TRADONICO, POLANI, ERIZZO: I tre dogi de Venezia de origine istriana

Dei 120 dogi che per mile e cento anni (dal 697 al 1797) i ga guidado Venezia, tre i iera de origine istriana: Pietro Tradonico e Pietro Polani gaveva radise polesane, Francesco Erizzo capodistriane. E co se pensa che i primi due i xe stai al governo sai prima del 1267, co Parenzo xe stada la prima cittadina istriana a consegnarse ala Serenissima, diventa ciaro el fato che i legami tra l’Istria e Venezia i xe sai più veci e i vien sai prima del periodo (1267-1797) co’ l’Istria la gaveva fato parte de Venezia,  che tanti definissi ancor come periodo de ocupassion venessiana de l’Istria.

Se i Erizzo de Capodistria i iera solo una delle 240 famiglie dela nobilità veneziana, i Tradonico, invesse, i iera una dele 9 famiglie nobili venessiane più antiche. Co Venessia se ga inventà le 12 famiglie apostoliche e le 4 famiglie evangeliche per rinforsar el legame con la cesa e San Marco, in tele 12 apostoliche iera i Polani, che nel XII secolo i figurava tra le 25 famiglie più potenti de Venezia. Pegola sua, 600 anni più tardi, nel XVIII secolo, i se ga estinto. Sia i Tradonico, sia i Polani i ieri consideradi “case vecchie”, case inteso come casati, famiglie.

Le origini polesane dei Polani (a Venezia dal 1074) e quelle capodistriane dei Erizzo (a Venezia za dal IX o X secolo) le xe stade confermade dala storiografia moderna. Quele dei Tradonico, che i storici de una volta i dava de sicuro come Polesani, ogi le vien messe in discussion e i lo dà come nato da “genitori sconosciuti”.

Questo no xe el logo per scriver in lungo e in largo de quel che sti tre personagi i ga fato o no i ga fato fin che i comandava a Venezia, co i iera dogi, nome che deriva dal latin ”dux” che sta per guida, comandante. Basterà qualche curiosità.

Pietro Tradonico xe sta el 13-esimo doge de Venezia dal 836 al 864. El gavù sai de far con guere, sia in Adriatico, sia in tel Mar Tirreno, ma la ghe xe andada sempre mal. Dopo gaver stipulà la pase con el capo dei pirati narentani (del fiume Narenta / Neretva) Družak e 'l principe croato Mislav, el ga fato lo stesso una spedizion contro i Naretani in basso Adriatico. La xe andada finir che, no solo el ga perso 100 omini, ma anche che, con i Narentani che i becà coragio, i xe rivai fin Venezia e i ga sachegià Caorle. Tradonico ga perso anche le bataglie navali contro i Saraceni: i Bizantini i ghe gaveva domandà una man per scazar i Arabi dala Calabria e dala Puglia, ma la de Taranto de novo el ga becà cope. La marina venessiana a quel tempo no la iera ancora quel che la saria diventata secoli dopo.

Anche se analfabeta, el xe stai sai più bravo in diplomazia. Ciolta in man come provincia de Bisanzio, Pietro Tradonico el ga fato diventar Venezia Ducato autonomo, grazie al ricoscimento da parte de l’imperator carolingio Lotario I. Questo vol dire che i Veneziani i diventava paroni de tuti i beni laici e de quei dela cesa e sta condizion favorirà el grande raforzamento dela cità in tei secoli ch vegnerà dopo.

Indiferente, el modo in cui el ga governà no ghe ga piasso a tante famiglie nobili venessiane che le ga imbastì una congiura: el 13 setembre del 864, co ‘l vegniva fora del cesa San Zaccaria, i lo ga copà con un per de cortelade. I congiurai i voleva far fora anche suo fio Giovanni, no i voleva più un Tradonico come capo, ma Giovanni ga rivà sconderse in tel palazzo ducale. Con una tratativa xe sta stabilì che i assassini i saria dovui andar in esilio, ma a pato del ritiro dele ambizioni dogali de Nini Tradonico. E cussì xe sta fato.

Se soto Pietro Tradonico Venezia da provincia bizantina la diventa Ducato autonomo, con un altro Polesan, Pietro Polani, doge dal 1130 al 1148, da Ducato la diventa Comun, anticamera del quel che sarà la grande Repubblica de Venezia. El merito de Polani, 36-esimo doge, oltre a gaver de far con due papi eletti in contemporanea (Innocenzo II e Anacleto II), xe sta quel de gaver limità el potere del doge inventandose un consiglio, noto col nome Consiglio dei Savi.

Pietro Polani el ga lassà un segno anche in tela storia de l’Istria, che con Venezia la gaveva za relazioni guardandola dal basso verso l’alto. Con i pati de Pola e Capodistria del 1145 se pol xa parlar de una forma primordial de dominio venezian. Ma le e due cità istriane le iera ancora restade soto el Sacro romano impero tedesco, e sta condizion iera favorevole per far nasser un Comun bastanza autonomo cussì che el legame con Venessia no ghe comodava: ben presto Pola se allea con Rovigno, Parenzo, Cittanova e Umago e la se rivolta contro Venezia. Iera el 1150 e Polani, meso Istrian che el gaveva stipulà i pati sensa mover guera, el iera morto za da due anni. El novo doge Domenico Morosini no’l ga mostrà la comprension de Polani, ma el ga spedì in Istria 50 galee comandade da suo fio Domenico e da Marco Gradenigo. I Istriani stavoltà i ca beca bacalà e dani materiai cussì che in poco tempo le cità ribeli e ‘l vescovo de Pola i ghe ga dovù giurar fedeltà a Venezia. Polani el iera morto de malatia nel 1148, co ‘l stava guidando una spedizion contro i Normanni, ma dopo una bufera in mar, ghe ga tocà smontar a Caorle e dopo pochi giorni el xe morto a Venezia. El xe sepolto in tel monastero de San Cipriano su l’isola del Murano.

Xe sai probabile che Francesco Erizzo, co ‘l xe sta el 98-esimo doge de Venezia dal 1631 al 1646, le sue origine istriane no le gaveva più gnanche in tel’ anticamera del cervel. El va ricordà perché, dopo esser sta sindaco in Dalmazia (el controlava i retori dele varie cità dalmate soto Venezia), el xe sta eleto doge con ben 40 voti su 41. Eco coss’ che se pol leger de lui: “Svolse il suo dogato in un periodo piuttosto tranquillo. Negli anni Trenta si sviluppò il gioco d'azzardo (ed i famosi ridotti, cioè case da gioco), i teatri ebbero un nuovo periodo di splendore e a Palazzo Ducale le feste e i ricevimenti erano all'ordine del giorno”. Insoma, più cicale che formigole.

A Pola, vicin piazza Foro, oggi esiste el vicolo Polani e in tela zona del parco dela Cità de Graz (vicin de dove che la iera una volta, ma i bombardamenti dela seconda guera i ghe ga fato la pieta) xe anche via Tradonico. Me par che a Capodistria no ghe sia un via Erizzo, ma a Zara xe Borgo Erizzo, più noto con el nome dei Arbanasi, per via del 16 famiglie Albanesi che le xe stade insediade là in tel XVIII secolo. Ma el nome no deriva dal doge Francesco, ma da quel del suo successor Nicolò Erizzo, provveditor general de Zara dal 1723 al 1726.