Vile, case, casete, "vikendice" – TUTE ZO PER TERA

I ga comincià a butar zo le costrusioni abusive. Vile, case, casete, "vikendice" – tute zo per tera. Sensa esclusioni. Cusì se ga deciso. Se buterà zo sia le vile (quele bele con le piscine dove che i turisti se tocia), sia le casete de quei che vivi dentro e che no i ga altri posti dove andar. No centra se questi secondi i ga cercado el permeso cinque ani fa e noi ga rivado a ciaparlo perchè altri (quei con le piscine) i ga gavudo la precedensa.

La lege xe uguale per tuti. Miga schersi. Miga che ti pol butar prima zo la casa de quei che questa ghe xe l'unica abitasion e poi che vegni in fila quele dove che i turisti se tocia. No, no, no va cusì le robe. Se buta zo come che vien. Cusì a caso. No se varda prima i uni e poi i altri. La lege xe uguale per i primi e per i secondi.

E cusì xe suceso (ma per puro caso eh!) che i ga comincià a butar zo proprio quele case che per qualchidun iera l’unico teto sora la testa. I podeva pensar prima de costruir! Inutile che deso i piansi! Inutile che (magari) i ga fato domanda per el permeso ma noi ga rivado a ciaparlo! La casa va zo. No se discuti. E no ghe se dà gnanche un preaviso un pò più lungo che la casa ga de andar zo. No, no.

No centra che l’asion ga gavudo una reasion. No centra che per risolver un problema sociale se ga creado un altro problema sociale. E no centra se deso, per esempio, la Cità de Pola ga dovudo cercar una solusion per risolver el problema sociale che se ga creado per risolver el primo problema sociale.

La lege xe uguale per tuti. Cusì i ga dito. E mi me fido.

Cedo la parola a Velan...

Per dodici ani go navigà con regolarità lungo tuta la costa croata: da l'Istria, oltre el Quarnero fin zo a Dubrovnik (Ragusa). Un ano son andà anche oltra fin a Corfù in Grecia che la xe mar Ionio. Go fato anche tuta la costa pugliese, da Vieste sul Gargano fin a Otranto. Go trovà dapertuto la stesa storia: case in cemento tirade su a pochi metri da la costa. Tuti che vol guadagnar col turismo e sta storia no finirà mai perche quei del nord, quei del continente i faria documenti falsi per star almeno una setimana in riva al mar.

El Mediteraneo xe un mito e noi siemo parte de sta storia. Xe una vecia regola: per comprar devi eser qualchedun che vendi e in Istria se vendi, i Istriani i vendi. Xe de quando che mi iero picio che i Rovignesi i vendi. No so quanta roba che xe restada, mi go 65 ani. Vero xe che deso le vendite le xe aumentade perchè xe aumentada la domanda.

Me fa de rider ste due casete che xe stade demolide, basta girar un poco per Rovigno per capir el senso de la montatura. Xe interesi tropo forti e chi che comanda, chi che firma i permesi el se ga fato el calo sul dito e anche sul cul, gente che da 30 ani xe sempre nel steso uficio del comun. Nonostante le demolisioni se continua a costruir, i camion de Tomišić i gira come mosche, i porta batuda de qua e de là, Koromačno produsi cemento e tuto fila. Intorno a la cità vecia de Rovigno se costruisi in continuasion: adeso va de moda le case sensa el teto, come i arabi o i cabibi. I architeti i se adegua, i disegna su ordinasion, niente teto e tanto cemento.

E, a la fine de la fiera i me rompi le scatole con ste due casete butade zo, xe el masimo de la libidine! L'Istria la xe sempre più bruta, la ga comincià a somigliar a le signore de via Cavana: tanto stuco e pitura.