MA COSSA I VOL ANCORA STI TALIANI DE L'ISTRIA? Quel che 'l conta che 'l xe vedovo, sensa dir che la moglie la ga copada lui

In sti giorni dele elessioni in tei vari comenti in tei social netuorc me ga capità spesso de leger atachi contro l’esistensa del seggio specifico dei Taliani al parlamento de Zagabria. Xe tanti quei che i diʃi che el saria solo de intrigo e che cussì cussì in Istria de Taliani ghe ne xe pochi. Insoma, la vecia retorica del “šta hoće ti Talijani“.

Bisogna ameter che i ga ragion de dir che in Istria xe pochi Taliani, perchè xe un fato vero. Ma spesso la verità nuda e cruda no la nela conta giusta. Anche uno che 'l ga copà la moglie, co 'l te dixi „son vedovo“ el dixi la verità.

Chi che conossi un minimo de storia sa benissimo che ogi in Istria xe pochi Taliani per via de l'esodo, ma a volte se dixi sta roba in modo automatico, sensa pensar realmente a coss' che xe capità. E alora son andà veder i dati de l'ultimo censimento. Xe impressionante veder che loghi dell'Istria in do che per secoli ga vissù 99 Taliani su 100 abitanti, oggi i ne mostra numeri che fa paura: a Dignan ghe ne xe solo el 13,53%, a Umago el 13,16%, a Citanova el 9,95 % a Rovigno, istriota come Dignan, solo l'8,14%, a Parenso un teribile 2,4%. Simile, ma forsi anche peʃo, xe a Portorose, Piran, Isola e Capodistria.

Xe loghi in do' che la demografia storica la xe stada rivoltatada come un guanto e desso, oltre a gaver subì el dano, ne riva anche la befa de dover leger coss' che volemo che tanto semo in pochi.

La totale mancansa de pudor, e se podessi dir anche de rispeto per chi che sta comunuque a casa sua, trope volte la vien in compagnia de una dose pachidermica  ignoransa.

Oltre a dirne che semo in pochi, i ne disi che tanto l'Italia la iera qua solo poco più de venti ani, dal 1918 al 1943, e che gnanche no la esisteva come stato fin al 1861. E de novo gavemo a che far con uno che el te dixi che el xe vedovo, ma no 'l te dixi che 'l ga copà la moglie.

Me sento adiritura deficiente dover spiegar che gnanche Milano o Bologna, tanto per far due esempi, mai le iera italiane prima del 1861. Ma bisognassi esser sai fora de testa per dir che a Milano e Bologna no stava Taliani. No xe i confini nazionali che genera un popolo, xe la lingua e i usi comuni, le tradissioni, le abitudini e, specialmene, l'autocoscienza de apartegnir a quel popolo.

Se fin al 1861 no esisteva un stato che se ciamava Italia, l'idea dell'Italia la iera presente xa da più de domila ani. Senza perder tropo tempo con Tucidide, Aristotele, Virgilio e Strabone che l’Italia xa i la nomina, basta tegnir in mente che l’imperator Ottaviano el usa ufficialmente el nome Italia per tutte el teritorio che andava dala Calabria fin, qua in Istria, al fiume Arsa e al speron de Fianona (Punta Pax tecum).

Insoma, l’Istria, all’interno della region Histria et Venetia (e con Campania, Apulia et Calabria, Lucania et Bruttii, Flaminia et Picenum, Tuscia et Umbria, Liguria et Aemilia, Venetia et Histria, Alpes Cottiae, Raetia) la iera considerada nella parte italiana de l’impero roman duecento ani prima dela Sicilia e dela Sardegna che, con la Corsica, le xe state inseride nela parte italiana solo ala fine del III secolo d.C.. Una situasion simile la se ripeti anche soto Bisanzio, una volta cascada Roma, e poi soto i Franchi dopo che Carlo Magno el gaveva scassà via i Bizantini dai nostri loghi.

Solo per far un’altro esempio, xa Petrarca, tra el 1344 e 1345 (quasi 700 anni fa, alto che 1861!) el ga scrito la poesia “Italia mia”: questo solo per dir che associar l’idea de italianità all’esistenza de uno stato che se ciama Italia xe una roba abastansa idiota.

Per quei che vedi iredentismi in ogni starnudo in italian, ghe tegno precisar che ste robe le go scrite (specie el riferimento storico-georgrafico de gran parte de l’Istria nella “diocesi” italiana de l’impero roman) no per rivedicar un'Istria italiana, roba che nisun san de mente nel 2024 ghe dovessi passar per la testa. Le go scrite invesse per precisar che no coreva spetar la nascita de l’Italia nel 1861 per veder Taliani pescar, sapar la tera e tirar su case in Istria e, tanto per sfatar un altro stereotipo sbaglià, no coreva spetar gnanche Venessia, perchè in Istria quel talian volgare derivà dal latin qua el se lo parlava xa prima de passar soto el leon de San Marco.

In Istria xe posto per tuti, per i Croati che con i Taliani i ga condiviso gran parte dei dolori de la storia de sta nostra penisola, per quei che i xe vegnudi a pien dirito dalla famosa strada "preko Učke" e da quei che i xe stadi ridoti a minoransa. E sicome se parla de una minoransa a malapena sopravissuda, sti ultimi no i dovessi esserghe tropo de fastidio a quei che desso i xe maggioranza, gnanche ala marea de sapientoni de Feisbuc. Xe posto per tuti, basta rispetarse. Basta saver rispetar le ragioni e i dolori dei altri.