MINACE DE BOMBE IN EUROPA Un ambaradan de comploti e de ciacole: le bombe le iera false, ma le paure le xe vere

L’11 novembre, in Italia, più de sie mila scole le ga becà messagi che anunciava atachi bombaroli. Centinaia de scole le xe stade evacuade. Minace come questa le xe rivade anche in Irlanda e in Gran Bretagna. No i ga trovà gnanca una bomba, ma la paura la xe rivada ai putei, ai maestri e ale fameie.

Pochi giorni prima na roba simile la iera capitada ai aparechi e ai aeroporti. Tanti voli europei i xe stai coinvolti in falsi alarmi, con areoplani mandai in altri aeroporti, controli straordinari e, in qualche caso, perfìn l'intervento dei aparechi militari. Sto casin in ciel el ga riguardà l’Italia, la Croazia, la Gran Bretagna, la Grecia, la Serbia, la Spagna e diversi altri. Gnanca stavolta no i ga trovà bombe. Ma el dano, tra disagi e spese, el iera za fato.

Xa in primavera, altre minace de bomba per e-mail le iera stade mandade a tante scole in Croazia, Istria compresa, Serbia, Bosnia-Erzegovina e Montenegro, provocando evacuazioni, interusion dele lezioni e interventi dela polizia.

Tuto sto ambaradan no podeva no meter in do e do quatro in rampa de lancio tuta una serie de interpretazioni sula politica internazional e su come che la vien vista, specialmente in Europa. In prima linea, politici e giornalisti impegnai a risponder ala domanda: chi xe che pol trar vantagio de tuto questo?

El primo sospetà, almeno nel dibatito politico, xe la Russia, che la ga certamente interesse a indebolir l’Europa, provocando insicuressa e divisioni. Ma se Mosca la ga interesse a destabilisar l'Europa, anche l'Europa, come che ga dito ben el filosofo Massimo Cacciari, la ga interesse a destabilisar la Russia, con sanzioni, presioni politiche e economiche e sostegno militar al'Ucraina. Ad ogni modo, prove per dar la colpa ala Russia no ghe xe, o almeno no le xe conossude al'opinion publica.

Tra le altre ipotesi ghe xe grupi estremisti, organisazioni religiose fondamentaliste contrarie ai valori occidentali, ma anche l'industria dei armamenti, che la pol guadagnar dal clima de insicuresa e dale conseguenti domande dela gente e de una parte politica de investir sempre più soldi nele armi. Se le robe le stassi cussì, quei che vendi armi i dovaria contar sul fato che la magioransa dela gente la sia convinta che le armi le xe la malva per tuto, sensa renderse conto che un canon no pol blocar quei che vol mandar migliaia de e-mail minatorie, e gnanca un caro armato no ’l pol proteger un sistema informatico. I ultimi fati i ne disi che, prima dele armi, ne servi cybersicuresa, prevension, servizi segreti sgai e colaborasion tra le polisie europee. Perché pensar ala sicuresa solo coe canoni e s’ciopi vol dir lassar sensa portession una parte fondamentale dela nostra vita de ogni giorno.

Nel dibatito, certi comentatori i ga tirà in balo anche le proteste contro el carovita, le paghe che no le basta per rivar al 30 del mese e i problemi de trovar casa. Ste proteste in piassa le xe capitade in tanti paesi europei, finindo anche in violense e scontri con vetrine spacade e auti in fiame. El posibile colegamento saria la destabilizasion social: tensioni economiche e disordini i pol indebolir la fiducia nele istituzioni, un risultato che podaria interessar a quei che ghe vol mal a l’Europa e i vol sburtar i propri interessi in tel Vecio continente. Ma colegar ste proteste ale minace de bomba, al fondamentalismo religioso o ai interessi del'industria dele armi xe una roba assai dificile, se no ghe xe prove. E soprattutto no bisogna confonder le giuste rivendicazioni dei citadini con i eventuali tentativi de doperarle per altri scopi.

El gropo tra Israele e i Palestinesi no lo nomino, quel xe un altro perde manighe.

Le interpretazioni che parla de grandi comploti internazionali le se basa anche su quel che disi certi esperti informatici: insoma, per meter in pìe un sistema de minace del genere, ghe volaria atrezzature potenti e assai costose. Se parla de decine e perfìn de centinaia de migliaia de euro. Ma in realtà, le indagini sule minace dela primavera passada e dela fine del 2025 le ga portà al'identificasion dei presunti responsabili in Croazia, Bosnia-Erzegovina, Montenegro, Macedonia del Nord e Irlanda: tra questi iera anche diversi minoreni. No xe però stà dimostrà che sti episodi i sia colegai tra de lori, e gnanche xe stada trovà una regia comune drio de sta onda internazional de minace. E xe dificile creder che i minoreni i gabi a disposision tuti sti soldi per i suoi gioghi strambi e sfide come se i fussi in un videogheim.

Indiferente, anche se ala fine ste minace no le dovessi risultar el fruto de grandi comploti o manovre internazionali, ma solo el divertimento malà de qualche individuo, el dibatito che xe nato el ga portà a gala le grandi paure dei europei de ogi.

Prima de tuto, la paura dela Russia, che atraverso la NATO gavemo finì per trasformar in un nemico, invese de provar a integrarla nel'Union Europea, perché la xe ligada a l’Europa da fonde radise culturali e storiche. Po' ghe xe el dilemma tra la corsa ai armamenti, con la prospetiva de mandar qualchedun a combater per risolver confliti internazionali che za paghemo cari, specie co i ciari de luna del costo del'energia e, da l’altra parte, la ricerca de solusion diplomatiche che no prevedi el ricorso ale armi. Ghe xe infine la paura più granda, quela del'Islam, che in tei ultimi trenta ani la ga ribaltà come un guanto la fisionomia de tante cità europee, fasendo vegnir fora domande dificili sula convivenza, sul'identità e sul'integrassion. E naturalmente ghe xe el carovita, che ogni giorno el pesa sule fameie e che el ne fa gaver paura el futuro.

Minace vere o false, comploti internazionali o bravade de qualche irresponsabile, questi resta i grandi problemi che la classe dirigente europea la dovaria gaver el coragio de afrontar. Una classe politica che ogi la fa fadiga a tirar fora anche un solo leader de vero spessor e che, dopo gaver governà el mondo per secoli, la ga relegà el nostro continente a un ruolo sempre più subordinà rispeto ai Stati Uniti e ala Russia. E quando la Cina la deciderà no solo de produr, ma anche de far sentir ancora de più la sua vose sul scachier politico internazional, l'Europa, casa dei europei disunidi, se la continua cussì, la diventarà veramente l'ultima roda del caro.