LE MEDAIE ISTRIANE ALE OLIMPIADI: In cento anni, nove ori, cinque argenti e cinque bronzi

Xe pena cominciade le Olimpiadi de Parigi e go leto che, rispeto al numero de abitanti, Spalato xe la prima cità al mondo per vincitori de medaie olimpiche. E come stemo noi in Istria? Se la cavemo ben, se podessi dir.

Dale Olimpiadi de Amstedam nel 1928 fin ogi i Istriani (atleti o nati in Istria o vissudi per la magior parte in Istria) i ga vinto 9 medaie de oro. Vedemole.

La prima la riva nel 1928 a Amsterdam, in tel canotagio, con el "quattro con el timonier "della società Pullino de Isola. L'equipagio el iera composto da G. Deli se, N. Vittori, G. Deste, V. Perentin con R. Petronio che 'l stava al timon. Nel 1936 a Berlino eco che el Rovignese Luigi De Manincor el fa valer la tradission dela sua Rovigno e ‘l se grampa la medaia de oro in tela vela classe otto metri.

Dopo la fine dela Seconda guera mondiale, el primo istrian a vinser un oro olimpico sarà el bocser de Isola Nino Benvenuti, a Roma nel 1960, batendo per l'Italia. Dodici anni dopo, a Monaco de Baviera, sarà de novo un bocser a vinser l’oro: Mate Parlov, con la canotiera dela Jugoslavia. Sia Benvenuti che Parlov i diventerà campioni del mondo tra i professionisti. Nel 1984 a Los Angeles, Parlov xe sta anche el selezionator dela nazionale jugoslava de bocs e a quele olimpiadi i bocseri jugoslavi i ga vinto un oro, un argento e due bronzi.

Giogando per la nazionale jugoslava de palacanestro, a Mosca nel 1980, la medaia de oro la va torno al colo del polesan Željko Jerkov che al ga fato una grande cariera con la Jugoplastika de Spalato. L’ultimo oro olimpico istrian nel XX secolo lo vinsi Valner Franković de Albona con la nazionale croata de pallamano.

E sarà proprio la pallamano che la ghe porterà a l’Istria el primo oro olimpico del novo milenio, ad Atene nel 2004, con l’alenador dela nazionale croata Lino Červar, nato a Delići de Orsera ma naturilizà Umaghese. Le ultime due medaie de oro le riva a Londra nel 2012: a vinserle sarà un giogador dela nazionale croata de palanuoto, el Polesan Damir Burić e quel Giovanni Cernogoraz de Citanova, campion de tiro al volo col s'ciopo, che ieri el ga avù l’onor de portar la bandiera croata ala sfilata de apertura dele Olimpiadi de Parigi.

A queste 9 medaie de oro se poderia agiunger quele de oro vinte nel 1936 dal bocser fiuman Ulderico Sergo nei pesi galo, da Abdon Pamich, altro Fiuman, nela marcia (caminada svelta) a Tokyo nel 1964 e specialmente quela vinta nel 1952 a Helsinki dal Lussigan (e Lussin fasseva parte della provincia de Pola) Agostino Straulino che in copia con Nicolò Rode i ga vinto la gara de vela in tela classe star per la nazionale italiana. Gente che parlava istroveneto. Straulino xe poi diventà amiraglio dela marina italiana.

Cinque xe le medaie de argento. La prima xe quela in tel canotagio, el quatro col timonier,  vinto nel 1932 a Los Angeles per l’Italia da l’equipagio della Libertas de Capodistria composto da R. Divora, B. Parovel, G. Plazzer, B. Vattovaz e G. Scher al timon. La seconda xe quela dei cestisti Vinko Jelovac, nato a Jelovci vicin de Antignana, me el stava per un certo periodo a Orsera, e Željko Jerkov che nel 1976 a Montreal i ga perso la finale de palacanestro contro i Americani.

La terza e la quarta medaia d'argento istriana la ga vinta el velista capodistrian Vasilij Žbogar in tela classe Laser nel 2008 a Pechino e in tela classe Finn nel 2016 a Rio de Janeiro. La quarta la ga vinta el Polesan Damir Burić, sempre a Rio, nel 2016, con la squadra croata del palanuoto. Anche in 'sto caso ghe volessi agiunger l’argento vinto dal Lussignan Straulino nel 1956 a Melbourne.

