DO PAROLE SU NAPOLEON: El film inverigolà, l'Istria riunida, i Venessiani che no i lo pol veder stampà et, voilà, le palačinke

Col fim de Ridley Scott Napoleon xe tornà de novo de moda, i scrivi de lui in tute le lingue, 'lora podemo farlo anche noi in tel nostro dialeto. No me intaresa tanto parlar del film – anche se do parole voio propio dirle – quanto piutosto ricordar che per oto ani anche l'Istria la xe stada soto el baston de l'imperador francese: pochi, ma ga cambià sai robe.

Anche se el dura 2 ore e 38 minuti, per chiunque saria sta imposibile contar in un solo film (ghe voleva un senegiato de dieʃe puntate) tuta la vita e le guere vinte e perse de Bonaparte, sto Talian de la Corsica che el ga volù eser Francese a tuti i costi.

Infati, el regista Scott el xe sta sai poco rispetoso de la storia: ma se xe vero che da una parte el gaveva el dirito de farlo e de sceglierse uno o due temi per mostarne, dal suo punto de vista, che omo che iera Napoleon, da l’altra no ‘l doveva tarscurar i momenti più importanti, quei decisivi per capir la biografia de sto grande general e condotiero.

Ridley Scott el ne ga volù mostrar la forza e la debolessa de Napoleon con un sitolo sotolo tra l’amor per la sua Giusepina e tre bataglie carighe de morti,  insoma un girotondo isterico e schizofrenico tra Eros e Tanathos, tra Amor e Morte tipico de tanta leteratura.

El problema xe che, saltando nel film quei momenti storici che no se doveva saltar, no se capisi da dove che vien fora la grandesa de Napoleon, no se capisi come mai uno come lui, che el iera fio dela Rivoluzion francese e contrario ala nobilità e ala monarchia, poi el diventa no solo monarca, tipo re, ma adiritura imperador. Questa xe la grande contradision che ancora ogi la fa discuter i storici, divisi tra ‘l considerarlo come un omo che ga portà avanti el mondo, o uno che invese lo ga fato tornar indrio.

Insoma, se ve interesa saver de più a proposito de uno dei personagi più grandi dela storia, no ste guardar el film (anche se l’interprete Joaquin Phoenix el xe bravisimo), guardè piutosto el documentario presentà da Alessandro Barbero, uno che le robe le capisi e le spiega sai ben.

Nel film, per esempio, la campagna d’Italia, che xe stada la prima vera grande vitoria de Napoleon, con ducati e principati che i vegniva trasformai in republiche, la xe nominada per tre secondi. Xe proprio nel corso de quela campagna (1796-97) che, dopo gaver vinto contro l’Austria (in quel epoca i Asburgo i iera imperatori de quel che se ciamava ancora Sacro Romano Impero), Napoleon el condana a morte la Republica Serenissima de Venezia cusì che l’Istria costiera, dopo 500 ani, la cambia paron.

L’Austria che ga tocà ceder a Napolen parte del Belgio e de l’Olanda (Paesi Bassi austriaci) e de l’Italia del Nord (Repubblica Cisalpina), ma in cambio el ghe ga lasà ai Asburgo Venezia, l’Istria e la Dalmazia. Xe per questo che i Venesiani ancora ogi no i lo pol veder stampà.

Sta roba la ga durà poco perché nel 1805, dopo gaver vinto de novo contro i Austriaci, stavolta ad Austerlitz, Napoleon se ga fato dar indrio Venezia, l’Istria e la Dalmazia e le ga incorporade nel Regno d’Italia. Per l’ocasion, nel 1806, el ga fato far una medaia in ricordo dela conquista de l’Istria: davanti se lo vedi lui, imperator e re, de profilo e con la corona de lavarno come Augusto, de drio invese se vedi el Tempio de Augusto de Pola e la scrita TEMPLE D’AUGUSTE A POLA, L’ISTRIE CONQUISE AN MDCCCV

Quasi subito ben 670 istriani i xe sta riciamai in tela gloriosa Grande armata de Napoleon, i xe andai combater in Spagna e tanti no i xe tornai indrio. Quasi mai nisun se ricorda de lori.

Novo cambio del confin nel 1809, dopo che l’Austria ghe ga tocà molar ala Francia anche la Contea di Gorizia, Trieste el Carniola. Cussì xe sta fato un novo stato, le Province Illiriche, sempre soto Napoleon, con capitale Lubiana; per la prima volta dopo 500 ani l’Istria ex veneta la xe stada unida a l’Istria austriaca, (la Contea de Pisin che dal 1374 la iera governada dai Asburgo) e a Trieste, tute insieme sai poco apasionatamente in un unico stato.

Sta roba la ga durà per soli quatro ani e poi de novo su e ʃo come la pele de l'ocio. Dopo la scotadura de iasso in Russia nel 1812, e dopo gaver becà bacalà a Lipsia nel 1813, Napoleon che ga dovù tornar l’Istria a l’Austria che poi la se la ga tegnuda fin al 1918. Inglesi, Tedeschi, Austriaci, tuti monarchici, no ghe stava ben che a cambiar l’Europa fusi quel picio caporal che 'l gaveva fato la rivolusion contro el re de Francia.

Coss' ghe ga portà Napoleon a l'Istria? Una dele risposte saria che el ne ga portà le prime forme de stato moderno: la fine del feudalesimo in te l’ Istria centrale (su la costa, soto Venezia, no ‘l xe mai sta), tribunai civili e no in man ala nobilità, el Codice Civile con el principio de uguaglianza de tuti davanti ala lege, l’anagrafe, i documenti personali (“carta di domicilio”) el matrimonio civile e anche el divorzio, pur disendo ancora che l’omo el ghe comanda ala dona. Napoleon el se la ga ciapà anche con i preti (serade sai cese e confraternite) e con i briganti, tanto che el famoso general Marmont li ga regolai per sempre.

E poi el ne ga lassà le omlette, che saria i amlet che deso ciamemo palačinke.