TROPO AMOR O POCO BON SENSO MODAIOLO? Bel fio mio 'pena nato, per ti niente fioco celeste, ciapite sto fioco coi colori de l'Arcobaleno che forsi un giorno ti sarà gay o ti volerà diventar femina

Hannah Arendt iera una filosofa ebrea, studiosa della teoria della politica, che la ga scrito libri fondamentali che ne ga aiutà a capir meo i mali del XX secolo. Basta nominar due titoli: “Le origini del totalitarismo”  e “Eichmann a Gerusalemme: un rapporto sulla banalità del male”. Per chi che no sa, o no se ricorda, Adolf Eichmann xe sta uno dei principali organizatori de l’olocausto, un criminal del guera che in tel 1948 el iera rivà scampar in Argentina indò che i servizi segreti israeliani i lo ga becà nel 1960 per poi processarlo a Gerusalemme e condanarlo a morte nel 1962.

Hanna Arendt la iera stada anche studentessa e amante de Martin Heiddeger, uno dei più grandi filosofi del XX secolo ma che poi el iera sta favorevole al nazismo. Per via de sta roba la Arendt la lo ga lassado, poi la xe stada arestada dai nazisti e internada in un campo de prigionia in Francia.

In tei sui libri la Arendt la scrivi sai de coss’ che xe e coss’ che doveria esser la libertà. Uno dei sui pensieri più interessanti sula libertà xe che, paradossalmente, la libertà per esser vera libertà la ga bisogno de limiti. Xe vari tipi de limiti, forsi el più importante iera quel che gaveva visto za Kant co ‘l gaveva scrito, per farla semplice, che la mia libertà la finissi la indò che comincia la tua. Tra quei indicadi da Anna Arendt xe i limiti che deriva dala dipendenza dela natura.

No xe sempre facile distinguer coss’ che xe natura e coss’ che invesse xe cultura, o magari natura refada o rovinada dai comportamenti sociali. Femo un esempio:  a prima vista esser genitori pareria esser un fato naturale, un fato che ghe speta a un omo e a una dona, ma in realtà no la xe cussì semplice. Trascuremo la fecondazion in proveta. Xe naturale che i fioi li fa una dona e un omo, ma l’esser genitori xe un fià meno naturale. Esser genitori xe un ruolo social che ‘l prevedi anche una certa responsabilità individuale e de grupo. Per capirse, se un “papà” xe un imbriagon che el pesta ogni giorno la moglie e i fioi, quel no xe un papà, no ' xe un genitor, xe solo un masc'io che ga fato un fio. E da qua, saltando tanti passagi, se pol ‘rivar ala conclusion che xe meo  gaver una copia de genitori omossessuali che un pare come quel.

La stessa roba la val per el matrimonio che non xe per niente un fato naturale, ma un stratagema sociale, una scelta cultural fata da tante società (ma non da tute le società, e anche tante de quele che lo ga scelto no le imponi – ma, ipocritamente  solo per el mas’cio – la monogamia). E visto che el comprendi robe come proprietà immobili, eredità, condivision de varie robe, el xe anche una forma de contrato tra – e questo xe fondamentale – tra due persone che almeno in tele intenzioni le volessi volerse ben e star insieme, lore due, per tuta la vita. Per questa ragion, almeno secondo mi, el matrimonio no ‘l pol esser ridotto a un fato naturale che unissi una donna e un omo, per questa ragion mi personalmente no go niente contro i matrimoni tra le copie omossessuali.

Ma el genere sessual de una creatura co’ la nassi, quel xe un fato naturale, se nassi o femine o mas’ci. Xe anche vero che, in una picia percentual de fioi, pol capitar che un mas’cieto, xa de picio, el se senti femina e una feminucia, za de picia, la se senti mas’cio. E poi magari i se fa un’operassion chirurgica per cambiar sesso. Ma sta roba no se la pol saver co’ i fioi i xe pena nati. Per quel, co nassi un masc’io, se lo comunica al mondo con un nastro celeste, e co nassi una femina con un nastro rosa.

L’assessora del Comun del Padova Margherita Colonnello, del Partito democratico, el 14 agosto la ga partorì Aronne, un mas’cieto, ma co'l xe nato sula porta del suo uficio non la ga messo un nastro celeste ma un nastro con i colori de l’arcobalen, tipici dei movimenti gay. La lo gaveva xa anunciado za al Pride de Padova quando, incinta al sesto mese, la gaveva dito: "Non ti regalerò né il fiocco rosa né quello azzurro. Ti regalerò un fiocco arcobaleno perché i colori sono tutti bellissimi! E poi sceglierai tu: sarà il rosa, sarà il blu, o il verde, il rosso o il giallo. Spero tu non scelga mai i colori della paura, che non scelga di diventare mai xenofobo o omofoba".

Tuti ghe xe saltai adosso, oservando che la ga strumentalizzà un neonato a fini propagandistici, che la ga trasformà el picio in t’un manifesto ideologico dela sinistra e che el suo saria un fallimento educativo. La se ga difeso disendo: “Non gli abbiamo chiesto di decidere se essere maschio o femmina. Gli abbiamo promesso, in una società ancora troppo impaurita, che saremo sempre al suo fianco, qualsiasi cosa deciderà per la sua vita e chiunque deciderà di essere. Questo per noi vuol dire amore di genitori.”

Questa xe una dichiarazion d’amor e de bone intenzioni, ma con el difeto de voler esser più catolici del papà. Questo no xe un caso in cui prevenir xe meo de curar, xe un forzar le robe co no ‘cori. Dovessi esser normale che i genitori ghe sia de sostegno ai fioi, ma co i xe apena nati no ocori anunciarghe che i ghe sarà vicini se tra venti anni in un scontro co l’auto el perderà una gamba o che i sarà orgogliosi se a scuola el sarà el più bravo dela classe. I lo farà se e quando capiterà. Ma desso che el xe nato sotoi colori de l'arcobaleno, come i lo vestirà, come i ghe taierà i cavei? I ghe mimetizzerà ò'identità de genere con vestiti e "frizure" ermafroditi?

Secondo mi, la domanda de farse xe questa? Perché, tra i mille messaggi che ghe se podeva mandar a sto picio, se ga scelto proprio uno che riguarda l’identità de genere? No sarà che i media e l’industria de l’intratenimento in questo momento woke i sta trasformando in problema principale – l’identità de genere –  quel che – senza voler negar che esisti al mondo persone che le prova disagio con la sua identità sessual - comunque resta una question come tante altre questioni de disagio (el cancro, la povertà, le ingiustizie sociali, le guere).

Me spiego meo. Se a l’interno de l’umanità (ma anche de tante razze de bestie) xe un dieci per cento de individui omossessuali, xe bon e giusto che in tel 10% dei film e delle serie che guardemo ghe sia anche storie omossessuali. Ma el fato xe in tei ultimi anni praticamente non xe un film o una serie senza che ghe sia due omini o due donne che se basa. Nissun ghe vol cior la libertà de farlo e de mostrarlo, ma in tei limiti che indicava la Arendt, quei dadi dala natura, che la ga certi equilibri che i dovessi essere rispetadi. E poi,provemo restai sui fiochi blu o rosa, pronti ad accetar anche quei coi colori de l’arcobaleno co e se vegnerà el momento.