vedo ad esempio che la domenica xe tanta gente che gira l'Istria, i serca osterie e i magna fora. Una volta i Rovignesi no andava oltre el Spirito Santo, ogi ti li trovi anche in Ciciaria, tuti in serca de luganighe e bona vinasa.

Xe vero, la gente ga paura de star sola, penso che sia una predisposision inata ne l'omo. Forsi xe cambià el contesto: vivemo la ditatura del soldo, anche el consumo xe un'ideologia, la te costringi a eser solo per consumar e desiderar. Vinsi chi che sa far soldi, xe i novi paroni del mondo i novi eroi. Per mi i pol continuar a guadagnar, gnanche no me giro. Xe sti inseti che i rendi el mondo piu' solo.