CIACOLADA CON LA PETRA: Su Radio Pola ogni domenica un trasmission inteligente, tuta in tel nostro dialeto

Savevivo che da un fià de tempo, ogni domenica ale 4 e meza de dopranzo, su Radio Pola va in onda la trasmission “Ciacolada con la Petra”, tuta in dialeto istroveneto con la Petra Blašković? Se no savevivo, e poi ve perdè qualche puntata, no ste lamentarve che no ve go avisà.

La Petra Blašković la conossè tuti. Attrice polesana, con studi fati a Trieste e cariera da prim’atrice e diretrice (diretora?) con tante presenze in Istria e in tel teatro de Osijek, l’anno scorso la xe stada premiada in tela categoria cultura con le premio “Istriana” dela Region istriana.

Dele tantissime robe che la ga fato come atrice, drammaturga, regista, traduttrice, musicista, burattinaia, ve segnalo solo la dramaturgia (cusindo e imbastindo testi de Drago Orlić) e la regia del spetacolo “Da l’Istria con amor” messo in scena dal Dramma Italiano de Fiume, “Francamente”, intenso monodramma (el fa rider, pianser e pensar e per questo el val oro) dedicado ala grande atrice italiana Franca Rame, compagna de vita del premio Nobel Dario Fo e poi el grande lavor che la fa con i laboratori de teatro per i fioi.

Fia dela musicista de grande talento, maestra de musica e personagio radiofonico Siora Spia Arinka Segando e del cantautor (uno dei più bravi parolieri a livel xe jugoslavo) Franci Blašković, la Petra la xe cressuda vedendo mama e papà cantar e sonar prima in tel grupo Arinka & Tingl-Tangl, poi Gore Ussi Vinetou, e la studiava el pianforte. La se preparava a diventar pianista, ma dopo gaver recitado ala grande in tel spetacolo “Istriolina” (derivà dala “Locandiera” de Goldoni messo in pìe dai atori del Dramma Italiano e Elvia e Bruno Nacinovich con la mularia dela filodramatica musical “Compagnia del Caligo in Do Bemolle” del Circolo de Pola (in tempo de guera i ga impinì due volte de publico e treatro de Pola, ma anche quei de Trieste, Fiume, Umago, Lussin), la ga deciso de darse al teatro.

Ogi, quasi trentacinque anni più tardi, oltre a recitar in teatro e far film (la ga recità anche in “Hotel Pula” de Andrej Korovljev), sensa tirarse indriò da esibizioni ai festival de l’istroveneto e de l’istrioto, la ne porta la sua grande esperienza e charme anche in radio.

“Ciacolada con la Petra” no xe un trasmission dialetal tipo “ciò Toni, ciò Bep,i capussi e luganighe, che bel che iera una volta” fata intorno a quatro banalità e batude de seconda man dite in dialeto. La xe invesse una trasmission sveia, sgaia, nova e vibrante e sensa spussa de naftalina, fata, da una parte, da musica per intenditori (da Mario Delmonaco a Franco Battiato) e da l’altra de cultura, cronaca imbastida de curiosità, pensieri, testimonianze e inteligente recupero dele tradissioni, tuto in istroveneto, ma con l’eleganza che oltre a esser stile, la xe anche conoscenza de quel che se conta col microfono in man. Alora, bon ascolto a tuti