LA MAGIA DEL CALCIO: La partida de balon come metafora dela vita, magari de una vita solo imaginada

Stasera ale 6 l’Italia la gioga la partida dei otavi de finale ai Europei de calcio contro la Svizzera e meʃo Bel Paese starà tacà davanti ala television. Quanto che a sto sport, definido tante volte come “la roba più importante tra le robe non importanti” i ghe tien in Italia, lo ga visto ben, sepur in modo ironico, Winston Churchill co’ ‘l ga dito: “I Taliani co ‘ i perdi una partida de calcio ghe par de gaver perso una guera, co’ i perdi una guera ghe par de gaver perso una partida de calcio”.

Ma no xe solo i Taliani mati per el balon, el calcio el ga qualcossa de magico che el meti insieme richi e poveri, operai e profesori, scienziati e artisti, preti e gente indiavolada. Come mai? Forsi perché el se liga ai bisogni e ai istinti primordiali de l’omo, forsi perché el sodisfa quel bisogno de imaginarse un vita paralela (magari anche più bela de quela vera) xa spiegado quasi novanta anni fa dal filosofo olandese Johan Huizinga che nel suo libro “Homo ludens” (L’omo giogatolon) el ga notado due robe. La prima xe che in tei gioghi l’omo vedi un mondo imaginario diferente dal mondo reale e per questo, agiungo mi, dopo una certa età, i masc’i, per scampar dale scopole dela vita i continua a giogar e le femine, invesse, sai più realiste, le xe seriamente concentrade sulla sicuressa e la stabilità per se stese e per i fioi e al gioco le guarda con sospeto. La seconda roba che diʃi Huizinga xe che ‘l giogo (e gioga anche le bestie) xe uno dei fondamenti del’organizazion sociale e, come che diria una mia amica, della sua stabilità psichica.

In psicologia esisti una roba che se ciama Piramide de Maslow che la descrivi i bisogni (che a volte i xe istinti)  fondamentali de l’omo: bisogni fisiologici (fame, sede, sono, gabineto, movimento, conservazion dela specie – ma mi agiungeria anche el bisogno de sfogarse o de far festa), bisogni de sicureza (casa, stabilità contro i istinti de paura e de ansia), bisogni de apartenenza (amor, amicizia, eser parte de qualcossa insieme ai altri), bisogni de stima e autorealizzazion (esser sicuri dela propria identità, gaver suceso e la voia de vinser la concorensa) e bisogni estetici (le pepite che le se tarsforma in anei e colane, un teto sora la testa che 'l se trasforma in architetura, el magnar che 'l se trasforma in delizia gastronomica, l’utile che 'l vien adornà col bel). Uno dei difeti de sta piramide xe che no la tien conto del bisogno de imortalità e de l’istinto dela paura del futuro e del bisogno de trovar risposte a quel che no se capissi che ‘l xe sta ala base dela comparsa de tute le religioni.

Se guardemo ben, el sport el ghe da una risposta a quasi tuti ‘sti bisogni e istinti: el sodisfa el nostro bisogno fisiologico de moverse e de sfogarse con un urlo per un gol segnà o sbaglià (mi el gol del 3-2 de Paolo Rossi al Brasile nel 1982 no me lo dimentico mai più), a quel de apartenenza (basti pensar a quanto che a volte i va fora dei copi i tifosi de una squadra, o ala isteria coletiva con gioga le nazionali), al bisogno de stima e autorealizzazion (el saver de eser diventà campion, la contentesa del gol, la festa per la vitoria, el tifar per la squadra giusta) magari ingrumado dala nostra squadra del cuor, co’ no se xe boni de gaver suceso soli noi stesi. El calcio el ghe dà una risposta anche i bisogni estetici tanto che Pelè el ga dito ben che “el calcio xe musica, danza, armonia, e no xe niente de più alegro de una bala che rimbalza”. Infine, el sport el xe perfeto per tegnir vivo el bisogno de imortalità: tuti quei che i gioga qualche sport l'imortalità i la sogna, qualchedun tra de lori – Pelè, Maradona, Crujif, Gigi Riva, Mohammed Alì e tanti altri, anche se i xe morti, no i morirà mai.

