Xe morto Giorgio Armani, el stilista italian che ‘l ga rivoluzionà, e sai in meo, la moda dei mas’ci portando l’elegansa come primo criterio in quela dele femine.
Armani el xe sta speciale no solo perché el ga inventà el color greige (a metò strada tra el grigio e ‘l beige), ma specialmente perché el ga volù e rivà portar l’eleganza in tela vita quotidiana. Lo ga fato a partir dal 1981 fondando “Emporio Armani”. Emporio no xe una parola che ghe piasi ale grandi case de moda che le se tien sai scic. Emporio xe una parola che se una quasi per un magasin. Ma a veder ben, con el suo Emporio el ga democratizà la moda. Emporio e lusso i ga ciomuncià andar soto brasso.
Sto ris’cio de l’Emporio el se lo gaveva ciolto sai presto, solo sei anni dopo gaver fondà la Armani Srl con i 10 milioni de lire che el gaveva becà vendendo el suo auto. Prima el gaveva lavorà come vetrinista per la Rinascente. Ste vetrine le iera cussì bele che el stilista Nino Cerruti ga volù saver chi che le sistemava, e col ga savù che l’autor iera el giovane Armani el se lo gaveva ciolto lavorar in tela sua azienda.
Prima vetrinista, che vol dir uno bon de lavorar con le mani come i artigiani, poi stilista che piutosto de usar la parola atelier el preferiva dir che i suoi vestiti lui li fa in fabrica, el xe sta un erede dei grandi pitori italiani del Rinascimento che per cento anni (1450-1550) i xe stai i più bravi al mondo. Me vien de pensar che se Raffaello e Tiziano i vivessi oggi i saria quasi sicuro stilisti de moda, come che, se i gavessì vissù 500 anni fa, Armani e Valentino i gavessi podù mostrar el meo de se stessi fassendo i pitori.
No per niente el Rinascimento el nassi a Firenze, la città che tre el XIV e XV secolo la iera la più rica del mondo, anche più de Venezia. E sta ricchessa, diventata ancora più grande con le banche, la iera dovuda proprio all’industria tessile, al saver lavorar le “strasse”. Insoma, i Fiorentini i iera boni de far bei vestiti de qualità.
La morte de Armani la ne ga fato ricordar che la moda italiana la xe famosa in tuto el pianeta e che xe stai tanti i stilisti italiani che i ga fato inamorar (dei sui vestiti) le done de xe meso mondo: Valentino, Versace, Prada, Gucci, Dolce & Gabbana, Coveri, Trussardi, Balestra, Krizia, Cerruti, Ferrè, el nostro Missoni. Con la gastronomia, la Nutella de Ferrero e l’industria dei auti e dele moto (Fiat, Lancia, Alfa Romeo, Ferrari, Lamborghini, Moto Guzzi, Aprilia, Piaggio, Gilera), la moda xe stada uno dei punti più alti, visibili e aprezai de quel che, dopo la fine dela Seconda guera mondial, se ciamava el “miracolo italiano”.
Ogi l’Italia no xe più gnanche l’ombra de quel che la iera quaranta anni fa e, a parte per le sue cità storiche (Venezia, Firenze, Roma) e qualche bon tipo vin, la se fa aprezar in tel mondo ormai solo per la moda. Da questo punto de vista, la morte de Armani, che el xe sta paron dela sua dita fin la fine sensa mai andar sercar soldi in borsa (e lo stesso el ga rivà verser 623 boteghe in 24 paesi del mondo) xe una grande perdita no solo per la moda italiana, ma per la supersite imagine de l’Italia in tel mondo.
