ADIO, PUNTA PROMONTORE E GROTA DEI COLOMBI: Sti loghi meravigliosi una volta i iera nostri, ogi ghe li stemo consegnando ai turisti. Che i dormi in tei grataciei

No xe bel esser ipocriti e dir „i turisti no li volemo, che i vadi remengo“. Meo esser onesti e dir che el tursimo, forsi più del qulasiasi altra atività economica, el ga dado un grossa man nel portarghe el benessere ai istriani. Se no iera per el turismo, specie soto la Jugoslavia co la proprietà privata in tei afari più grossi no la iera amessa e co, teoricamente, tuti doveva viver solo dela paga,  saria sta dificile tirar su tute ste case che se vedi in giro e gaver qualche soldo in più in scarsela per andar a spenderlo a Trieste. Più tardi, con la Croazia, senza el turismo no saria stade né piscine, né l’abelimento de città, come Umago e Parenzo, che prima le gaveva sì un bel mar, ma anche case e strade disfade, né saria sta i soldi publici – ghe torno l’onor ale ecezioni - usai per sburtar la produzion del vin, de l’oio de oliva e la nascita dei agriturismi.

Senza el turismo, oggi tanti Istriani no i sarìa liberi de andar al bar e de meter in pìe altri afari, invesse de andar a lavorar in fabrica, albergo o uficio, al punto che, anche quel che iera uno dei mestieri de tanti Istriani, apunto quel de lavorar in tel turismo, no ‘l ghe interessa ai nostri giovani cussì che dovemo importar camerieri, coghi, receptionisti. Per no dir, come nota folkloristica, che ai tempi dela Jugoslavia tanti Istriani, solo grazie ai turisti (o ai parenti che i vegniva a trovarne de via, specialmente da l’Italia) i ga visto prodoti per l’igiene, dentifrici, sdraie, maschere per andar soto acqua, canoti, stramassi de bagno o gomoni che qua se li podevino solo sognar. Co i andava via, in tei apartamenti privati indò che i stava, i lassava almeno un tubeto fracà Colgate, un fià de Dash in tel fustin o una fiasca de plastica de Ajax, magari mesa svoda.

Ma quel che xe tropo, xe tropo. E co digo questo no go in mente el trafico intasà.  A Zagabria, Trieste e Milano, el casin che gavemo noi sule strade in luglio e agosto lori i lo ga ogni giorno, anche in novembre. Se volevino la bicicleta, alora dovemo pedalar, e dovemo esser noi a refar le strade, studiar soluzioni alternative e rinforzar el sistema idrico, fognario e de smaltimento delle scovasse perché le nostre infrastruture le xe misere, no le xe adate per soportar el peso de tanta gente. Se no savemo soli come far, domandemoghe consigli a qualsiasi comun austriaco, talian, tedesco o belga de 200 mila abitanti come che i fa lori ogni giorno tuto l’anno.

El problema dificile de risolver xe la tropa gente in spiagia. No tanto perché la ghe da fastidio ala nostra comodità, ma perchè la xe anche un pericolo per l’ambiente. Cioghemo l’esempio de Punta Promontore, una lingua de tera longa 5 o 6 chilometri, la punta più a sud de tuta l’Istria. Una volta co se andava a Punta Promontore pareva de andar in un logo esotico. Si, ti vedevi qualche turista, specie i Tedeschi i xe stai sembre bravi a trovar i loghi sconti e poco reclamisai, ti cucavi ogni tanto qualche nudista, ma per el resto, co ti trovavi el tuo posto sul sugaman sui scoi davanti a que bel mar, tuto intorno, né a destra, né a sinistra, per 50 metri no ti vedevi nissun. Adesso xe tuto carigo, 12 chilometri de perimetro de sta pinisoleta tuti batui de gente. Anche se là le strade no le xe sfaltade, ma xe solo sentieri e mulatiere, anche se i ghe fa pagar l’entrata ai auti, xe tanta de quela gente che par de esser a Woodstock solo sensa musica. Xe carigo.

Indo’ che xe tropa gente, xe un mal per la natura. Nela parte più a nord de Punta Promontore xe un parco naturale con 487 specie de piante (la Catapodium pauciflorum la xe stada trovata propria quà per la prima volta in Croazia). Xe una zona de prati sub-mediterranei con una grande diversità botanica, cressi anche le orchidee e piante a ris’cio de estinzion come la Pyrola rotundifolia, la Campanula tomentosa e la rarissima Chloraea alpina, che in Croazia se la trova solo Punta Promontore.

Tuta sta roba la ris’cia de perderse,  tropa gente, ormai, la ga scoperto la belessa del logo. Come i ga fato? Secondo mi xe una conseguenza dei social netuork.  Una volta, per farghe publicità a un logo, bisognava spender decine de milioni de lire (o decine de migliaia de marchi) per stampar in un giornal o far veder in televisone una reclam turistica, e iera bon se la vedeva qualche centinaia de migliaia de persone. Oggi, con Instragram, Facebook, Youtube a Tik Tok, gratis, nel giro de poco tempo e con le condivisioni, sti loghi i xe visti da decine o adiritura centinaia de milioni de persone. Semo condai a perder quel che una volta iera nostro.

La stesa roba la val per la Grota dei Colombi. Una volta conossuda solo ai Polesani, adesso la xe tempestada de gente, portada là anche da quei, nostri ma anche stranieri, che i organiza le gite in kayak. Desso i ga messo in mar le redi con i galegianti – i le ciama “bariere piscololgiche – per far star ala larga tute le ste barche: ben, xe sucesso che le barche le xe sempre là, con quela che 'desso le ga anche dove ormegiarse perché i usa le “bariere psicologiche” come spago per ligarse. Robe de mati.

Mi no so se i turisti stessi i xe contenti de quel che i trova. Magari anche sì, in sti ultimi ani se gavemo acorto che anche che come logo per dormir, a parte i alberghi, i campegi e i apartamenti privati in case vicin del mar, adesso ghe va ben anche passar le vacanze all’otavo pian de un grataciel in Siana. A mah…