CHI CHE GA AMARO IN BOCA NO POL SPUDAR SUCHERO: El ben, el mal e le ocasioni perse su Feisbuc

Ogi parlemo de Feisbuc. Voi, per caso, ve ricordè come, quando e perchè se gavè iscrito a sto social netuorc? Mi si.

Mia sorela la vivi in un altro continente e un giorno la me gaveva dito: “da ‘desso in poi, invesse de mandarte fotografie in busta o per posta eletronica mi le meto sul mio profilo su Feisbuc cussì le resta la e ti le pol veder co ti vol ti.” Sicome no gavevo idea de coss’ che la parlava, la xe stada ela a verꭍerme el profilo. Iera el 2007, fe conto che Zuckerberg ga fondado sta rede social nel febraio del 2004, nel 2006 la xe diventada uno dei dieci siti più visitadi al mondo e nel 2008 per numero de iscriti la ga superado “MySpace” (Maispeis), che fin quela volta tegniva banco nel mondo virtual.

El fato xe che per più de un ano mi de Feisbuc no gavevo capì niente, al punto che ogni volta che mia sorela me domandava se gavevo visto le fotografie nove che la gaveva carigà sul suo profilo, mi ghe dovevo domandar la pasuord per el mio profilo per poderme colegar. Se sta pasuord mi no me la gavevo segnada de qualche parte, vol dir che a sto Feisbuc ghe tegnivo poco o, meo, che no gavevo capì niente de tute quele posibilità che rivava con sta novità online.

Go comincià capir qualcosa co una mia parente, che all’epoca la gaveva più de setanta ani, propio grasie a Feisbuc la iera tornada in contato, dopo cinquanta o adiritura sesanta ani, con qualche d’una de le sue compagne de clase de scola, tute andade vie da l’Istria dopo el 1945. Per restar ligadi a sto tema, una dele prime robe che me reicordo de Feisbuc xe che, a parte qualche inevitabile barufa, el gaveva dado un groso sburton al riavicinamento tra i esuli e i Taliani restadi in Istria dopo el cambiamento dei confini. Insoma, gavevo capì che Feisbuk dimuiva le distanse in tuti i sensi.

Me vien de rider co ripenso che una dele prime robe che mi go fato su Feisbuc xe sta meterme in serca de qualche d’un che ‘l gaveva fato el militar con mi in Serbia e in Bosnia. Poi xe rivado el resto: l’Istria, i libri, i cantanti, i film, i viagi, i grupi locali e nostalgici, le ricete, le pagine dei critica e parodia, le iniziative de grupi de citadini con tanto de mobilitasion e apuntamenti, ma anche i afari dei altri.

Deso gavessi poco senso meterse a far l’elenco de tuti i interesi che se pol sodisfar su Feisbuc, el mondo online ormai el xe diventà come el mondo real e a nisun omo normal che vegneria in mente de meterse a far l’elenco de tute le robe che se pol far su sta Tera: ꭍa l’elenco de le discipline che usemo per tentar de misurar e spiegar el mondo (matematica, scienze, filosofia, religion, economia e tante, ma tante altre), ne porteria via 100 pagine e gavesi poco senso. E tuta sta roba la se replica su Feisbuc,  in qualche modo Feisbuc xe un mondo, per tanti el xe “el” mondo.

Quel che forsi iera dificile imaginar, xe el fato che Feisbuc saria diventado uno dei canai principai per informarse sule notizie. Xe pochi quei giornai che i pol vantarse del fato che i sui letori i va diretamente sul sito del giornal, la magior parte per eser leti i devi prima condivider la notisia su Feisbuc.  E la grande novità (ma forsi anche la grande bataglia persa) del giornalismo moderno xe proprio el trasferimento su Feisbuc del mondo dela informasion, che una volta el iera esclusivo e per certi versi anche prestigioso.

Me ricordo de un episodio suceso a Madrid nel 2011, a un convegno sui novi media. Dopo de i grandi esperti, gaveva parlà anche un mulo madrilen de 18 ani, spiegandoghe a sti stesi esperti (sai più veci de lui) che i gaveva capì sai poco de come che funsionava i giovani, specie dopo che l’invension dei smarphone (i telefoni inteligenti) la gaveva inaugurando l’era del mobilità su interntet. Sicome che el gaveva parlado ben, i giornalisti presenti, ancora convinti che el giornal el contava più de Feisbuc, i ghe gavea domandado se el giorno dopo el gavesì preferì veder un articolo su de lui publicado su “El mundo” (con “El Pais” el più importante giornal de la Spagna) o su Feisbuc. Eco cos’ che lui el ghe gaveva risposto: “su el Pais, cusì che poi poso condividerlo su Feisbuc. E no capiso perchè domani e no ogi”. Sta roba ‘deso la ne par normale, ma solo dieci anni iera… robe de l’altro mondo.

No xe mal sensa ben, ma no xe gnanche ben sensa mal. E de Feisbuc se podesi parlar anche mal, anche sensa tira in balo le teorie dela manipolisaion dele informasioni personali e del controlo de cos’ che femo e cos’ che no femo, cos’ che magnemo e cos’ che bevemo, cos’ che ne piasi e cos’ che non ne piasi, cos’ che ne servi e cos’ che ne podesi servir, cos’ che gavemo e cos’ che no gavemo.

Tim Bernes, uno dei inventori del ueb, el ga dichiarà che no’l se gavesi mai imaginado che la sua creasion la saria stada usada cusì tanto per mostrar gati e gatini. Ma questo xe solo el folkor del mondo online. Da sai più de pensar, invese, quel che ga dito Umberto Eco: "i social media danno diritto di parola a legioni di imbecilli".

Purtropo sta roba la vedemo ogni giorno, xe gente che, indipendentemente da quel che se publica, la trova sempre qualcosa de mal e de bruto de dir: se ti ghe da blu i volessi el nero, co ti ghe da el nero sto nero no ‘l ghe piasi più e i dixi che i voleva el verde, se ti scrivi che el can el ‘baia i dixi de no perché el xe crepà. El più dele volte i comenta anche sensa leger, i scrivi tante de quel monade (e anche ofese) che i te fa sentir quella partecipasion ala vergogna per robe de cui no se ga colpa, come co se se ingruma su se stesi e se se sbasa sul divano co in televison i mostra qualcosa che ne fa provar vergogna, anche se col fato mostrado noi no c’entremo niente.

Xe pecà che Feisbuc sia carigo de comenatori uxei del malaugurio, i rovina una bela posibilità de civil scambio de opinioni, de cresita dela democrasia, de dibatito costrutivo. Per via de ste cativerie se perdi l’ocasion de imparar qualcosa, però, d’altra parte, se devi anche oservar che el fato che in giro ghe ne sia cusì tanti de spudavelen, indica no solo tanta ignoransa privata, ma anche una grande insodisfazion sociale. E chi ghe ga amaro in boca no pol spudar suchero.

Come tute le robe nela vita, da quanto che magnemo e bevemo a quanto che pratichemo sport, da quanto che no usemo o usemo el celulare, la parola magica xe “misura”. Anche el velen, nela misura giusta, el diventa medicina.