L'America xe qua in Istria, altrochè!

L'altro giorno con un mio colega ciacolavimo de le spiage. Un pò influensadi dal discorso de tuta sta devastasion che xe presente nei ultimi ani in Istria, se gavemo meso a ciacolar su sta roba. E cusì, dopo gaver finido de parlar, me son mesa a pensar. Me xe vignù in mente de le nostre bele spiage istriane, de come che le iera una volta co mi iero fioi e de quando co iero giovane andavo al mar con la compagnia coi motorini.

No savaria dir quante spiage de l’Istria che go visto co iero picia. So solo che ghe ne go viste tante. De fioi con un mio sio de l’Italia de estate andavimo al mar dapertuto. A lui ghe piaseva andar praticamente ogni giorno in un’altra spiagia, a esplorar tuti i posti posibili e imaginabili. Da su a zo per tuta la costa istriana.

Forsi quela volta no me rendevo conto de tuta la belesa che gavemo, ma ogi, che son più grande, capiso che vivemo in un posto meraviglioso. L’Istria xe el paradiso in tera e sfido chiunque a dir el contrario.

De picia andavo al mar più de tuto a Valbandon (de quela parte do che xe ancora ogi i polisioti). No xe tra i posti più bei del mondo, ma me xe quel più vicin e quindi più comodo. Ad ogni modo, per mi xe un posto belisimo perchè el me liga ai ricordi de un tempo che no tornerà mai più. Me ricordo che là iera el bar e el ristorante, iera el campegio e un grande scivolo. Iera anche el campo per giogar a boce, e me ricordo che i omi i giogava sempre. El campo de boce xe ancora, ma no credo che se gioga, almeno no come una volta. Al mar a Valbandon vado ancora ogigiorno. Xe quela grande pineta che, specialmente per chi che sofri el caldo, la val oro.

Andavo speso anche a Stignan che secondo mi ga una spiagia stupenda, specialmente de quela parte do che xe el buncher. Al mar a Stignan andavo anche de giovane con la compagnia. Là xe un pin de dove che se butavimo in mar, almeno quei più coragiosi. Penso a tute quele volte che se podevimo meter in disgrasia co fasevimo ste stupidade. Deso no me butaria gnanche se i me pagasi cariole de soldi.

Me piaseva tanto andar a Castelvecio (Stari Rakalj), là do che xe la ceseta de Santa Agnese. A parte el panorama stupendo che se godi co ti son su quela pendensa, el mar e la spiagia xe meravigliosi. Te par de esi in una cartolina. La stesa roba podaria dir per Promontore, o Sisan, o Lisgnan, o...

Podaria star qua a parlar ore e ore de le nostre spiage e del nostro mar e lo steso no saria suficiente per elencar tuti i posti incredibili che gavemo. No so se tuti se rendi conto che richesa che xe l’Istria.

Cedo la parola a Velan...

A proposito de spiage mi volaria dir due parole su quei che de spiage vivi, indiretamente. In sti giorni i xe tornadi. Ecoli qua lungo le rive de Rovigno: ognidun con i sui tavoli e tavolini, le careghe, le tovaie. Tuti che se sera in t’ei scagni, come gransipoveri. I meti paraventi, vasi de fiori, colone finte, tuti nei propri perimetri a un metro del mar. I xe tornadi tuti grasi e abronzadi, i ga svernà nei paesi tropicali, i ga fato tanto sport su la neve, i ga consumà un poco de soldi e adeso i torna a far el pien e Rovigno la torna a eser proprietà privata. De inverno la cità xe roba del comun e quindi roba de nisun, de estate la diventa la cità de i sfrutatori de le spiage e de quele do cale, androne, corte e piasete che ne ga lasà i veci, che a Ruveigno i ga deì "barbani".

El turismo cementeria tuto, xe la logica de la ingordisia, per vender de più i distrusi etari de mar. Xe asurdo: xe proibì bater datoli ma no xe proibì cementar la costa o impinirla de sasi de fiume, tondi come ovi de Pasqua. Alora, sti imprenditori del turismo adeso i comincia a lavorar, per i prosimi quatro, cinque mesi i tirarà le corde, in setembre i tornarà palidi e magri e col tacuin pien, i ingrumarà tavoli e sedie e i tornarà de dove che i xe vignudi.

Una volta a Rovigno se andava con la barca sui scoi e su le isole. Ti caminavi discalso o "dasculso" su i sasi impuntadi, ti butavi el sugaman su qualche piera lisa e ti ciapavi el sol. Ogni tochetin de costa ga el suo nome. La toponomastica rovignese la xe molto rica, el defunto Giovani Pellizzer el ga fato un libro sui toponimi de la costa.

Soto la casa dove che son nato xe i seguenti nomi, da sud a nord: Arno, Puntuleina, Cuguliera, Purtisol, Bus dei fulpi, La ricia, La baluota, El taio, La lantierna... Xe quel che me ricordo e de ogni posto conoso ogni saso, sensa cemento, al naturale.