Arinka Segando Blašković la ne ga lassado, ma la sua opera la xe e la resterà parte del patrimonio cultural de Pola e l'Istria

Ale undici e mesa de sera la parlava al telefono con su fia, de robe serie, dele robe da far e dele idee da realisar, ma le rideva e le schersava anche, fassendo, come sempre, batude sgaie e ciacole originali. Un’ora più tardi la iera morta. Sensa mai esser stada prima malada o in ospedal, sensa mai gavù dover cior medicine, sensa magagne de salute, nonostante i 79 anni, de cui lamentarse.

Arinka Segando Blašković, una dona e un'artista che la gaveva ancora sai robe da dir e da far, pochi giorni fa, el 12 luglio, la ne xe stada come rubada. Rubada da un destin tremendo, in primo logo ala sua famiglia, ale fie Petra e Mariaberta e al marì Franko, noto come Franci (Franzi) compagno de vita e de arte, a casa, drio una scrivania a scriver e controlar testi, drio de un strumento a far e arangiar musica, o fora de casa, in un studio de registrassion a sonar e cantar o, tanti anni fa, su un palcoscenico. Ma anche in radio, a farne rider, pianser e pensar con Siora Spia e bel Moreto.

E lori due, insieme con qualche altro colaborator (me fa piasser ricordar el compianto Drago Orlić), i ga prodoto un'arte tuta sua, local ma dal valor universal, che ogi podemo liberamente considerar come parte del patrimonio cultural, ma anche antropologico, popolar e identitario (sensa sburtar identità fisse e recintade, ma el contrario), de Pola e de l'Istria. Un patrimonio impachetado in modo novo e in una lingua nova (un bel missioto istrian, come che ga fato sai volte anche la Nelida Milani), ma fato dal recupero inteligente de date e figure storiche, de fenomeni e personagi locali dimenticai dala grande storia, dala critica ironica ma anche autoironica (no per niente el suo personagio radiofonico el se ciamava Siora Spia) e voludamente antiinteleutalistica (ma no per questo da osteria) dela società moderna e dele sue contradissioni, dele storture del nazionalismo e dela religion bigota, dela demagogia dei politici e dela creduloneria del popolo. O dela bandiera bianca che gavevo sventolà davanti a un capitalismo da gueriglia e sul fronte de l'ofensiva dei turisti.

Tuta sta roba la vegniva contada con le parole del multilinguismo istrian (croato, talian, dialeti istraini, tedesco KundK) con Arinka bravissima, se podessi dir quasi unica, a imitar i taliani vecio stampo de l'Istria che co i parla in croato la drugarica i la ciama drugarissa, slušaj i lo fai diventar slussai e magari el numero 26 dvadesetišest diventa duadesseses.

Tanta gente de Pola se ricorderà dela Arinka come brava e tante volte premiada maestra de musica, specialmente chi che xe andà o gavù fioi in tela scuola de Castagner, ex „Ivo Lola Ribar”. La Arinka la ga musicà l'ino dela scola „Ča bi škola, da ni mene”, componendo sul testo del giornalista e poeta Daniel Načinović.  Generassioni e generassion de fioi con ela i ga imparà le basi del scoltar, ma anche de far musica.

Ma xe più grande, anche perchè no limitado ala sola Pola el numero de persone che i stima, o magari i ga solo sentì parlar dela Arinka, come musicista e cantante prima e poi personagio radiofonico, la Siora Spia nominada prima.

Nata in tel 1947, Arinka la comincia esser conossuda in tei anni Settanta co insieme a Franci la fonda el grupo musical Arinka & Tingl Tangl. In tel 1976 i publica el primo disco 45 giri  “Istarski rok” e fino al 1981 i publicherà due album de 33 giri partecipando a vari festival. Ti li vedevi girar con un combi tuto colorà o con la Sitroen spacek (2 CV) de Franci e se vedeva subito che i iera originai e diferenti.

In tel 1982 Arinka la publica el suo unico album “Novi rulet”, ma la vera svolta la capita nel 1986 co con Franci la fonda el grupo Gori Ussi Winnetou, vivo fin poco tempo fa, con più de 100 album publicai dal fecondo, instancabile, talentuoso e inimitabile Franci. Fino al 1995 Arinka la xe restada ativamente dentro al grupo sonando la tastiere e cantando, ma i suoi consigli e ‘l suo lavor per el grupo e per Franci i xe andai avanti per tuta la vita. La xe coautrice de tante dele cansoni più famose del grupo come „Addio Pola”, „Ja sam penzić gol i bos”, „Penzioneri-proleteri” e „Mens sana in malvasia istriana”.

De pari passo nasseva anche la trasmission Siora Spia andada in onda su radio Pola una prima volta dal 1991 al 1996, anno co la passa a Radio Maestral per “diversità di vedute” con la politica redazional della radio de stato in man de l’HDZ (a l’epoca un partito sai più nazionalista de quel che el xe ogi) de cui anche Radio Pola fasseva e continua a far parte. Dopo le elezioni del 2000, co per la prima volta in Croazia ga vinto l’oposizion, Siora Spia la xe tornada a Radio Pola.

Siora Spia xe stada una dele trasmissioni radiofoniche umoristico-satiriche più scolatade in Istria. I dialoghi ta Siora Spia e bel Moreto i iera splendidi, i comenti velenosi ma giusti, l’ironia e ‘l sarcasmo usadi no solo come spin, ma anche come ago de puntura per inietar la medicina. Parlando un fià in croato e una fià in ciacavo con la pronuncia dei Taliani de l’Istria, parlando una fià istrovento con batude in altre lingue, Siora spia la ipnotisava chi che scoltava la radio, tanto che, in tei anni Novanta, co la trasmission la andava in onda de sabato matina, le friserche le distudava le haube per poder scoltar la radio sensa rumori de disturbo.

Arinka Segando Blašković la ga anche colaborà per tanti anni, con el pseudonimo de  “Vera s Kaštanjera” (Vera de Castagner) con l’alegato “Ružmarin” del Glas Istre. A parte le centinaia de piante de l’orto de casa sua che la curava con passion, andando su e xo per la corte con el sbrufador in man,  interessi e stimoli per la sua mente sveia no i mancava mai: in tel ultimo periodo la se ghaveva tacà a Duolingo, una piataforma online per impar le lingue straniere con lezioni curte e intense. In poco tempo la iera diventada brava anche de inglese, tedesco, francese, spagnol, arabo e cinese, tanto che i sui risultati su Duolingo i iera tra i meo al mondo. Ma no xe lingua al mondo per descriver con parole giuste quanto che gavevmo perso perdendo Arinka.