LA PASSARETA: Rossa, bianca, verde e sassi che rimbalza sul mar

Ala famiglia Ferenčić de Pisin bisogna farghe i complimenti perché ancora ogi i ga in produssion una delle bibite più famose de l’Istria – la passareta. Però ghe vol meter i puntini sule i.

Xe sbaglià dir che sto anno xe cento ani de quando che gavemo la passareta. Nel 1924 i Ferenčić i ga verto la propria distileria de bibite analcoliche, ma la prima passereta de Pisin no la ga visto el mondo prima del 1929.

Xe sbaglià dir anche che sto ano dovemo festeggiar i cento anni dela passereta. I la faseva xa prima a Fasana. Nel 1897 proprio a Fasana Rodolfo Marincovich el gaveva verto la sua "Premiata distileria e fabbrica liquori", suo fradel Giacomo nel 1905 una fabrica de aʃedo e caramele e qualche anno più tardi, in tela casa Sfecich in riva, el ristorator Vittorio Privileggio el verʃi el ristorante “Ai bagni”  e una distileria de acque minerali: in base a quel che scrivi el giornalista Zvjezdan Strahinja (quel dela pagina facebook "Pulske štorije") per el portal infofazana, in quel momento saria nata la passareta. Bisogna dir che, nel lungo necrologio de l’Arena de Pola in ocaʃion de la morte de Vittorio Privileggio, a Mestre el 2 aprile 1965, la passareta no la vien nominada, ma anche che esisti le foto delle fiasche dela passareta prodota da Privileggio.

Una volta in Istria esistva tante distilerie. Solo a Pisin ghe ne iera quattro, famosa per le sue distilerie iera Rovigno, e l’Arena de Pola la nomina anche la fabrica de pasarete de Domenico Gorlato (dal cognome, probabilmente de Dignan, ma el gaveva la distileria a Pola). A Fasana ghe va el merito de gaverne trasmesso la passareta cussì come che la intendemo ogi: una bibita frizzante, dolce, rossa, al gusto de naransa. Questo perché dopo el 1947 la distileria Marincovich la diventa prima proprietà dela fabrica de pessi “Mirna” de Bagnole che la ga lavorà co ‘l nome "Fažana" - Destilerija, tvornica likera i sirupa Fažana (Pula) - (ex Marincovich), per pasar nel 1963 ala Badel de Zagabria. Sarà proprio la Badel, che a Fasana la produʃeva, tra tante bibite, anche la Cocta, la Pepsi, la Nara e l’Inka, a trasmeterghe ale generazioni del dopoguera, fino ai primi ani 2000 co i cessa del produrla, l’imagine dela passareta solo rossa.

In realtà la passareta la nassi come una delle versioni della “gazzosa” italiana, come version aromatizata del “sifon” (seltz) che el serviva per far el spritz. E la nassi in tanti gusti e colori. I Gorlato i la fasseva  bianca de acqua gasata, rossa de frambua, verde de menta.

Fino al 1935, co compari el tapo, le fiasche dela passareta le iera tapade con una s’cinca che bisognava sburtar co ‘l dito per farla cascar dentro, e in quel momento, per via de l’anulamento dela presion interna negativa, bona parte dela bibita la ‘ndava persa. No iera un bon sistema. Indiferente, i fioi andava mati per ste s’cinche, ma per gaverle bisognava spacar la fiasca. Xe testimonianze de muli che i andava a Vincural, in tel scovazon dele Cave Romane, in serca de fiasche de passareta rote sperando de trovar qualche s’cinca ancora intrapolada in tel colo dela fiasca, o le etichette “Cirio” e “Arrigoni” (altre marche de passereta de quel tempo) che bisognava tacar in un album sperando de becar un balon de calcio de pele.

Una volta, a Valcane xe vegnuda ‘diritura la Croce Rossa per portar in ospedal un picio che e’l se gaveva taià sui vetri de fiasche rote de passareta butade sul fondo del mar. E xa che parlemo de mar, a chi segui sta nostra rubrica in dialeto imagino che no ghe ocori dir che “far passarete” vol dir anche far rimbalzar sula superficie del mar i sassi lissi e levigai, come pice piastre. Più lissi che i xe, più passerete i fa, se se xe boni de lanciarli in orizontale, piegando el corpo.

Bisogna dir, infine, che el nome “passareta” el se usava anche in Friul, la vegniva distilada dala ditta Blanch&Russian a Mossa (Moš in Sloven) sulla riva destra del fiume Isonzo. Ogi, però, la passareta la xe una bibita tipica solo de l’Istria, e ala famiglia Ferenčić de Pisin ghe va de novo i nostri complimenti per gaver volù e savù mantegnir la produzion de una bevanda che, grassie a lori, ogi gavemo solo noi.