EL SPACHER, EL TITANIC E I ALBERI DEL LUNGOMARE. Do pensieri tra nostalgia e la cronaca nera dei pini taiadi a Valcane

Co qualche giorno fa go visto la foto del spacher che vedè in ‘sto articolo, me ga subito becà una fià de nostalgia. Stemo ‘tenti, nostalgia no vol dir solo un ninin del caldo intorno al cuor, nostalgia xe una parola che finisi per “algia” come tante malatie (nevralgia, sciatalgia, pubalgia) e la deriva dal greco  “algia”  che vol dir “dolor in un logo” e da  “nostos” che, sempre in greco, vol dir “tornar a casa”.

Cusì sta nostalgia, oltre a eser speso una bona scapatoia per giustificar una vita mal spesa, o un futuro con sai spini e poche rose, la saria un specie de dolor del ritorno a casa, o del dolor de no poder più tornar a casa. Xe sicuro che tornar in quela casa dove che de picio me scaldavo col spacher a legni (o spaher, per i Croati špaher, špahert, šporet, per i Serbi “Smederavac” perché i li produʃeva a Smederevo) no xe più posibile.

Ogi, per pur caso, xe  el 13 genaio che saria el compleano de mia nona, se la fusi viva la gavesi più de 130 ani e a casa nostra, a Pola, la dela vecia fabrica lucheti, el spacher el stava in quel logo che ciamavino “la cuʃina de nona” perché mia nona la stava con noi. Me ricordo de mio papà che el me insegnava impisar el fogo con carta de giornal, pici rameti o tochetini de legno ricavai dale casete per i fruti e la verdura.

Poi, co el fogheto el cominciava arder se sentiva quel rumor del legno ancor un fià umido che ‘l s’ciopietava, se sentiva el bon odor, el calduz el faseva tornar la voia de viver. Mi me giogavo con le molete, de scondon le metevo in tel fogo e poi in quela vascheta per l’acqua calda che la stava a destra, per veder la reasion de l’acqua che la domava el fero de boio, con el vapor che ‘l se sprigionava. Me ricordo anche dei loghi tondi do che se meteva le pignate, fati de tanti cerchi concentrici, anei de fero che se podeva meter o tirar via. E mi me pareva de veder dischi volanti.

Oservar quel spacher me ga fato anche tornar in mente el Titanic. Strano, ah? Alora, a Padul, in una caʃeta picia picia, stava un signor ansian, el iera el papà de un compagno de clase de mio papà (ala scuola “Francesco Petraca”, poi “Neven Kirac”, ogi “Siana”) e lui el 14/15 aprile 1912 el iera imbarcà sul “Carpathia”, la prima nave vegnuda in aiuto ai naufraghi del Titanic. Sto signor el stava sentà su una sedia de paia tacada al spacher a legni, el me ciogheva su i sui zinoci, el me contava la storia del Titanic, del fredo che iera quela note e mi guardavo el fogo del spacher contento de no star in tel oceano iasà e de no dover patir quel fredo.

Qualche ano più tardi, ma no gavevo ancora dieci ani, in tel giornal “Storia illustrata” che mio papà comprava a Trieste, gavevo leto un lungo articolo sul naufragio del Titanic e visto le foto de quel disastro. Xe sta el primo articolo serio che go leto in vita, o almeno el primo che me ricordo. Tra la storia che ‘l vecio signor me contava sentai vicin el spacher e quela leta in tel giornal, el Titanic se gaveva stampà dentro de mi, cussì co nel 1997 James Cameron ga fato el film con Leonardo DiCaprio e Kate Winslet e tuti xe corsi a vederlo, e tuti a parlar del Titanic, go avù l’impresion che i me stava portando via una roba che iera mia.

No poso taʃer un’altra roba. Ogi co go visto de novo la foto del spacher, no go provà nostalgia ma me xe vegnù in mente le tristi foto dei oltre 100 alberi che l’altra setimana i ga taià a Valcane. E più no i  iera alberi, ma casomai tochi de legno de arder in tel spacher. Sai bruto.

Voio dir subito che mi no son un de quei che i diʃi che i alberi se li devi salvar a tuti i costi. Se l’umanità no gavesi mai tocà un albero deso no gavesimo gnanche una cità o squasi. Però devo dir anche che nel 2024 i alberi che i xe de spostar se li podesi anche trapiantar vivi e con le radiʃe in qualche altro logo, sensa usar le seghe. Nel caso specifico, anche se i pini de Valcane no i xe autoctoni ma i xe stai impiantai dopo el 1945, non se pol far finta de no veder che el Lungomare de Pola, con la sua bela pineta, xe uno dei più bei loghi che gavemo e poche xe le cità che le pol vantarse de gaver un polmon verde, tanto pitoresco e tacado al mar, cusì vicin del centro cità.

Ma quel che più bruʃa, xe el fato che sti alberi i xe stadi taiadi, per volontà del municipio polesan, su un teren per el qual xe in corso una disputa tra la Cità de Pola e lo Stato (insoma, non se sa definitivamente de chi che el xe) e, peʃo ancora, sensa i permesi dele “Hrvatske šume“. Insoma, che el Municipio se meti a far robe contro le regole e contro la lege xe impensabile e fora de testa.

No go più el spacher a legni. Ma anche se lo gavesi, i tochi de legno dei alberi del Lungomare no li brusasi mai dentro. Saria come brusar una parte de noi.