La trapolada dele elezioni e 'l coragio de Nino Benvenuti

Dele elezioni de l'altra domenica saria de dir un quintal da robe, a partir dal fato che la Dieta, perdendose per strada, la ga perso un mucio de voti e che i socialdemocratici de l'SDP, che in Croazia i ga perso quasi per tuto, i ga vinto solo in Istria. Come se no bastassi, i dietini i ga deciso anche de consegnarghe Pola, su un piato de argento, a l'SDP, aversario storico, invitando i propri eletori a darghe el voto al candidato socialdemocratico a sindaco de Pola al secondo turno dele elezioni. Anche Možemo de Pola, che i sposteria mari e monti per impedir che se fassi l'albergo a Valcane, i ga invità a votar per chi che quel albergo lo ga volù. Che falope! Se vien a saver anche che el redivivo Nino Jakovčič, ex presidente della DDI, el xe convinto che la Dieta la dovessi andar a brasseto con l'HDZ. Bon, me ricordo che co più de venti anni fa Radin ghe gavevà dado el sostegno al governo HDZ, tanti dietini ga urlà “tradimento”. Cussì va le robe.

Quel che me premi dir de più riguarda el numero dei Italiani che i ga esecità el dopio voto votando anche per i vicesindaci (e la vicepresidentessa della Region) italiani. E me premi dirlo considerando che a a Buie ga votà ben el 40,46% dei eletori, el 57,88% a Dignan e 61,21% a Verteneglio (dati in linea o sai meo dela media nazional), ma solo el 18,75 % dei eletori a Pola.

Mi vedo due robe. La prima xe che in tei loghi più pici de l’Istria, indò che l’italian se lo senti ancora parlar in strada e no ‘l da ‘impression de esser inutilizabile in tela vita quotidiana, anche le giovani generazioni de Italiani le senti el senso de apartenenza. Nei loghi più grandi, come a Pola (solo el 18,75%, come che gavemo za dito), Parenzo (17,1%) e Rovigno (31,28%), dove che l’assimilazion xe più grande e l’italian el se ga ormai smagnà come una piera sporgente soto a una cascata insistente, le generazioni più giovani no le mostra sto atacamento, anche perché con l’italian le pol socializar sai poco. E xe sai poco de far per fermar sto trend, ormai xe destin de finir in tel bidon dele scovasse dela storia.

La seconda roba che volevo meter in risalto riguarda la dinamica del voto. Le persone che le consegnava le schede eletorali ai segi le ga avù precise indicazioni de no darghe spontaneamente ai Italiani (anche se i podeva veder che i gaveva sto dirito) le schede per el dopio voto, ma de consegnarle solo su richiesta direta de quei che vegniva votar. Dito en passant, no credo che questa sia stada una misura fata aposta per colpir i Italiani, ma piutosto per evitar brute sorprese in tele zone più a est in Croazia.

Fato sta che a Pola solo a due dei cinque candidati a vicesindaco italian le schede per el dopio voto le ghe xe stade consegnade spontaneamente. Xe sta anche chi che, dopo gaver votà solo generale, una volta acorto che el podeva votar anche minoritario, co el xe tornà indrio no i lo ga lassà votar disendoghe “sad je prekasno, gotovo je”, tipo “la prima risposta è quella che conta”, come se fossi in balo un quiz de Mike Bongiorno. Xe sta persin gente che lavorava al segio, che acorgendose che stava votando un italian che no ‘l gaveva (perché no’l saveva de gaver sto dirito) domandà le schede per el dopio voto, el ga preferì no far o dir niente per paura dei rimproveri dei altri coleghi del segio.

Ben, provemo imaginar una roba, dimenticandose del voto del voto minoritario e considerando solo  quel general. Alora, domenica, per el voto generale, se becava quatro schede: una per el sindaco /sindaca, una per el consiglio municipal, uno per el “župan / županica e una per l'assemblea regional istriana. Mi me domando, se al segio i ne gavessi consegnà a tuti i eetori solo le schede del sindaco e ‘l consiglio municipal, quanti de noi ghe gavessi domandà “deme anche le schede per la region”? Sai pochi, diria mi.

La soluzion? Le speranze de cambiar qualcossa con la politica le xe pari a zero. Forsi el marketing podessi iutar. Fra quattro anni l'Unione Italiana la dovessi pagar, i ultimi dieci giorni prima dele elezioni, una reclam da publicar in talian e in croato in tuti i giornai e i portai de l'Istria, ricordandondoghe a tuti de domandar le schede del dopio voto, magari fasendoghe presente ala gente che ale aministrative no se vota in tei circoli.

Nino Benvenuti

Del grande bocser istrian Nino Benvenuti, forte e bel come un ator de Hollywood, morto pochi giorni fa, ormai save tuto e no voio farve leger de novo robe che gavè xe leto. Ve consiglio solo de guardar su Youtube el video in cui, al minuto 9.08, dopo esser finì KO due volte con l'argentin Monzon, el dimostra tuto el suo coragio e la voia de continuar a combater dandoghe una piada al sugaman che el suo alendor el gaveva butà in tel ring in segno de resa. E me premi dirve che solo questo nostro portal Istra24 e La Voce del Popolo xe sta i unici due giornai in Croazia (Istria compresa) a dar la notizia che Benevenuti el iera morto. Insoma, per la magioranza qua la storia le comincia in tel 1945. Cussì va el mondo...