L'altro giorno go incontrà una signora de Galisan che no vedevo de tanto tempo e se gavemo meso a ciacolar del più e del meno. A un certo punto ghe domando: "Siora Pinucia, ma la me disi lei una roba. Cosa la pensa de ste nove generasioni? I se diverti o no sti giovani, o i sta solo a vardar i compiuteri e i telefonini?"
E ela la me fa un pò pensierosa: "Cara la mia picia, mi me par che sto mondo xe andà tuto in malora. Qua no se capisi più niente. Go mio nipote che invese de andar fora coi amici el sta tuto el giorno serado in camera sua. Ogni tanto vedo che el xe fora de casa, ma sai poco. Mi no so, ma credo che nol sta tuto el giorno a studiar sui libri e quaderni. Me par che sta roba no xe tanto normale".
E mi ghe digo: "A cosa la vol siora Pinucia, i tempi xe cambiadi. Deso no se comunica più in piasa, o de qualche altra parte coi amici. Deso xe tuto virtuale, i giovani se sera in camera e i se frequenta tramite telefonini e compiuteri. Mi me par che son tra le ultime generasioni che ga godudo de le robe de una volta. La ga sentì parlar de Feisbuc?"
"Virtuale o no virtuale, Feisbuc o no Feisbuc – continua siora Pinucia – no so mi se sto mio nipote se troverà la morosa se el continua a vardar el compiuter. Mi a la sua età gavevo za cambià due morosi. Andavo okolo de la matina a la sera, co finivo i mii doveri, se capisi."
"Ma no la staghi preocuparse siora Pinucia, el troverà si la morosa, su Feisbuc. I se manderà i bacini su Feisbuc, i se fidanserà e sposerà su Feisbuc. E a la fine ognidun starà a casa sua, su Feisbuc. E tuti felici e contenti, genitori compresi", go concluso mi.
Nota: questo xe un testo de fantasia. Nomi, personagi, loghi e episodi xe fruto de l'imaginasion de l'autor e no i xe de considerarse reali. Qualsiasi somigliansa con fati, scenari o persone viventi o defunte, veri o imaginari xe del tuto casuale.
Cedo la parola a Velan...
Se disi: goba a Ponente, Luna cresente, goba a Levante, Luna calante. Xe semplice, ti guardi in alto e ti vedi in che fase lunare ti te trovi. Te cambia la vita? No. Però la Luna xe importante per tante robe: per taiar in bosco, per seminar, per travasar el vin...
I lo ciama el mondo reale che xe diverso de quel virtuale. La mia generasion la se ga za abondantemente alontanada dal mondo reale, i giovani de ogi e quei che naserà domani i xe ancora più lontan. La Donatella la calcola che un giorno i giovani i farà l’amor tramite Feisbuc.
Comunque la Luna la continua a creser e a calar e le stele le segui i cicli. L’unica che no se movi xe la stela del Nord, a Rovigno i la ciama El stilon. Una volta se navigava in mar verto con l’aiuto de le stele, i veci i conoseva tute le costelasioni, la posision invernale e quela estiva e i saveva esatamente come individuar la stela del Nord. Se ti sa dove che la xe no ti pol sgarar, ti navighi sicuro su la tua rota . La Luna e Venere le xe in fase de avicinamento: ogni ano in questa stagion la distansa se strinsi, i due astri i xe come due amanti con poca fortuna, in costante avicinamento sensa mai tocarse, bruto destin.
Co ti vivi in campagna la natura la xe più ciara: se disi a ragion: voia o no voia marso buta foia. Sto ano xe tuto in ritardo, la gente, giovani compresi, no ghe pol interesar de meno: i va in Plodine e i compra tute le verdure del mondo, anche le ciliege che le creserà tra un mese, vivemo in avanti, gustemo prima de seminar, magnemo prima de ingrumar. La cultura xe un grande mondo che vivi in paralelo con la natura, xe due cuori che no se tocarà mai come la Luna e Venere.
La Bibia disi che l’omo no el doveva far quel che el ga fato, che el doveva star tranquilo nel giardin de l’Eden, che non doveva romperghe le scatole a Dio. Xe andado in modo diverso e ogi se tignimo i santi, el calendario, la busola, el navigator digitale e anche el drone.
Gavevo un profesor de storia de la lingua italiana, el iera un grande comunicator, se disi, un dispensator de cultura. El ne contava che nel Medioevo i contadini che rivava a Milano da la campagna i se meteva davanti a la faciata del Duomo e i legeva ogni simbolo scolpido, i riconoseva ogni facia, ogni gesto, ogni ordine...Ogi, el ne diseva, i turisti i riva in piasa Duomo i guarda el Duomo e più de dir che el xe grande no i sà, dei santi no i capisi un kaiser, i xe ignoranti più dei contadini de seicento ani fa. Anche noi ogi semo bastansa più ignoranti de quei de ieri, più che andemo avanti più dimentichemo, forsi anche imparemo qualcosa de novo, no bisogna eser pesimisti...