De bronzi ghe ne gavemo anche cinque. Nel 1932 a Los Angeles in tel canotagio, remando per la squadra "quatro senza" dell'Aniene de Roma, xe rivà terzo Giliante Deste (nato a Capodistria o a Isola d'lstria nel 1910). Ale famose Olimpiadi del 1936 a Berlino, quele filmade da Leni Riefenstahl, el Rovignese Silvano Abbà el ga becà la media de bronzo in tel pentatlon moderno, a quele de Seoul nel 1988 el bronzo nela categoria de bocs de mediomassmii lo vinsi el polesan Damir Škaro.

Ale Olimpiadi de Barcelona nel 1992 terzo xe rivà el canotier capodistrian Sašo Mirjanič nel quatro senza timonier per la nazionale dela Slovenia. Un altro Capodistrian, Vasilij Žbogar el ga vinto el bronzo in tela classe laser de vela nel 2004 a Atene. Anche stavolta dovemo agiunger un Fiuman, sempre Abdon Pamich che nel 1960 el xe rivà terzo in tela marcia a Roma nel 1960.

In tuto saria 19 medaie vinte dai Istriani più altre tre vinte da Fiumani e altre due dai Lussignani. I sport che na va meo xe el canotagio, la vela e la bocs. Forsi andassi anche contate la medaia de oro, de argento e le due de bronzo vinte dai boscseri jugloslavi nel 1984 a Los Angeles indo' che per alenador i ga avù el Polesan Mate Parlov.

Xe tanti i sportivi istriani che, pur sensa vinser medaie, i ghe ga fato onor a l'Istria ale Olimpiadi: i ciclisti de Lavarigo Nevio Valčić (Roma, 1960) e Cvitko Bilić (Monaco de Baviera 1972) e quel de Sissan Bruno Bulić (Mosca 1980 e Los Angeles 1984), ma anche el nudador de Rovigno Giansandro Rudan (Monaco 1972), l'atleta polesan Milovan Savić (Mosca 1980 e Los Angeles 1984) per la nazionale Jugoslava, el bocser Stipe Drviš (Atlanta 1996) e le palavoliste polesane Biljana Gligorović, Beti Rimac e Ingrid Siscovich e la parentina Gordana Jurcan a Sidney nel 2000 per la nazionale croata, el Rovignese, portier de palanuoto, Goran Volarević ad Atene nel 2004. Xe de nominar anche la Polesana Mateja Petronijević che nel 2008 a Pechino la xe stada la prima velista croata ale Olimpiadi.

Xe sta tanti poi i Istriani che i ga partecipado ale Olimpiadi prima del 1945, per la nazionale italiana, a partir dai primi due: l'atleta polesan Vittorio Zucca e 'l nudador de Orsera Antonio Quarantotto che nel 1920 i se ga presentà ale Olimpiadi de Anversa.

Poi ghe ga tocà al nudador Giuseppe (Nino) Perentin de Isola, che nel 1928 a Amsterdam el ga nudà nei 400 e 1500 metri in stile libero, poi al Polesan Mario Novelli che nel 1936 a Berlino el fasseva parte dela nazionale italiana de palacanestro, stesso sport del Capodistrian Valentino Pellarini che, sempre per l’Italia, el ga giogà ale Olimpiadi de Londra nel 1948. A Londra xe stai anche el canotier Francesco Dapiran de Rovigno, che el vogava nel dopio e Livio Urbani de Pola in tela ginastica, che però no’l ga garegià perché el se ga fato mal.

Quatro ani più tardi, nel 1952, a Helsinki xe stai in gara l’atleta rovignse Gianni Paliaga (el coreva in tela stafeta) e Ariedo Gimona, calciador dela nazionale italiana nato a Isola. Xe giusto nominar anche el Fiuman Luciano Sušanj che ale Olimpiadi de Montreal nel 1976 el xe rivà sesto nela finale dei 800 metri. Due anni prima el iera diventà campion europeo a Roma rivando primo, solo e con grande distaco, davanti al grande Steve Ovett, con el favorito, el Talian Marcello Fiasconaro, secondo fin a 20 metri dala fine, che poi el cedi e'l resta fora dal podio.

Ma me piasi finir con uno che no xe Istrian, con un Dalmata nato a Ragusa (Dubrovnik) che ‘l ga sempre dichiarà de far parte del “popolo Giuliano”: el stilista de moda Ottavio Missoni, quel dei maioni colorai. Ale Olimpiadi de Londra nel 1948 el xe rivà sesto nella gara de corsa sui 400 metri con i ostacoli. Disciplina in cui el xe stà tre volte campion d’Italia: nel 1941, 1947 e nel 1948.