MARIA VELAN SOLDATI E RONALD BRAUS: La Medaia dela Cità de Rovigno in man a due persone che la se la ga meritada

Xe sta sai bel leger che tra i oto premiai (sete persone e un’associazion) che sto anno i ga avù la Medaia (per l’associazion xe una Targa) dela cità de Rovigno xe anche la professoressa Maria Velan Soldati e ‘l maestro de musica Ronald Braus, tuti e due ligai al gran lavor, bel e prezioso, ma a volte frustrante, che se fa per mantegnir viva la presenza italiana in Istria. Le medaie le ghe xe sta’ consegnade ala riunion del consiglio citadin al Centro multimedial, tegnuda in ocasion del 16 setembre, Festa de Sant’Eufemia e Giornata dela Cità de Rovigno.

Maria Velan, premiada per “per i risultati conseguiti e i successi particolari nel lavoro nel settore dell’istruzione e della cultura” xe uno dei quei pochi rappresentanti ancora vivi de quel modo de esser che el xe sta tipico dela componente italiana de l’Istria nela seconda metà del XX secolo, cioè tipico dei tanti maestri che la matina i ‘nsegnava a scola o in asilo e ‘l dopopranso i andava al Circolo italian per guidar filodramatiche, grupi leterari e de storia, el folclore, i cori. Opur, i ciogheva in man le redini delle CI diventando presidenti, membri dei comitato direttivo o segretari delle Comunità degli Italiani e delle Società artistico-culturali.

El nome de Maria Velan se pol asociar a pien diritto ai quei dele figure de docenti e attivisti che i ga lassà un segno indelebile in tele nostre scole e in tei circoli: i primi nomi che me vien in mente (e che no se staghi rabiar chi per smemoratezza o ignoranza mia no nominerò) xe quei de Claudia Milotti e Mario Lonzar a Pola, Maria Balbi e Maria Moscarda Budić a Galesan, Anita Forlani, Giorgina Kutić e Sandro Manzin a Dignan, Orietta Richter Šverko a Pola e Dignan, Maria Sciolis e Libero Benussi a Rovigno, Luciano Monica a Castagna, Verteneglio, Buie, Cittanova, Isola e Piran, Sergio Bernich a Umago e Buie, Dario Forza a Umago, Silvano Pellizzon Umago e Salvore, Daniela Paliaga Janković (originaria de Rovigno) e Fulvia Žudič a Piran, ma anche quei de maestri che i ne ga lassà, come Olga Milotti a Pola, Sergio Delton a Dignan, Antonio Borme e Vlado Benussi a Rovigno, Maria Grazia Benčić Bazzara a Parenzo,  Claudio Ugussi e Lucia Moratto Ugussi a Buie, Pippo Rota a Umago, Corrado Iliasich, Arminio Shacherl e Maria Schiavato, scomparsa purtropo pochi giorni fa a 92 anni, a Fiume. Ma anche tanti altri…

E poi, verzendo de più la finestra sul mondo, xe de dir che Maria Velan fa parte de quela nobile categoria de professionisti che i se ciama “maestri”, un mestier che ogi purtopo el xe sotovalutà, con i maestri atacadi da destra e sinistra da genitori viziai de fioi viziai, sempre pronti a difender el rendimento dela propria “sacra prole” a scola, quasi sempre gavendo torto.

Pagadi poco, ogi i maestri ghe toca subìr anche la mancanza de rispeto, co’ invesse i dovessi esser consideradi come preziosi “collaboratori esterni”, quasi “membri aggiunti” de ogni famiglia, figure centrali nel far diventar pice i pici done e omini.

Una volta in tei paesi le persone più importanti iera el sindaco, el prete, el capo dele guardie, el notaio e ‘l maestro. Ogi questi mestieri i xe quasi dispressai e se pol ben completar Nietszche e dir che l’eta contemporanea no la ga copà solo Dio (infati, se pol descriver benissimo la società de ogi senza usar la parola "Dio", ma no se pol farlo senza usar le parole soldi, profito, tecnologia e comunicazion) ma tuto un modo de viver e de pensar durado almeno mile anni.

Apassionada e seria nel trasmeterghe conoscenza ale giovani generassioni, Maria Velan la xe stada anche coreografa e regista dela filodrammatica della SAC Marco Garbin de Rovigno e membro, in qualità de responsabile del Setor Arte e Spetacoli della prima Giunta dell’Unione Italiana composta dopo le prime elezioni democratiche dell’UI del genaio del 1991. Iera una una giunta presieduta da Maurizio Tremul e cariga de gente pensante come Silvano Sau, Sergio Settomini, Claudio Geissa, Fabrizio Radin, con el presidente dell’Assemblea Antonio Borme che ‘l partecipava a ogni riunion. Quel no iera solo un organismo politico dei Italiani de Croazia e Slovenia, iera un vera e propia agorà in do’ che Maria Velan, con la sua esperienza, la dava un contributo importante.

Ronald Braus, oltre ad esser un bravissimo musicista, el xe una carissima persona. El ga avù la medaia de Rovigno “per i risultati conseguiti e i successi particolari nel lavoro nel settore della cultura”.  Cantante lirico, baritono, solista a tanti festival in Croazia e all’estero, Ronald Braus xe el fondator del festival artistico de musica, teatro e moda „Rovinj Art & More“. In tel ultimo periodo, tra le tante robe che 'l fa, el dirigi el coro misto della SAC Lino Mariani della CI de Pola. Dale informazioni che me riva da qualche “insider”, i coristi de Pola i lo stima sai e i ghe vol sai ben.

Complimenti e congratulazioni a Maria e Ronald.