L'altro sabato gavemo dedicà sta nostra rubrica pensada e scrita in dialeto istroveneto al campion de Lavarigo Nevio Valčić (1932-2007), che el xe sta el capofila del ciclismo istrian dopo la Seconda guera mondial. Ma quela iera solo la prima parte de un testo che ghe gavemo voludo dedicar ala famiglia Valčić che la ga el ciclismo in tel sangue e che, anche dopo el ritiro de Nevio, la ga continuado a scriver bei capitoli del sport sule due rode per le strade istriane, ma anche nazionali e internazionali.
Quela che ste legendo 'desso saria la seconda parte, ma nel fratempo xe capitado un fato bel e 'sai emozionante de cui no podemo taser: domenica, 4 agosto, per onorar i 60 anni dela vitoria de suo papà Nevio in tela tapa Pola Nova Gorica del Giro de Jugoslavia del 1964, pur gavendo 66 anni, Luciano Valčić el ga pedalà per più de 8 ore sul stesso percorso, incontrando la caldana in Istria, vento, temporai e grandine in tei ultimi 60 chilometri in Slovenia. Un’impresa che, almeno a mi, no la me ga fato restar indiferente.
E xe proprio Luciano Valčić el primo personagio dela saga dei Valčić che ve presentemo ogi. Lui xe una persona schiva, modesta e bona che per sua stessa amission, el se ritien, nel bon senso dela parola, „un fanatico del ciclismo“, tanto che anche co el ga de andar del dotor da Lavarigo a Pola, el monta in bici.
El xe sta un bravo ciclista, el coreva con la maia giala e rossa dela Siporex de Pola. Le sue vitorie più importanti xe stade quela in tela tapa da Capodistria a Pola al Giro de Jugoslavia nel 1983, co a premiarlo a l’arivo ai Giardini xe sta proprio suo papà Nevio, e quela, nel 1981, co el vinsi l’importante corsa Gran Premio Metalliacommerce. Nel 1983 el riverà secondo nella classifica generale del Giro della Serbia, el terzo gradin del podio el sarà suo nelle gare Lungo i sentieri dell’Avnoj nel 1979 e Magistrale adriatica nel 1980.
Xe proprio a lui e a sua sorela Helena che dovemo esser riconoscenti se el ricordo de una inimitabile stagion del ciclismo istrian, ma specialmente de Lavarigo, no 'l se ancora perso. Mi no so come che la pensè voi, ma per mi veder che un postisin microscopico come Lavarigo el xe sta la capitale del ciclismo de un paese (la ex Jugoslavia) de 21 milioni de abitanti, me par una roba da no creder, un record vero e proprio.
Grazie alla passion, all'amor per sto sport e ala forza in tele gambe per sburtar i pedai, sti muli de Lavarigo i xe divenati veri e propri campioni, anche internazionali. Quasi come parlar del Milan, de l'Inter o dela Juve, miga del Fidelis Andria o de l'Akragas de Agrigento!.
Eh, si perché da Nevio Valčić el testimone el ghe xe passà a un altro mulo de Lavarigo, Cvitko Bilić, che in base ai risultati el figura el miglior ciclista de sempre dela Jugoslavia.
Tra Valčić e Bilić, incredibilmente, per ben 19 stagioni de fila, dal 1957 al 1975, tra Giri de Jugoslavia, campionati jugoslavi e croati e gare internazionali, i ciclisti de Lavarigo i xe finidi sempre sul podio. E xe giusto agiunger che Bilić, ala Siporex de Pola, el xe sta l’alenador de mulo de Sissan Bruno Bulić che nel 1984 el ga vinto anche lui el Giro de Jugoslavia e che xa prima, nel 1980, el gaveva partecipado ale Olimpiadi de Mosca e che poi el xe passado ai professionisti in tela squadra italiana della Magniflex.
Grazie a Luciano Valčić, nel 1997, xe sta anche fondado el Club ciclistico Loborika che ne, 2009 el xe diventando la prima squadra professionista de ciclismo in Croazia. Quela esperienza la xe stada quasi la seconda parte de quela bela fiaba messa in pie da Nevio Valčić e Cvitko Bilić, con i muli del “Loborika” che i conquista 22 titoli nazionali nella categoria élite, 7 vitorie ai campionati nazionali U23 e una serie de oro e altri medaie nelle categorie giovanili. Xe de agiunger altre sedici vitorie nelle gare Europe Tour, che saria la serie B del ciclismo internazionale.
De quela squadra fasseva parte anche el fio de Luciano, Silvano Valčić, che’l xe sta campion de Croazia de ciclocross nel 2009 e su pista nel 2088, membro dela nazionale croata con quatro partecipazioni ai campionati europei e un secondo e un terzo posto al campionato croato. Ala 47-esima edizion del Giro de l’Istria el xe sta proclamà el miglior coridor croato presente in gara.
A tenignir alto, ai massimi livei internazionali, el nome dei Valčić xe Bruno Valčić (Nevio ghe iera zio) che dopo una cariera de coridor coronada nel 1984 con el titolo de campion croato juniores nella corsa a cronometro, nel 1987 el diventa comissario de gara. Ma stemo parlando de un “signor giudice”, ciamado ad “arbitrar” le più importanti gare al mondo: el Giro d'Italia un per de volte, i Gioghi Olimpici de Londra (2012) e Tokyo (2021), la Vuelta di Spagna, la Milano-Sanremo (2004) e un er de volte anche el Tour de France indo’ che sto anno el iera Capo del collegio de Giuria. Per finir al grande ghe manca solo le grandi classiche del nord, la Parigi-Roubaix, la Freccia Vallone e la Liege-Bastogne-Liegi.
Ala fine, come no nominar Helena Valčić, fia de Nevio e sorela de Luciano (e orgoglio de mama Eleonora) che lavorando 'sai ben la organizza eventi per celebrar el nostro ciclismo: el „memorial Nevio Valčić“, in colaborassion con el club ciclistico Loborika (dal 2007 al 2011) e poi, dal 2016, la Gran Fondo Nevio Valčić, una Prova Jolly che la porta punti per la Coppa Inbici Top Challenge. Son sicuro che la ne regalerà anche qualche altra bela sorpresa.
