Ieri se ga verto a Pola la trentesima edizion dela Fiera del libro, un de quei eventi che, come el festival dei film in Arena, el ga fato conosser Pola sai più in là dei nostri sreti ambiti locali. Ma se el festival del cine, putropo, nei anni el xe diventà sempre più scarso e scarto, la fiera del libro la xe diventada de edizion in edizion sempre più interessante e aprezada in giro per el mondo.
No, no stago esagerando co parlo del mondo, a Pola xe vegnudi i massimi nomi dela letteratura e dela cultura internazional. Tra i tanti, ghe vol ricordar almeno Umberto Eco, Orhan Pamuk, Claudio Magris, el regista ceco Jiri Menzel, ma anche el grande disegnador de fumeti Milo Manara.
Sto anno, solo per nominar quei che vien da l’Italia (visto che scrivemo in istroveneto), ospiti de Pola xe la filosofa Donatella Di Cesare e Tanino Liberatore che Frank Zappa ga soranominà “El Michelangelo del fumeto”. Disegnador e ilustrador, Liberatore el ga lavorà anche con el mitico fumetista e pitor Andrea Pazienza. De Donatella Di Cesare, che no conossevo, eco coss’ che go trovà online: “Si è occupata delle responsabilità della filosofia verso l'Olocausto, della condizione umana sottoposta alla violenza estrema, del terrore nell'età della globalizzazione, del tema della sovranità, degli interrogativi filosofico-politici sull'estraneità e sul mito dell'identità“. In 'sto ultimo periodo la ga scrito anche de migranti („l'altro“ diferente de noi) e dela guera in Ucraina.
Sto anno, l'ultimo giorno dela fiera, domenica 8 dicembre, sarà presente anche Egidio Ivetić, Polesan e professor de storia all'Università de Padova. Con lui, per far un ritrato de l'Istria, de l'Adriatico e del Mediterraneo sarà Maurizio Levak e Andrea Matošević.
Se poi volemo restar solo in ambito croato e ex jugoslavo, in ‘sti trenta anni ospiti dela fiera de Pola xe stade personalità che le ga meso su carta le parole e i pensieri più bei scrite in ste zone: Slavenka Drakulić, Daša Drndić, Julijana Matanović, Nedjeljko Fabrio, Miljenko Jergović, Mirko Kovač, Tonko Maroević, Predrag Matvjević, Luko Paljetak, ma anche el scenegiator del regista Emir Kusturica Abdulah Sidran, opur Dragutin Tadijanović che a scola lo gavemo leto tuti.
Un per de righe tute per lui el se la merita Dragan Velikić. Belgradese, considerado el più grande leterato serbo vivente, el ga passà l’infansia e la prima gioventù a Pola, anche fasendo musica in un grupo con el dotor Edi Terlević. A Pola Velikić el ghe ga dedicà za nel 1988 el suo primo romanzo “Via Pula” (tradoto in italian nel 2009 da l’editor Zandonai), ma poi anche “Danteov trg” (1997) e “Dosije Domaševski” (2003).
A questi nomi xe de agiunger quei dei tre giornalisti del mitico giornal satirico, ogi defunto, „Feral Tribune“. Specialmente Boris Dežulović e 'l compianto Predrag Lucić, ma anche Viktor Ivančić, i xe quasi sempre stai una presenza costante alla fiera, portando ironia, pensieri dissacranti ma fondi e sorprendenti, divertimento e pirole de bon senso.
E xe dir che la Fiera de Pola la xe stada tra i primi a "sdoganar" i autori serbi in quei anni co el "politically correct" dominante li gaveva "messi all'indice" che saria un altro modo per dir che iera meio no gaver cossa far con lori.
