I DUE TOMASO BEMBO: Curiosità su Valle e sui nomi dei nobili veneziani ancora presenti in Istria

El castel Soardo Bembo, el simbolo de Vale, xe uno dei trenta monumenti storici più importanti in Croazia. Ma chi iera sti Soardo e, specialmente chi iera i Bembo?

Le prime piere su logo del castel le ga messe i Romani, co Castrum Vallis la iera difesa da muri esterni. Poi, nel, XV secolo, la famiglia venessiana dei Nadal, originaria de l’isola de Torcello in tela laguna de Venezia, al posto del ponte che colegava due tori dei muri la ga tirà su quel che poi xe diventà la parte de davanti del castel. Alla fine del Quatrocento el castel el ghe va in man a un'altra famiglia de la nobilità veneziana, i Soardo che i iera de origine franco-piemontese-bargamasca.

Le robe cambia poco più de cento anni dopo, con nel 1610 Veronica Soardo, nata a Valle, fia de Lorenzo Soardo e de Margherita Sincovich o Siscovich originaria de Lupogliano,  la se sposa con Alvise Bembo e da quel momento el castel el resterà per 300 anni proprietà dei Bembo.

La nobilità de Venezia la gaveva 240 famiglie e le più nobili tra queste iera le quattro ciamade “evangeliche” e le dodici dite “apostoliche”. Con i Giustinian, i Corner e i Bragadin, i Bembo i fasseva parte dele famiglie evangeliche e, xa che ghe semo, agiungemo anche che i Polani, originari de Pola (Pietro Polani el iera stà doge de Venezia tra el 1130 e ‘l 1148) i iera una dele famiglie apostoliche. Eco le altre undici: Contarini, Tiepolo, Morosini, Michiel, Badoer, Sanudo, Gradenigo-Dolfin, Memmo, Falier, Dandolo e Barozzi.

Visto che scrivemo dei nobili de Venezia, me par giusto dir che famiglie nobiliari originarie dell’Istria, oltre che i Polani, iera i Semitecoli, i Erizzo, i Barozzi e i Baseggio (Capodistria / Trieste). De quel unità, anche tra persone e parenti, tra l’Istria e Venezia, cominciada ancora in tela famosa X Regio romana Venetia et Histria, ogi no xe restà più quasi niente, xe solo ancora qualche famiglia istriana con cognome che una volta portava i nobili de Venezia: Barbo (ogi presenti a Buie, orginari da Parma), Dandolo (ogi ancora a Rovigno, i vegniva da Padova), Ferro (a Dignan, originari dale Fiandre in Belgio), Morosin/ Morosini (a Dignan, i vegniva da Mantova), Rotta (Dignan e Umago, de Bergamo in origine), i Surian (in tel ’Istria orientale, originari da Acri, in Siria), i Tiepolo (a Pola, originari de Rimini) e i Guerra (a Dignan, in origine Dalmati).

Ma tornemo ai Bembo. Uno dei Bembo più famosi xe sta Pietro Bembo (1470-1547), poeta, prosador e protagonista della famosa “questione della lingua” (con i se spacava la testa per tentar de stabilir el standar de l'italian derivà dal latin volgare e dal Fiorentin), considerà tra i 12 più grandi scritori italiani de tuti i tempi.

Interessante, sarà un altro Pietro Bembo (1604-1646) quel che ghe darà vita al ramo istrian dela famiglia Bembo. Insoma, iera sangue francese, piemontese, lombardo, venezian e croato in Vincenzo Bembo, el discendente de l’union tra le famiglie Soardo e Bembo. Ma Vincenzo Bembo no ‘l gaverà eredi, cussì che Valle la ghe va a suo cugin Pietro Bembo e ala fine de tuto sto misto dominerà l'influenza veneziana.

La piazza principale de Valle la xe dedicada a Tomaso Bembo, ma de Tomaso Bembo fondamentali per la storia de Valle ghe ne xe stai due. Infati, dopo che Lorenzo Bembo el iera sta podestà de Valle per quattro volte (1706-1707, 1711-1712, 1716-1717, 1737-1738) fassendo, tra l’altro, far l’altar in tela cesa dove che se conserva le relique del Beato Giuliano de Valle, un Tomaso Bembo iera stà podestà soto Venezia, quel’altro sindaco soto l’Austria. Bisogna dir che dal 1706 fin al 1891 xe stadi sempre i Bembo (nove de lori) a gaver l'inacarico de podestà o sindaco de Valle, con la sola ecezion del 1742-49 co podestà iera Giovanni Balbi.

Dal matrimonio tra Pietro Antonio Bembo e la Emilia Paderni de Udine, a Venezia  xe nato Tomaso-Lorenzo (Tomaso Bembo I, 1725-1792), che nel 1750 el xe sta  el primo Bembo a viver stabilmente a Valle. Nel 1755 el se ga sposà con Francesca Masato de Rovigno, e i ga avù ben diese fioi.

Tomaso Giuseppe Maria (Tomaso Bembo II, 1819-1891) soto l’Austria el xe sta sindaco de Valle per quasi meso secolo. El ga avù el merito de far tante opere publiche, la scuola, el cimitero, el restauro della catedrale nel 1882. A lui ghe xe intitolada la piassa davanti a Castel Bembo che d’estate la diventa uno dei più palcoscenici soto le stele.

Per quel che riguarda la sorte dei ultimi Bembo istriani taco una parte del saggio "Il ramo istriano della Famiglia Bembo" del storico Carlo De Franceschi. E lo lasso in italian: "L’ultimogenito di Tommaso, Antonio (8 gennaio 1857 -19 marzo 1937) si laureò in legge ed esercitò il notariato a Rovigno, dove mori. Egli sposò il 17 giugno 1885 Giulia Borghi avendone cinque figli, tre femmine, di cui una morta bambina, e due maschi. Il primogenito, Tommaso, laureato in legge, di ampia cultura umanistica, giuridica e musicale, mori infoibato a Gimino nella notte tra il 3 e il 4 ottobre 1943, preceduto nel sepolcro, il 15 maggio 1938, dal fratello Gae­tano, distinto enologo. Scomparsa il 18 marzo 1941 Giulia Borghi vedova Bembo, le due figlie Francesca-Romana, mo­glie dell’ing. Ferdinando Calioni, e Caterina, moglie del dott. Carlo de Franceschi, in seguito agli avvenimenti che portarono alla perdita dell’Istria, si trasferirono con le loro famiglie a Venezia, culla dei loro avi. Tommaso e Gaetano morirono celibi e Francesca, deceduta a Milano il 12 gennaio 1958,, lasciò un figlio e una figlia, i quali, pur non portando il cognome Bembo, insieme alla zia Caterina sono gli unici discendenti del ramo istriano di questa casata, sola tra le patrizie venete ad avere sin dai tempi della Repubblica stabile propaggine nell’Istria, dove lo stemma secentesco apposto tra le quadrifore del pa­lazzo di Valle (...) testimonia un passato che con queste note ho vo­luto salvare dall’oblio".