LADONJA BLUES

Piše Fedora Kraljić:

Čera san upalila televižjon. Jušto na udarnu bušilicu, bimo rekli mi trapan, i ubodnu pilu, bimo rekli mi šegun, a te epitete ne znan. To me zajno dešperalo perke me domislilo na Celtis australis, bimo rekli mi ladonja.

Na Giardinima pile ladonje.

Kada san prikučera šla na markat po kapuz, san skoro hlosnula u afan. Jeno drvo je padalo, kako veli čovik kad kadi zapne pa pade, prezpomoćno. Ni škičalo, učinilo je to tiho, brez besid.

Ljudi ki su pasivali su stali fermo. Kako da se na šekondo svit frma; jedino ča se micalo u toj grdoj sliki je bilo to velo drvo, ča je reslo 100 lit, a zdahnulo u dva hipa.

Nisan ešperto za drva i boške, ne znan ku su za spravlje bolna. Forši su. Forši se ne moru rikuperati. Forši moru, ma nima volje. Forši kemu ni drago ča po parašolima seru tići. Puno je tote „forši”.

Ma njanke čovik sa šegunon, njanke kralj od Španije ki je doša poli Flenkovića, ne znaju koliko je tote uspomena. Ne znaju da san spod ladonje dubila na glavi kad san bila dite i delala zvizdu petokraku, da san spod krošnji špašiđala i kušeljala, čekala pretelice za poj u kino, da me spod ladonje Bepo prvi put bušnuja.

Par puti su i mene tići posrali. Ma ne bin zbog tega ubila drvo. Ne bin zela šegun, nego lapiš, i bin napisala jedan lipi haiku:

Na grani tići
stišću se i teple, a
zdol bile hrpe