El nome in croato dela Fiera, Sa(n)jam knjige u Istri, el indica la volontà dei organizatori de spostarse da quela che xe la dimension comercial de l’evento (in fin dei conti, le fiere le xe stade inventade per vender) per avicinarla a qualcossa de più nobile, al sogno. Sài volte se sogna quel che se volessi gaver e in questo modo el libro (sognado) el diventa un ogeto del desiderio, qualcossa che se volessi gaver. Ma anche qualcossa che ne dà sai indrìo.
Provemo solo per un momento pensar a quante vite, esperienze, aventure e disaventure, modi de pensar, descrizioni de loghi e de tempi che se ga stampà in tel nostro cervel e in tele nostre coscienze solo per gaverle lete nei libri, sensa mai gaverle vissude in prima persona. In tela vita – sta roba la saveva za i Babilonesi – se impara scoltando storie, e quante storie le xe diventade “nostre” perché le gavemo lete in un libro o viste in un film o a teatro. Ste storie dele vite dei altri, scrite da altri, le xe per noi un tesoro de sapienza e de conseguenza de saggessa inestimabile, le val oro e le ne iuta anche a cior le decisioni importanti nela nostra vita.
No solo vendita, ma anche scambio de idee, dibatiti, ciacolade con i autori. Infati, prima che el libro sule bancarele, la Fiera del libro de Pola la ga messo al centro del suo programa no i editori, che i pensa per prima roba al “gaver", ma i autori, che i trasmeti el “esser” o, se la va mal, el "voler esser". La mossa furba e vincente xe stada quela de meter tra el publico e i autori un per de presentadori bravi, preparai, sgài, divertenti, svelti de parola e de mente: tra questi el Zagabrese de Bjelovar Vojo Šiljak, i Polesani Paola Orlić e Andrea Matošević e 'l Fiuman Aljoša Pužar che el xe sta per un periodo anche caporedator de “La Battana”, la rivista leteraria de l’Edit, la casa editrice dei Taliani de Croazia e Slovenia.
Tra el migliaio de persone che le ga dado una man a far cresser la fiera del libro de Pola, voio ancora nominar, tra i “esterni”, i musicisti istriani Tamara Obrovac e Livio Morosin, l’etnomusicologo Dario Marušić, el storico Miroslav Bertoša, el scritor Milan Rakovac, el publicista Miodrag Kalčić-Kina, l’ator e regista Matija Ferlin, la critica d’arte e brava organizatrice de eventi culturali Gorka Ostojić Cvajner, la bibliotecaria Nives Franić, i fotografi Igor Zirojević (che el xe anche editor), el nostro Manuel Angelini, Saša Miljević, Goran Šebelić e altri ancora.
Tra i “interni” del cast dela Fiera ga lavorà sai Slavica Ćurković, Egle Vošten e Mauricio Ferlin, tuti lori guidadi dala diretrice Magdalena Vodopija, fia de Boško Obradović, morto in seguito a un scontro in auto nel 1997, che nel 1995 el gaveva inventado e organizado la prima edizion dela fiera. Dentista de profession, Obradović el ga lavorà anche come giornalista, autor de teatro, poeta, promotor de venti culturali. E no xe Polesan over 40 che no se ricorda de lui (e dei sui mustaci) anche come autor de tante dele canzoni dei Atomsko Sklonište, el grupo rock de Pola pià famoso in Jugoslavia. Ogi ala una e mezza a Monte Zaro xe la cerimonia in ocasion del fato che a Obradović ghe xe stado dedicado un sentiero del parco.
Proprio alla Fiera del libro de Pola, nel 2006, a Umberto Eco i ghe gavevà domanda se l'e-book – el libro d digitale – el saria sta destinà a segnar la fine e a esser la condana del libro stampà, cussì come che le telefono el ga sostituì el telegrafo per eser poi smacà for dai gioghi dal celulare. Umberto Eco, che el saveva benissimo che el ritornelo „video killed the radio star“ no 'l iera vero, el gaveva risposto che el libro el xe come un cuciar, una volta inventado no 'cori più cambiarlo: la sua sagoma, el suo material, la sua funzion, el suo odor i ieri xa perfeti.
