Devo ameter che mi stesso sai volte me lasso ciapar de la nostalgia. A volte la nostalgia la xe bela, la scalda el cuor, ma tante volte la xe anche una trapola. Se femo finta che i tempi passai i sia acqua in tel bicer, cascar in tela nostalgia vol dir agiunger suchero in tel bicer, e in sto modo femo diventar più dolce anche quel che magari, co lo stavimo vivendo in real time, iera vin scarso andà in aʃedo.
Me ricordo de un’amica de mia nonna, la iera una linguassa, una dona in carne e, coverta dal suo sial de lana, la me pareva un Buddha bon de darghe a tuti consigli su tuto. Ma el suo mantra el iera: “ah, una volta si che se se stava ben”.
Tuto bale, una dele poche robe che una volta iera meo xe el fato che ierimo più giovani, e la gioventù perduda xe el centro de gravità permanente dela nostalgia che la ne fa meter i ociai rosa co guardemo la nostra vita in tel speceto retrovisor.
Una volta, tanti fioi i moriva ancora in fasse de malattie che oggi (co dovessimo star peʃo) le xe stade debelade, la gente andava in gabineto in corte perché no i lo gaveva in casa, i boiler no i esisteva e mancava l’acqua calda, se fasseva anche 10 chilometri a pie per rivar a scola o a lavorar. Sensa telefono, sensa internet, i parenti una volta emigrai iera quasi come se i fussi morti, chi li sentiva li vedeva più? Con esempi come questi se podessi andar avanti fin domani.
Casomai se podessi dir che una volta se stava meo per quel che riguarda i raporti umani, ma questo xe un discorso che ne porteria sai lontan e no voio farlo adesso.
L’altra sera guardavo un documentario sul muro de Berlino e se vedeva la Berlino est, comunista, cariga de auti Trabant e Wartburg, i auti del popolo de la Repubblica Democratica Tedesca (DDR). La seconda la gavevino anche noi in Jugoslavia, de Trabant ghe ne iera poche. Co le go viste me xe tornada in mente le Zastava 101, derivada dala Fiat 128, ghe in Jugo ghe ne iera una marea.
Ben, se pol provar nostalgia per quei auti solo per ragioni del tipo “ah, i tempi perduti”, ma no per ragioni estetiche o funzionali. Se xe vero che i tempi duri i genera gente forte e i tempi comodi (come quei de ogi) i genera gente debole, alora se pol provar no nostalgia, ma un certo tipo de orgoglio per quei ani co’ in tei manuali per l’uso dei auti i te spiegava come cambiar el carburator sensa aviʃar, come che capita in tei manuali de ogi, che xe pericoloso per la salute bever el liquido dele baterie. Questa no la xe mia, la go vista in un post su Instagram.
In definitiva, godemosse la nostalgia come una specie de placebo, una medicina finta per darghe una man de lustro a un presente opaco, ma no stemo dir che se stava meo go le sarpe gaveva le siole de corame e, sicome le doveva durar trenta anni, se andava sempre dal caligher. No stemo dir che soto Tito se stava ben, dimenticandose che no eʃisteva la libertà de parola e de stampa, che se andava in cheba per una barzeleta e che no iera caffè, detersivi e i blugins. Un stato con i suoi citadini che per refarse un poco la casa e el guardaroba (spendendo meno) ghe tocava andar in botega in un altro stato (specie a Trieste), no xe un stato che se merita trope lodi.
No stemo, ‘lora, confonder l’amor per i tempi andai con l’amor per la nostra gioventù persa per sempre. Quela si che merita nostalgia.