El calcio, come tuti i sport, el xe regolà dala voia de vinser contro la concorensa e per questo se podesi adiritura definirlo come fenomeno capitalistico che, ragionando per estremi, el saria sta de proibir nei paesi ex comunisti, dove che tuti i iera “uguali” e ‘lora tute le partide le gavessi dovù finir con un paregio.

Ma in realtà la voia de vinser la concorensa la xe precisa in tute le clasi sociali. Ma se per giogar golf, tenis o sciar ghe vol spender soldi per comprar bastoni, sci e rachete, per giocar calcio basta una bala. E una bala se la pol far con tuto, con strasse, calse vecie, tochi de coperton, grumi de iasso come sul Titanic. Co ne mancava el balon, mi steso go giogà tante partide co’ per bala cioghevino un tapo de fiasca, una saso, una savata. La bala la ga qualcosa de speciale tanto che, come che diʃeva Pelè, chi che gioca, con la bala el ga un legame sentimentale.

Se el truco del suceso el sta nela bala, come mai el calcio el xe sai più praticà e ben volù del basket o dela palamano, anche se l’omo con le gambe no ‘l fa quasi niente e con le mani el fa quasi tuto: el lavora, el monta, el smonta, el ingruma, el spela, el se grata, el magna e ‘l fa de magnar, el bati sui tasti dela tastiere e del telefonin…

Per la palamano mi diria che se prova sai più sodisfasion e sfogo a darghe una piada ala bala che tirarla con la man, per la palacanestro me par che sia più facile ingrumar do piere o do scarpe per segnar la porta (o "segnarla" tra due alberi) che trovar un canestro dele misure giuste e un pal per montarlo. Eco perché el calcio se ga podù giogar in ogni canton, in strada, in piassa, sui prati, sul piasal davanti la cesa, nei coridoi de scola.

E a livel profesionistico? Come mai la palacanestro, che con i sui risultati tipo 100-99 la ghe da sodisfasion al bisogno de costante adrenalina presente in tel’omo, pur esendo seguida, no la ghe riva gnache vicin al calcio?

A parte el fato che de fioi xe sta sai più quei, per i motivi de semplicità che spiegavo prima, che i ga giogà a calcio invesse che a basket, a parte al fato che per la sua semplicità de gioco e de far tifosi (el famoso senso de apartenenza) ogi el ga una più grande copertura mediatica, la partida de calcio, che la sa finir anche 0-0, la xe più compatibile con quela lunga agonia, tipicamente umana e ancor de più cristiana, che la gente imapurida de la morte la prova davanti al dubio se ala fine andaremo in inferno, purgatorio o in paradiso. Uno, ics, due.

Ma oltre a una sua motivazion, ma anche ritualità, che se pol definir religiosa, el calcio el seduʃi la gente anche con la sua teatralità. Andar veder una partida in tel stadio xe come andar in teatro, rider o pianser guardando una vita che no xe la nostra, una vita imaginaria che sai volte la xe balsamica per i dolori del vita reale.

El calcio xe scienza, xe arte, no basta corer, ghe vol gaver anche una certa inteligensa calcistica (se pensi a certe giogade de Maradona, Platini, Zidane, Van basten, Savičević, Baggio, Pirlo, Ibrahimović, Modrić, Messi) e vederla e riconoscerla da spetator xe un vero godimento.

Oltre a esser divertimento, el calcio el ghe da risposta anche a un bisogno incofesabile de l’omo; quel de vinser a tuti i costi magari imbroiando, quel de romper le regole anche in maniera disonesta, a quel bisogno de machiavelismo de cui l’omo no se libererà mai.

E poi, infine, xe la voia dela sorpresa, a volte vinsi anche la squadra più debole. Una volta, co ala fine de l’intervista un giornalista ghe ga dito “vinca il migliore” al mitico alenador del Milan, el triestin Nereo Rocco, lui el ghe ga risposto: “speremo de no”.