ANDAR PER MAR: El mezo naufragio de Scoio dei Frati, pareva de star in tel Atlantico

La prima volta che son andà in nave iera el 1977, in gita scolastica e me ricordo ancora l’emossion imbastardida da el no veder l’ora de calarme in una nova aventura e, da l’altra parte, da un fià de paura.

L’aventura la xe facile da spiegar: fin quela volta gavevo za leto qualche libro (“Il corsaro nero”, “L’isola del tesoro”, “Mathias Sandorf”, “Ventimila leghe sotto i mari”) o fumeto in cui el mar iera una specie de utero che ‘l fasseva nasser tante grande e pice vicende de viagi, scoperte, bataglie, scontri e caligo vario indo’ ghe generalmente i boni ala fine i vinseva contro i cativi.

Ze de dir ancora che la voia de farme un viagio in nave la me la gaveva fata vegnir mio papà che, oltre a farme veder i roplani bevendo una “Nara” in tela teraza del ristorante che in tel vecio areporto de Pola el dava drito sula pista,  ogni tanto el me portava al molo Fiume a veder salpar o rivar l’”Edra”, quela bela nave blu che la colegava Pola e le citadine de la costa ovest de l’Istria con Trieste. “Invesse de far tre ore e meza de strada cariga de curve co la Seicento e poi almeno un’altra meza ora de bloco”, el me diseva, “st’altra volta ‘ndemo a Trieste in nave”. Poi finiva sempre che andavino con la Seicento, la iera del Sessanta con le portiere con la maniglia davanti che za 50 anni fa le gaveva de “vintage”.

E la paura? Quela la derivava da un’esperienza direta, vissuda in prima persona e da una seconda “esperienza” ingrumada da un giornal. L’estate de un anno prima iera stada la prima volta che gavevo dormì in tenda a Scoio dei Frati e anche quela iera stada un emossion grada. Ierimo in tre: el mio amico Fredi, suo nono e mi. Iera una tenda blu, de quele semplici, dentro “per tera” iera..tera, niente pavimento in plastica o in goma, ma lo stesso mi me pareva de viver un’aventura de prima categoria.

Bon, la matina se sveiemo, femo el bagno bonora, saltemo in gambada e in testada la del bunker, ma a un certo punto riva el nono de Fredi per dirne che dovemo tornar subito a casa perché el tempo el stava cambiando svelto. Infati, in “men che non si dica” el ciel za el mostrava de no prometer niente de bon. Insoma, salpemo dal molo de Scoio dei Frati in tela passera de si e no quatro metri del nono de Fredi e via noi per Bonarina indò che sariimo dovui rivar in un quarto de ora o venti minuti. Ma no la xe andada cussì. Dopo poco tempo, pena vegnui fora dal canal che ‘l passa tra la punta che dividi la costa de Valsabbion da Val Cagoia e est, e la punta nord de Scoio dei frati, el vecio motorin fuoribordo Tomos 4 bianco (con scrito Tomos in picio e in corsivo, no in grande e stampatelo come in tei motori più novi) el se gaveva distudà e no ‘l voleva saverghene de ripartir. Se trovavino in tel unico punto de “strada” no proteto dala costa, cussì che un forte libeciada con tanto de onde grande e temporal la ne ga becadao in pien.

Anche se la costa no la iera lontana più de 50 metri, pareva de star in mezo de l’Atlantico e me ricordo ancora el viso ingrespà e preocupà del nono de Fredi, che a remi, iutado (se fa per dir) da Fredi e mi che tentavino de remar ogni d'un con una pina celeste dela Jugoplastika,  el ga rivà in qualche modo a vogar fin a punta Verudela indò che in qualche modo semo sbarcai. Ma in tel 1976 la no iera né l’hotel Histria, né tuto el vilagio turistico de Punta Verudela che i lo ga fato nel 1987. Iera solo graie carighe de spini, cussì che dopo esserse rampigai fin al montisel de Punta Verudela per “doppiarlo” e calarse verso Bonarina ierimo pieni de sgrafoni sule gambe e sule mani. Se gaveva sbregà un fià anche la mia maieta giala che dala parte davanti la gaveva stampado el viso de un Indian, Geronimo, con un fassa in fronte che no la iera stampada, ma la iera fata de altra stofa e cusida, ogi se diria tipo 3D. Ben, me ricordo benissimo che ierimo rivai a casa ala una de dopopranzo tuti bagnai e che ancora pioveva. Poco dopo xe vegnù fora un sol cussì forte che za ale tre del stesso dopopranzo mia mama la me gaveva riconsegnà la mia maieta giala cusida, lavada e sugada. El sol iera tornà a spacar le piere, e solo un per de ore prima iera sta el finimondo.

La paura “per interposta persona” la ga questa origine. Co in tei Anni Setanta andavino a Trieste, oltre a far la spesa, andavino sempre in chiosco là in Largo Oberdan: per mi se ciogheva “Topolino”, per mia mama “La Settimana enigmistica” e per mio papà “Storia illustrata”. Ben, el primo articolo serio leto in vita mia el iera stado publicà proprio da “Storia ilustrata” e ‘l iera dedicado al Titanic. La storia, oltre a impaurirme la me interessava sai perché, come che ve go za contà, a Padul stava el vecio sior Lisandro, el papà de un amico de mio papà, che el iera imbarcà sul Carpathia, la prima nave rivada a salvar i naufraghi de Titanic. Sior Lisandro el me fasseva sentar sui sui ginoci e ‘l me contava la storia de Titanic.

Insoma, eco perché in quel giugno del 1977, co la riva de Pola la iera cariga de conteiner (ve ricordè?), me iero presentà al molo Istria, la indò che adesso xe la marina con la “torta”, pronto a imbarcame sul tragheto “Marina” per Lussin. Ma questa xe un’altra storia, magari ve la conto ‘sto altro sabato.