DIMELA CANTANDO XE EL NOSTRO SANREMO: Che bel che xe cantar in dialeto, vol dir che semo sempre vivi ancora quà

Co xe  finì Sanremo, el festival che una volta el iera una rassegna de bele  cansoni e che ogi el xe diventà più che altro un spetacolo televisivo,  no go podù far a meno de pensar che dal 2013 anche i Taliani de l’Istria e del Quarnero i ga el suo Sanremo: el “Dimela cantando”, organizado al interno del Festival de l’Istroveneto. De solito el se svolgi in magio in tre serate, una nel Veneto, una in tela parte slovena de l’Istria e la serata finale sempre a Buie con ripresa direta da parte de TV Capodistria.

Da qualche ano in quà a Sissan l'Unione Italiana organiza anche el festival dele cansoni in dialeto istrioto.

Xe vero, xe bel cantar “La mula de Parenso”, “Ciribiribin paghè una bira” e “La mia morosa vecia”, ma xe ancor più bel dar prova che in tei nostri dialeti se pol anche scriver cansoni che le se misura con i sentimenti de ogi, con i problemi de ogi, con le parole de ogi, oltre che con le musiche de ogi. E poi, come che ga dito qualche d’un, el bel dele cansoni xe che se dieci persone le scolta una canson ghe vegnerà fora dieci significati diferenti.

La poesia, un tempo regina de l’arte e del pensiero, ogi la se conserva più de tuto nela forma de testi per cansoni, questo perché la musica no la smeti mai de piaꭍer e mai la và fora moda. In altre parole, fin che se canterà in tei nostri dialeti, volerà dir che i nostri dialeti i xe ancora vivi.

Dimela cantando xe un bel evento. Anche de un certo spessor. Fin deso con Dimela cantando ga avù a che far anche personagi importanti del nostro microcosmo istrian: tra i cantanti Tamara Obrovac (che la ga vinto la prima edission), el triestin Stefano Hering (ga vinto anche lui), Irena Giorgi, Mario Lipovšek Battifiaca, Sergio Pavat, Sergio Preden Gato, Alba Nacinovich, Francesco Squarcia, Alida Delcaro, Daniele Ferro, Nevia Rigutto, Sara Salvi, Bruno Nacinovich, Patrizia Sfettina, Riccardo Bosazzi, Miriam Monica….

Tra quei che ga scrito i testi anche poeti come Elvia Nacinovich, Laura Marchig, Danijel Načinović e Tiziana Dabović, i giornalisti Valmer Cusma, Massimo Seppi e Sergio Settomini, i cantautori triestini, sempre presenti, Andrea Scarcia e Andrea Bussani. Tra i musicisti Samanta Stell, Maurizio di Capua, Mauro Giorgi, Edi Acquavita, Darko Jurković "Charlie", Gianni Signorelli. In giuria gente del calibro dell’etnomusicologo Dario Marušić.

Insoma, grasie al Festival de l’istroveneto e a quel de l’istrioto in tei ultimi ani se ga scrito sai cansoni bele e moderne i tei do dialeti.  Chi che ga la posibilità forsi el dovesi trovar el modo de farle girar de più e de farle trasmeter sai de più dale radio. Magari verꭍendo una radio aposta, che deso no costa sai.

Chi che vol scoltar le cansoni in dialeto dal 2013 fin al 2023 le trova qua. Chi che invesse vol partecipar al festival el ga tempo del farlo fin al 29 febraio.