Se sti giorni guardè almeno un poco le partide dei mondiali de calcio in America, Canada e Messico de sicuro gavarè osservado che la stragrande magioranza dei calciadori i gioga con scarpe de color rosa o, per esser precisi, “Electric Fuchsia”.
Mi go l’impression che, riprendendo el titolo de un gruppo su Facebook intitolà, “Quando i calciatori avevano facce da calciatori”, cioè quando che i giogadori i badava più ala sostanza che ala forma e co no i iera tuti tatuai ma gnanche delicati come la puina, i vari Gentile, Cuccureddu, Passarella, Katalinski, Hatunić i se gavessi rifiutà de darghe piade al balon con un per de scarpe rosa.
Ma a parte el color, quel che fa impression xe che sui pie dei giogadori no se vedi più marchi italiani. Quasi el 43% dei calciatori i gioga con scarpete Nike, el 41% con le Adidas, el 10% con le Puma, el 3% con Mizuno, e ancora meno con New Balance, Umbro e Skechers.
Insoma, i storici marchi italiani Lotto, Robe di Kappa e Diadora xe i grandi assenti. E stemo parlando de marchi che i xe stadi per tanto tempo roba de prima categoria. Con Lotto giogava el Milan de Capello, el Napoli de Maradona, la Juventus de Lippi, la nazionale croata e olandese, e poi Shevchenko, Cafu e Seedorf, tanto per far qualche nome. Robe di Kappa xe sta el marchio dela nazionale italiana, ma anche de Cabrini, Tardelli, Platini, Del Piero, Zidane, Ronaldo el Fenomeno. E Diadora no iera da meno: nazionali italiana, belga, greca campion d’Europa e poi Roberto Baggio, Marco van Basten, George Weah, Francesco Totti, Antonio Cassano, Filippo Inzaghi, Christian Vieri, Roy Keane, Frank Rijkaard.
Tra i anni Settanta e Novanta i marchi italiani i xe stai i protagonisti del sport a livel mondiale, specie nel calcio, nel tennis e in tei sport invernali. Due iera le zone produtive. La prima la iera in Piemonte, nel famoso distretto tessile Biella-Torino-Novara dove che xe nati i marchi Fila (1911), Superga (1925), Sergio Tacchini (1966) e Robe di Kappa (1969).
La seconda zona produtiva la iera in tel Veneto, in tel distretto Sportsystem de Montebelluna, dove che, oltre a Diadora (1948) e a Lotto (1973) iera presenti tantissimi altri marchi sportivi come Sidi (ciclismo e moto), Tecnica, Nordica e Dolomite (sport invernali). In quela zona, per via dela grande inovazion tecnologica, lavorava anche famosi marchi stranieri come i francesi Rossignol e Solomon e i austriaci Atomic e Head.
El Veneto el iera stado la punta de diamante del miracolo economico italian: in pochi anni iera nati marchi che i saria diventai conossudi e aprezzai a livel mondiale: Benetton, Luxottica, Diesel, Replay, Stefanel, Lotto, Diadora, Geox, Tecnica, Safilo, Carrera, Nordica, Sisley, tanto per far qualche nome.
Queste aziende, insieme a centinaia di picie e medie imprese dei distreti de Montebelluna (calzature sportive), Belluno (ociai), Vicenza (tessili e moda) e Treviso (vestiti) le gaveva trasformado el Veneto da region contadina dei anni '50 a in una delle aree produtive più ricche e dinamiche d'Europa.
Sto successo el iera dovudo al gusto e al stile italian, a l’alto livel de l’artigianato, ala voia de inovar e al fato che le aziende le iera in man ale famiglie. E le famiglie le ghe tegniva sai a far le robe come che dio comanda.
Co in tel novo secolo, per sbassar i costi, la produzion la xe finida in Asia, se ga sbassà anche la qualità. Con la globalizzazion dela produzion se ga perso el controlo da parte dele famiglie (xe mancà anche un bon ricambio generazional), se ga perso la man dei artigiani e se ga perso adiritura i marchi. La Lotto la ga comprada la compagnia WHP Global (USA), la Fila e la Sergio Tacchini la F&F Holdings dela Corea del Sud. E invesse de leger sulle scarpe da tenis dela Lotto “Made in Italy” ogi ne toca contentarse del leger “Born in Italy”. Insoma, nate in Italia, ma in un’Italia bela, rica e creativa che ormai da anni no la esisti più.
