NINO BENVENUTI DE ISOLA, CAMPION DE BOX Uno tra i più grandi sportivi istriani del XX secolo el ga conquistà el mondo col pasaporto talian e l'Istria in tel cuor

Al contrario del bocser Mate Parlov, nato a Spalato ma diventà campion vivendo a Pola, un altro tra i più grandi sportivi de l’Istria del XX secolo el ga avù una sorte contaria: Nino Benvenuti, el grande bocser de Isola, el xe nato in Istria, ma el teto del mondo el se lo ga conquistà da Talian de passaporto. Simile xe sta anche el destin de Mario Andretti de Montona, istrian anche lui ma diventà campion del mondo de automobilismo in Formula 1, da American. De lui scriveremo un’altra volta.

Otantasei ani, diograssia ancora vivo, Benvenuti l’Istria el se la ga tegnuda sempre streta in tel cuor. El xe anche l’autor dei testi del fumeto de Giuseppe Botte "Nino Benvenuti, il mio esodo dall’Istria". Xa prima, con el giornalista Mauro Grimaldo, el gaveva scritto el libro “Nino. L'isola che non c'è. Il mio esodo dall'Istria”.

Giovanni Nino Benvenuti, nato a Isola el 26 aprile del 1938, el xe sta el più forte pugile italian de l’altro secolo. Xa de picio, a Isola, el se alenava dandoghe pugni a un saco de juta che ‘l gaveva incarighà de formenton. Poi el ga comincià a farse in bicicleta i 30 chilometri che dividi Isola da Trieste, dove che ‘l andava alenarse in tela palestra de l’Accademia pugilistica triestina.

Indiferente, el suo primo incontro lo ga vinto in piassa a Isola nel 1951. Poi, dopo che ghe iera stata requisida la casa e arestà el fradel Eliano (la polissia politica ghe ga fato far sete mesi de galera), la sua famiglia la scegli la strada dell’esodo e nel 1954 la se trasferissi a Trieste dove che el mulo Nino el continua a baterse. E a baterse ben, tanto che nel 1960 el vinserà la medaia de oro nei pesi welter ale Olimpiadi de Roma. In finale el manda KO el sovietico Jurij Radonjak, e quela xe stada anche un vitoria simbolica, tra el publico xe spuntada anche una bandiera istriana.

Poi, da profesionista, Benvenuti el diventerà campion mondiale dei pesi superwelter tra el 1965 e ‘l 1966, campion d’Europa dei pesi medi tra el 1965 e ‘l 1967, campion del mondo dei pesi medi tra el 1967 e ‘l 1970. Nel 1968 el ga vinto el premio Fighter of the year (Combatene dell’anno), unico Talian a gaver mai becà sto risconoscimento.

Nino Benvenuti el iera un bocser completo, preciso, calcolador, forte nel darle de sinistro e de destro, ma anche bon de incassar colpi sensa scorlarse tropo. Xe restada memorabile la sua sfida in tre incontri (con 18 milioni de Taliani che i scoltava la radiocronaca) per el titolo de campion del mondo dei pesi medi con l’american Emile Griffith.

El primo, el 17 aprile del 1967, Benvenuti lo ga vinto dopo un match epico che ‘l xe sta nominà come Fight of the Year (Combatimento dell’anno) del 1967. El secondo match Nino lo ga perso per via de una costola rota, ma el terzo el ga vinto de novo, stavolta al Madison Square Garden de New York apena rinovà, ai punti, ma dopo che ala otava ripresa con un sinistro sula ganassa el gaveva mandà l’American per tera.

Sto ganzo sinistro nel 1969 el manderà KO anche el forte Luis Manuel Rodríguez, che al’undicesima ripresa, per la prima volta in tela sua cariera, per via del pugno becà da Benvenuti no ‘l ga rivà tornai in pie dopo la conta dei famosi 10 secondi. Quela ripresa la xe stada premiada come Round of the year de quel’anno. Se tratava de un incontro per la difesa del titolo de campion del mondo, titolo che in un’altra ocasion, el 23 magio del 1970, Benvenuti el gaveva difeso a Umago, vicin de casa sua, regolando de destro l’american Tom Bethea che ‘l ga basà el tapedo del ring.

Putropo Nino Benvenuti el iera quasi a fine cariera co ‘l se ga batù (e dir che lo ga scelto propio lui) con l’indio argentin Carlos Monzon, noto anche come “la belva coi guantoni”, uno dei più forti pesi medi dela storia del box. Contro Monzon, che el iera quatro ani più giovane de lui, Nino el ga perso do volte, sia difendendo el titolo nel novembre del 1970 a Roma, sia la rivincita l'8 maggio del 1971 in tel Stadio Louis II de Montecarlo, dove che a tifar per el bocser istrian iera vegnudi, tra tanti, anche Alain Delon, Sergio Endrigo e David Niven. E meʃa Italia la iera incolada daivanti a schermi dela television.

Dopo el ritiro nel giugno 1971 Nino Benvenuti resterà amico con i sui più grandi aversari: Emile Griffith xe el santolo de cresima de uno dei sui fioi, e Nino ghe starà vicin anche co l’american el farà caming aut dichiarando de esser omosessuale. No ‘l ga abandonà gnanche Monzon dopo che l’argentin el iera finì in galera perché el gaveva copà la tersa moglie butandola xo dela finestra.

Nel 1996 Benvenuti el xe sta anche volontario in tel ospizio de Madre Teresa de Calcutta in India. El ga avù anche l’onor de veder la prefazion de Gianni Minà, uno dei più bravi giornalisti italiani, al suo libro autbiografico “Il mondo in pugno”. Nel 2018 la Comunità autogestida della comunità italiana del Capodistrian (CAN Costiera) la ghe ga asegna el premio Isola d’Istria.

Co 'l scrivi o co ‘l conta la sua vita, Nino Benevenuti no ‘l scondi el fato che lui e la sua famiglia i ga patido sai per via de l’esodo: persa la casa, el fradel arestà dala polizia segreta jugoslava, la mama de Benvenuti, poco dopo el trasferimento a Trieste e l’abandono de casa sua, la xe morta de crepacuor.

La sua famiglia la iera tra quele benestanti de Isola: i gaveva tere e barche, vin e pessi, i viveva in una palazina di fronte al mar. “Ne ga tocà lassar quel paradiso”, el ga contà in un’intervista fata da Massimo Cutò del giornal La Voce di New York, che la Voce del Popolo de Fiume ga ripublicà nel 2022.

La mia Isola la iera diventata in un momento “l’Isola che non c’è”, el gaveva dichiarà, oservando che dal passato no se scampa perché el resta in tela testa e in tel cuor.”

Xe anche per questo che Nino Benvenuti, uno dei più grandi sportivi a livel internazional, el ga dito che dopo morto el volessi che le sue seneri le vegnissi sparse da “soscojo”, el scoio sul mar de Isola do’ che el ga imparà nudar de picio.