BENVEGNUDI IN ZONA EURO O come restar fregadi sensa eser fregadi!

Per l'altro articolo scrito in istroveneto gavemo ciapà una critica. Ne xe sta dito che el istroveneto no devi esi per forsa colegado sempre e solo a situasioni e storie de una volta, come se deso nol se parlaria più, ma che saria bel che scrivemo anche robe del presente. La critica xe a posto. E Velan e mi la gavemo ciapada su serio. Sta de fato che el tema de questo articolo xe un tema (o forsi un problema) atuale.

Welcome in euro zone!

Con genaio semo dentro anche noi. Go provà su la mia pele la svolta in euro de l'Italia e dopo, quela in Slovenia. Speravo de restar fora ma xe inutile: destin maledeto! Considero la novità dal mio punto de vista, quel de un consumador: consumo e pago.

Xe locai a Rovigno dove che sa ogi un cafè espreso con una gocia de late ti lo paghi 12 kune. Per i proprietari no sarà un problema: 1,59 euro, importo rispetabile, conto europeo. Mia mare la bevi el cafe con le amiche in un bar in piasa Maresciallo Tito, la lo paga 10 kune, el bar vicin el vendi el steso cafè a 11 kune. El conto resta comunque europeo, xe le paghe e le pensioni che xe de m..a. Peso che in Italia. Giorni fa iero a Trieste e in un bar de Viale XX settembre go ciolto un cafè gociado al banco, lo go pagà un euro.

Qualchedun devi spiegarme perchè le sardele ciapade in Istria, a Trieste in pescheria i le vendi a 3 euro e de noi, penso a Rovigno, a trenta kune. I me disi che a Zagabria le stese sardele i le vendi a venti kune. Più che le viagia più le perdi de valor, dovaria eser l'incontrario ma no xe. Xe turismo anche quando che no xe turisti, chi che resta e vivi dodici mesi a l'ano resta inculà, secondo la vecia lege del Menga...

Iera scrito sul Piccolo de l'altro ieri: in un ano i presi de afito, acqua, luce e combustibile (gas per scaldarse) i xe aumentadi del 56,6 per cento. Vol dir che per ste spese se paga 2.380 euro in più rispeto a l'altro ano. Le famiglie sensa fioi le subisi un aumento piu' baso, 1.940 euro. Convien dormir separadi. Questa xe la situasion italiana, in Croasia sarà uguale, da l'indipendensa pasemo a una nova dipendensa, targada EU. Gavaremo la stesa valuta e no sarà più confini: se speta turisti a brente, tuti pieni de pataconi e tuti pronti a spender. Da Berlino a Pola sensa confini, dal Mar del Nord a l'Adriatico, tuto un grande paese.

Ma l'euro del tedesco no xe quel del croato, basta meter le man in scarsela e te xe ciara la diferensa.

Cedo la parola a Donatella...

El problema de l'entrada ne la zona euro xe che gavaremo i presi europei ma le paghe sarà quel che sarà, no de sicuro quele europee. No xe giusto. Se acetemo una roba dovariamo acetar anche quel altra. Perchè i presi xe liveladi con l’Europa ma le paghe no? Me domando se qualchedun ga pensado a sta roba, o i fa finta de niente? I sburta la polvere soto el tapedo, i sta tuti siti.

No rivo capir perchè xe tanta contentesa che entremo del tuto in Europa, che gavaremo la stesa valuta. Basta veder la fine che ga fato i nostri vicini co i ga ciapà l'euro. Ma! Legevo su Feisbuc anche dei comenti de gente che ne fa le condoglianse perchè entremo in eurozona. Me xe vignù de ridi fin che legevo.

Ridendo e schersando, però, la situasion xe seria. Più de tuto penso ai pensionati che i ga de le pensioni che xe una vergogna, che sa deso i vivi de stenti. Figuremose tra un pò.

L'altro giorno parlavo con una signora che me disi: "Mi no me preocupo de l'euro. Noi semo ormai bituadi col cambio de valuta. Prima dai dinari a le kune. Deso da le kune a l'euro."

No savevo cosa risponderghe. Go solo pensado che se se la gavemo cavada la prima volta forsi se la caveremo anche questa.