Trieste e Fiume le se somiglia per mile robe, una de queste xe i palassi de l'architeto Giacomo Zamattio

Anche se Trieste xe la cità del cafè, dela bora, dele “rifle”, dei orologi Darwil, del “no se pol”, del “viva là e po’ bon” e Fiume, invesse, la xe sai più dificile de decriver in maniera cussì lampante (cità del cantier? dei siluri”? del “ciudi la porta, smorza la luce, voga l’auto”? del “ghe go deto dala mama”), le due cità le se somiglia sai.

E le se somiglia per varie ragioni. La prima xe la morfologia. Tute due ste cità le xe sdraiade su una streta feta de tera pianegiante tacada el mar, per poi rampigarse verso i montisei che le circonda. Per questo le xe carighe de salite e discese. Sia Trieste, sia Fiume, le slusi de palassi bianchi in fondo a due grandi golfi; Trieste in quel del Trieste e Fiume in quel del Quarnero. Per tute due se pol dir che le xe le cità più a nord de l’Adriatico, Trieste de quel ocidental, Fiume del quel Oriental, divise da l’Istria che la guarda de una parte de quà e de quel’altar de là.

E qua xe de dir che anche el Dramma Italiano de Fiume el ghe ga dedicado sto anno un spetacolo de teatro documentario, intitolado  “Pizza Burek – Storie di buffa assimilazione”, ale somiglianze de lingue, genti e memorie tra Trieste e Fiume.

Mai stade venessiane né una né l’altra, xe due cità in cui da secoli lo stesso se parla una variante del veneto. A caval tra el mondo romanzo, slavo e germanico, tute e due le cità le xe, almeno per quel che riguarda dal Settecento in qua, loghi in cui se incontra lingue e cullture: l’italiana, la slovena, la tedesca e l’ebrea a Trieste, l’italiana, la croata, l’ungherese e anche l’ebrea a Fiume.

Se la diferenza tra la presenza slovena a Trieste e quela croata a Fiume la spiega la geografia, quela tra i austriaci a Trieste e i magiari a Fiume la spiega la politica. Tute due cità, nel 1719, co le iera soto la Monarchia asburgica, le xe stade proclamade porto franco da l’imperator Carlo VI. Ma sicome i Ungheresi i vedeva in Fiume un sboco sul mar, per no procurar dani e perdite nel 1779 Maria Teresa d'Austria la ghe ga dà a Fiume el status de Corpus Separatum, cioè de cità autonoma colegada ala Corona ungherese.

Coi  moti del 1848 el bano croato Josip Jelačić el porta Fiume a l'interno dela Croazia, quela Banska Hrvatska che la iera una entità autonoma dentro a l’Impero austriaco. Jelačić ghe la gaveva pèortada via a Budepst per consegnarla a Vienna, ma in tel 1867, con el compromesso austro-ungarico (Ausgleich) che el fa nasser l’Impero austro-ungarico, Fiume torna a esser Corpus separatum soto la corona ungherse.

El fato de esser stade tute due porto franco e, la “strasseta” de Fiume, anche corpus separatum, xe sta la base per un grande svilupo economico dele sue città in tel stesso momento storico. E sto sviluppo el se rifleti anche in tel’architetura, visibile subito co se vedi el fronte mare, la riva dele due cità. Ma oltre a gaver un’architetura che la se somiglia per stile e per periodo storico, se parla de un’architetura fata anche dai stessi architeti che i ga lavorà sia a Trieste, sia a Fiume.

El più famoso xe Giacomo Zammattio. Nato a Trieste il tel 1855, in tela su cità el ga progetà la Grinitz(là de l’Upim), Villa Panfili, Palazzo Dettelbach, la Casa in via Battisti 35, Casa Zammattio in via Ghega  e, con Umberto Nordio, la Casa sede INAIL e la Stazion marittima.

Dal 1884 al 1903 el lavora A Fiume dove che el progetta le scuole de Dolac, el Palazzo Ploech, la Filodrammatica, la Casa Whitehead, la Cassa di Risparmio Fiumana,la Casa Veneziana (Casa Whitehead). El ga direto i lavori del novo Teatro (1884), el ga partecipà alla costruzion del Palazzo Adria, el ga lavorà anche in tel Corso de Fiume. Insoma, el ga dà un contributo decisivo al trasformazion urbana dela cità, specialmente dele zone de Dolac e Brajda.

A Fiume e a Trieste ga lavorà anche Giuseppe Bruni. In tela cità giuliana el ga progetà el Palazzo del Municipio  (sede del Comun di Trieste in Piazza Unità d’Italia) e la trre civica del Municipio con i celebri automi “Micheze e Jacheze”. El ga fato anche el Palazzo Modello de Trieste (quel omonimo de Fiume, ogi sede de l’Unione Italiana e del Circolo de Fiume, el xe sta progetà dai architeti Ferdinand Fellner e Hermann Helmer). A Fiume, invesse, Bruni el ga progetà el Grans Hotel Europa, la villa Gorup a Mlaka, ma anche i ampliamenti de Villa Agiolina a Abbazia.

Trieste e Fiume, insoma, le xe sai vicine in tante robe. Ma le sarà ancora più vicine co finalmente le sarà unide da un’autostrada.